Amateka ya korali Isezerano yaririmbye ‘Ntabwo wandemanye amahembe’

 Amateka ya korali Isezerano yaririmbye ‘Ntabwo wandemanye amahembe’

Muri iki gihugu cy’u Rwanda uvuze indirimbo irimo interuro ngo “Ntabwo wandemanye amahembe cyangwa ngo undemane umurizo” ndemeza ko umuntu wese ukurikirana iyobokamana yakubwira ko iyo ndirimbo ayizi ndetse akongeraho n’indi yitwa “Umurengwe”.

Izi ndirimbo zubatse amateka mu gihugu cy’u Rwanda no hanze zaririmbwe na korali Isezerano ikorera, ubutumwa muri ADEPR, paruwasi ya Butete, iherereye mu Karere ka Burera, mu Ntara y’Amajyaruguru.

Mu kiganiro umunyamakuru wa Nkunda Gospel yagiranye n’umuyobozi wayo, Bwana Ndiyunze Jérôme, yatangaje ko kuba barakoze indirimbo zikamenyekana hose babishimira Imana ndetse anahishyura gahunda bafite mu myaka iri imbere. Yagize ati:

“Mu myaka 5 iri imbere turifuza kubaka ubushobozi bwa korali ku buryo burambye. Dufite projet yo kugira amahema n’intebe bikodeshwa kandi bihagije. Dufite kandi projet yo gukora dekorasiyo na sonorisation mu birori binyuranye, tugamije kubaka ubushobozi bw’imibereho kuri buri muririmbyi.” Yakomeje ati:

“Korali Isezerano irateganya guha akazi abatagafite bagera kuri 30 no kongerera ubushobozi abikorera badafite ubushobozi buhagije. Ibi bizadufasha gukora ivugabutumwa ry’indirimbo mu buryo bukurikira : Gukora ingendo za kure zigamije ivugabutumwa,gutegura ibiterane birenza umunsi umwe,gufasha abatishoboye batuye hafi y’aho dukorera umurimo w’Imana. Koroza abaturage amatungo no gushakira abaririmbyi amahugurwa hagamijwe kubongerera ubushobozi mu miririmbire.”

Iyi korali yakoze umurimo udasanzwe yabonye izuba taliki 1 Mutarama mu mwaka w’1998, mu itorero rya ADEPR, Paruwasi ya Butete, Umudugudu wa Butete, Ururembo rwa Muhoza.

Kugeza uyu munsi iyi korali ifite abaririmbyi basaga 80 imaze gukora indirimbo zikabakaba 60, harimo iz’amajwi zikabakaba 40 ndetse n’iz’amashusho zirenga 20.

Bwana Ndiyunze yakomeje avuga ko “ibihe bya COVID byasubije inyuma urwego rw’ubukristo n’iterambere rya korali, kubera gukora amasengesho atwara umwanya uhagije bitagishoboka. Ivugabutumwa ryaguye ntirigishoboka, …. Umuti ni ukugerageza gukoresha amatsinda matoya mu gusenga no gushaka Imana hubahirizwa amabwiriza yo kwirinda COVID 19.Gukorera mu cyaro bituma kubona akazi kubaririmbyi bigorana kubahatuye. Turimo kongera imbaraga mubikorwa bibyara akazi.”

Uyu muyobozi kandi yasoje iki kiganiro asaba amakorali yose kugendana n’igihe. Yagize ati:

“Amakorali yose akwiye kwiga kugendana n‘ibihe: Kumenya gukoresha MEDIA mu ivugabutumwa, kandi bigakorwa ku buryo bitanga umusaruro ujyanye n’intego y’ivugabutumwa. Kongera ubufatanye hagati y’amakorali no kurandura ikintu cyose cyazana guhangana. Kongera imbaraga mu bikorwa byongera ubushobozi bw’amakorali byunganira imisanzu yabaririmbyi.”

Related post

Leave a Reply

Your email address will not be published. Required fields are marked *