Danny Mutabazi mu basusurutsa abitabiriye igitarane ryateguwe na ADEPR Cyahafi ifatanyije na Famille Abana b’Inkuba

 Danny Mutabazi mu basusurutsa abitabiriye igitarane ryateguwe na ADEPR Cyahafi ifatanyije na Famille Abana b’Inkuba

ADEPR Cyahafi ifatanyije na Famille Abana b’Inkuba bateguye igitarane cy’ivugabutumwa cyatangiye ku itariki ya 1, kikazarangira ku itariki ya 8 Kanama 2022.

Muri iki giterane gifite intego igira iti: “Ihumure rirabonetse twubakire Imana”, umuhanzi Danny Mutabazi niwe biteganyijwe ko azajya asusurutsa abacyitabiriye.

Intego y’iki giterane iboneka mu gitabo cya 1Abami 5:18-19. ” Ariko noneho Uwiteka Imana yanjye impaye ihumure impande zose, ntamubisha nta n’ibyago bikiriho. Nuko ngambiriye kubakira izina ry’Uwiteka Imana yanjye inzu nkuko Uwiteka Imana yabwiye umukambwe wanjye Dawidi “umuhungu wawe nzashyira ku ngoma mu cyimbo cyawe, niwe uzubakira izina ryanjye inzu.”

Iki giterane kizitabirwa n’abavugabutumwa batandukanye bakunzwe muri iki gihugu cy’u Rwanda ndetse n’amakorali amaze kubaka izina harimo korali Jehovaniss na korali Sayuni.

Andi makorali yatumiwe harimo Korali Ahava ya ADEPR Nyacyonga, Korali Umugisha ya ADEPR Rugando, Korali Abatoranyijwe ya ADEPR Kimisagara, Korali Rubonobono, Korali Rangurura ya ADEPR Biryogo.

Rev. Alphonse Ryumugabe usanzwe uyobora itorero rya ADEPR Cyahafi ndetse akanabarizwa muri iri tsinda, yadutangarije ko iki giterane kidasanzwe kuko kibaye nyuma y’ibihe byari bikomeye byatumye bamara imyaka 2 badakora ibiterane ariko bakifuza ko kizasiga andi mateka muri Kigali.

Yagize ati: “Abantu basanzwe batumenyereye mu gutegura ibiterane kandi bikomeye ariko iki kirihariye kuko kije nyuma y’uko COVID19 itanze agahenge, ubu rero Imana itanze Ihumure ngo tuyikorere ndetse twamamaze imbaraga zayo. Iki giterane turifuza ko abarwayi bazakiriramo ndetse n’abandi bafite ibyifuzo bitandukanye nibaze birebere imbaraga z’Imana.”

Yagaragaje ko iki giterane bateguye bazagisoza banafatanya na ADEPR Cyahafi mu mushinga wo kwagura urusengero rwaho kuko rusigaye ari ruto ugereranyije n’ubwinshi bw’abakristo baho.

Itsinda ry’Abana b’Inkuba baherukaga kumvikana mu 2019 mu giterane cyabereye i Bweramvura bari bafatanyije na Korali Jehovajireh-ULK, cyari cyarabanjirijwe n’ikindi cyabereye i Rutonde muri Rwamagana naho bafatanyije n’iyo korali bakagisoza bubaka urusengero rwaho.

Protais MBARUSHIMANA

http://www.nkundagospel.rw

Related post

Leave a Reply

Your email address will not be published.