Amarangamutima ya Ev. Andrea uherutse kurushinga na Claudine Tuyisenge

 Amarangamutima ya Ev. Andrea uherutse kurushinga na Claudine Tuyisenge

Umuvugabutumwa ukunzwe mu itorero ADEPR, Ndereyimana Andre, uherutse kurushinga na Tuyisenge Claudine bakundanye amezi 9, yatangaje ko mu minsi mike amaranye n’umufasha we amaze kubona ko urugo ari umugisha.

Mu kiganiro cyihariye yagiranye n’umunyamakuru wa Nkundagospel yagize ati: “Mu minsi mike maranye n’umufasha wanjye ndagira ngo mbatangarize ko nasanze urugo ari umugisha ukomeye. Abasore baba bafite umugisha ariko iyo umuntu amaze kubaka urugo umugisha wikuba inshuro nyinshi.”

Umuvugabutumwa Ndereyimana Andre yaboneyeho kugira inama uruhango rwe yamaze gutera umugongo kwibuka kugira inshuti z’umumaro kugira ngo nabo bazatere ikirenge mucye. Yagize ati:” Inama nagira abasore n’inkumi ni iyo kugwiza inshuti z’umumaro ariko cyane cyane ababyeyi bakuze, kuko baba ari ingirakamaro mu buzima bwabo.”

Gusa akomeza avuga ko ibyo umuntu yakora byose ariko akibagirwa gusenga bihinduka imfabusa, anahishura ko ibanga yakoresheje kugira ngo ubukwe bwe bugende neza ari ugushyira imbere amasengesho.

Ati:” Abantu benshi bakomeje kumbaza ibanga nakoresheje kugira ngo ibirori byanjye bigende neza ariko urebye byose byavuye mu gusenga cyane no kugira abajyanama beza.”

Ev. Andrea yasoje ikiganiro na Nkundagospel ashimira umufasha we wemeye icyifuzo cy’umutima we cyo gufatanya urugendo rw’ubuzima bitwa umuntu umwe ndetse anahamya ko azahora amukunda. Yagize ati:

“Ndashimira umufasha wanjye Claudine Tuyisenge ko yampaye icyizere akakira icyifuzo cyanjye cy’uko twafatanya urugendo rw’ubuzima dusigaje ku isi twitwa umuntu umwe. Iki cyizere yampaye sinzigera ngipfusha ubusa kuko naramukunze, ndamukunda kandi nzahora mukunda.”

Ku italiki 17 Nyakanga 2022 nibwo Ndereyimana Andre na Claudine Tuyisenge bambikanye impeta ihamya urukundo rwabo imbere y’Imana n’abantu. Ni ibirori byari bidasanzwe dore ko hari n’akarasisi abantu batangariye cyane.

Muri ibi birori byari bibereye ijisho, Josh Ishimwe, wamenyekanye mu ndirimbo “Ndate Imana” niwe wasusurukije ababyitabiriye. Ni ibirori byabereyemo udushya twinshi aho Andre yise umufasha we Nyampinga wa ADEPR ndetse anahamya ko asa na Nyampinga w’u Rwanda wa 2022, Muheto Divine.

Protais MBARUSHIMANA

http://www.nkundagospel.rw

Related post

Leave a Reply

Your email address will not be published. Required fields are marked *