Abanyamusanze baryohewe n’imiririmbire ya korali ziri mu Iserukiramuco ry’Indirimbo

 Abanyamusanze baryohewe n’imiririmbire ya korali ziri mu Iserukiramuco ry’Indirimbo

Igitaramo cyo ku munsi wa gatatu cy’Iserukiramuco ry’Indirimbo, ryateguwe na Chorale de Kigali ku bufatanye n’Ishyirahamwe Nyafurika Rigamije guteza imbere umuziki wa korali muri Afrika (ACGC), cyabereye mu Karere ka Musanze kuri Diyosezi ya Ruhengeri.

Muri korali zirindwi zo mu Rwanda zikomeje gutaramira abitabira iri serukiramuco harimo: Chorale de Kigali, Living Hope Choir, Alarm Ministries, Nova Dolce, 5 Bright Singers, Choeur International et Ensemble Instrumental de Kigali ndetse na Korali Ishema Ryacu.

Usibye kandi izo mu Rwanda, hari n’izindi korali zaturutse mu bihugu birimo Nigeria, muri Afurika y’Epfo ndetse no muri Ghana hatangiriye iki gikorwa.

Muri Nigeria haturutse korali zikurikira: CHC All Female Choir, BACMAC Choir ndetse na Lagos City Chorale, muri Afurika y’Epfo ni Bakamoso, mu gihe muri Ghana haturutse Acra Diocesan Choir, Akoo Show Choir, Grace Chorale, Harmonious Chorale, Heavenly Jewels Chorale na Symphonials.

Iri serukiramuco ry’indirimbo ryatangiye ku italiki ya 23 Werurwe 2022, rikaba riteganyijwe gusozwa ku italiki ya 28 Werurwe 2022.

Ku italiki ya 24 Werurwe nibwo habaye igitaramo cyo gutangiza iri serukiramuco nyirizina, mu Intare Arena guhera ku isaha ya saa kumi n’ebyiri z’umugoroba.

Ku italiki ya 25 Werurwe igitaramo cyabereye mu Imbuga City Walk (Car Free Zone), guhera saa kumi n’ebyiri z’umugoroba.

Umunsi wa nyuma wo gusoza iri serukiramuco ni ku italiki ya 27 Werurwe 2022, mu Intare Arena, aho muri iki gitaramo hazanahembwa korali yatsinze irushanwa. Iki gitaramo nacyo kizatangira ku isaha ya saa kumi n’ebyiri z’umugoroba.

Ibiciro

Uguze itike 1 yo kwinjira mu gitaramo kimwe mu bizabera mu Intare Arena, ahasanzwe azishyura 10,000 Frw, VIP ni 20,000 Frw, mu gihe VVIP ari 30,000 Frw.

Uguze itike 2 yo kwinjira mu bitaramo bibiri bizabera mu Intare Arena, ahasanzwe azishyura 15,000 Frw, VIP ni 30,000 Frw, mu gihe VVIP ari 45,000 Frw.

Iri serukiramuco ry’indirimbo ryatangijwe n’Ishyirahamwe nyafurika Rigamije Guteza imbere muzika ya korali muri Afrika (ACGC) mu mwaka wa 2020, muri Ghana. Iri serukiramuco rifite intego yo kwizihiza impano z’umuziki muri Africa, kwerekana umwimerere w’umuco nyafurika muri muzika no kunga ubumwe bwa Afurika binyuze mu muziki no mu bukerarugendo bushingiye ku muco.

Related post

Leave a Reply

Your email address will not be published.