Amafoto: Abakristu banyuzwe bikomeye n’igiterane cy’amateka Amahoro Choir yakoze mu kwizihiza Pasika

 Amafoto: Abakristu banyuzwe bikomeye n’igiterane cy’amateka Amahoro Choir yakoze mu kwizihiza Pasika

Iyi minsi ya Pasika isanzwe irangwa n’ibikorwa bya gikristu binyuranye bifasha kuzirikana urukundo rwa Kristu rwatumye yitangira abatuye isi. Mu myaka nk’ibiri ishize icyorezo cya Covid-19 cyakomye mu nkokora ibyo bikorwa cyane cyane ibihuza abantu benshi. Amahoro Choir hamwe n’abandi bahanzi b’amazina akomeye muri gospel nyarwanda basusurukije banahembura imitima y’abitariye igiterane bakoze mu kwizihiza Izuka ry’Umukiza (Pasika) muri uyu mwaka.

Iki giterane cyakozwe ku matariki ya 16 na 17 Mata 2022 kitabiriwe na benshi kandi bishimira kongera guteranira mu nzu y’Imana mu gihe amabwiriza yo gukumira icyorezo yoroheje ikorwa ry’ibitaramo muri rusange. Abahanzi b’amazina akomeye muri gospel nka Simon KABERA, Alex DUSABE, Jado SINZA n’abandi basusurukije imbaga y’Abaristu yari yitabiriye iki giterane mu ndirimbo ziririmbye mu buryo bwa ‘live’.

Iki giterane kiswe Easter Celebration Concert cyanatambukaga imbonankubone ku rubuga rwa YouTube rwa Amahoro Choir cyanaranzwe n’indirimbo nyinshi z’iyo chorale zashimishije abitabiriye ndetse n’abandi baririmbyi. Uretse indirimbo zafashije benshi kwizihiza Pasika neza hanatanzwe ibibwirizwa binyuranye aho abavugabutumwa bagarukaga ku rukundo ruhebuje Yesu yakunze abatuye isi bigatuma yemera kubapfira ariko akaza gutsinda urupfu akazuka ari na wo munsi wa Pasika wizihizwa.


Intego y’igiterane yari yubakiye ku magambo ya Bibiliya aboneka mu gitabo cy’Abakolosayi 1:12; Ibyo byatumye tuganira na Perezida wa chorale ku migendekere y’igiterane.
NAGIRIWUBUNTU Dieudonné uyobora Amahoro Choir yateguye icyo giterane yabwiye Nkundagospel ko intego yacyo yagezweho kuko uretse no gufasha abantu guhimbaza Imana no kwizihiza Pasika binyuze mu ndirimbo hari n’abihannye muri icyo giterane.
Yagize ati: “[Igiterane] cyagenze neza cyane twari dukeneye igiterane imitima y’abantu…Kandi byabayeho Imana yaduhuye abakizwa ku minsi yombi. Rero byahembuye imitima y’abantu bongeye kugira ubusabane. Iminsi yombi twabonye abihana, twumva rero umuryango wa gikristu warungutse cyane”. Uyu muyobozi asoza ashima ko ibyo bateguye byatanze umusaruro ndetse anasezeranya Abakristu muri rusange ko Amahoro Choir ikibahishiye byinshi mu rugendo rw’ubutumwa bwiza.

NAGIRIWUBINTU Dieudonné, Umuyobozi wa Amahoro Choir
Ubwitabire bwari bushimishije

Related post

Leave a Reply

Your email address will not be published. Required fields are marked *