Aline Gahongayire yasubiyemo indirimbo ye “hari impamvu pe”yakunzwe cyane n’abakunzi be

 Aline Gahongayire yasubiyemo indirimbo ye “hari impamvu pe”yakunzwe  cyane n’abakunzi be

Umuramyikazi uri mu bakunzwe cyane mu muziki wo kuramya no guhimbaza Imana, Aline Gahongayire, yasohoye indirimbo “Hari impamvu pe” yayisubiyemo abisabwe n’abakunzi be yari imaze imyaka 11 ishize.

Mu 2009 ni bwo Gahongayire yasohoye bwa mbere indirimbo ‘Hari impamvu pe’, irimo ubutumwa bukangurira abantu gushima Imana nubwo banyura mu bikomeye.

Iyi ndirimbo ifite amateka yihariye kuko ari yo ya mbere uyu muhanzikazi uri mu bubashywe mu muziki uhimbaza Imana, yasohoye indirimbo yiyandikiye.

Aline Gahongayire yasubiyemo iyi ndirimbo “Hari impamvu pe” yari imaze imyaka 11

Kuva icyo gihe yayigiriyeho umugisha ndetse izamura izina rye mu ruhando rw’umuziki uhimbaza Imana, aho ari umwe mu bubashywe kubera ibihangano bitandukanye yasohoye bigahembura imitima ya benshi.

Gahongayire yabwiye itangazamakuru ko nyuma y’imyaka 11 yasohoye iyi ndirimbo iri kumwe n’amashusho yayo nyuma yo kubisabwa n’abakunzi b’ibihangano bye.

Yagize ati “Indirimbo turirimba ntizisaza. Imicurangire ishobora gusigara inyuma ariko ijambo ry’Imana ntirisaza. Indirimbo yongeye kumbera nshya, kuko uko biri kose hari impamvu nyinshi zo gushimana Imana.’’

Yakomeje ati “Nabisabwe n’abantu benshi nanjye nsanga iri mu murongo ndimo wo kugwiza amashimwe. Nayikoze nyuma y’indirimbo nka ‘Ndanyuzwe’ navuga ko biri mu murongo umwe.’’

Gahongayire ari mu bahanzi bakunzwe cyane mu ruhando rwa muzika ihimbaza Imana

Gahongayire ubarizwa muri Moriah Entertainment ari gukora kuri album izaba iriho abahanzi batandukanye, ateganya kumurika muri uyu mwaka. Mu yindi mishinga afite harimo ijyanye n’ibikorwa by’ubugiraneza byo gufasha abatishoboye anyuza mu muryango we Ndineza Foundation.

REBA HANO INDIRIMBO “HARI IMPAMVU PE” YA ALINE GAHONGAYIRE

Related post

Leave a Reply

Your email address will not be published.