Barashima Imana kubera Carin Fashumwana Organization iri kurandura imirire mibi mu bana babo

 Barashima Imana kubera Carin Fashumwana Organization iri kurandura imirire mibi mu bana babo

Abaturage batuye mu Ntara y’Amajyaruguru n’Iburengerazuba barishimira byimazeyo umuryango utegamiye kuri Leta, witwa Carin Fashumwana Organization watangije gahunda yo guha abana babo amata n’amagi hagamijwe kurwanya imirire mibi muri bo.

Uyu muryango ukorera mu burengerazuba n’iyo mu majyaruguru, usibye kuba ufasha abana kugira imirire myiza, unafasha ababyeyi kumenya gahunda ihoraho yo kumenya icyakorwa kugira ngo abana babo bahorane ubuzima buzira umuze.

Mu kiganiro twagiranye na bamwe mu bababyeyi bafite abana bafashwa na Carin Fashumwana Organization, batangaje ko bashimishwa no kuba indwara ziterwa n’imirire mibi zimaze kuba amateka mu Karere kabo, bitewe na Carin Fashumwana Organization.

Nyirahafashimana Marie Louise ufite umwana watangiye gufashwa na Carin Fashumwana Organization, afite imyaka 2 yonyine yavuze ko hari igihe cyageze bakazahazwa n’indwara ziterwa n’imirire mibi ariko bagashimira Carin Fashumwana Organization ko itigeze ibatererana muri urwo rugamba. Yagize ati:

“Hari igihe cyageze abana banjye bajya mu mutuku kubera kutamenya gahunda yo kugaburira abana bacu indyo yuzuye, gusa turashimira Carin Fashumwana Organization yatubaye hafi ikatwigisha gutegura indyo yuzuye none abana bacu bakaba bafite ubuzima buzira umuze.”

Nyiramana Chantal we yagize ati: “Carin Fashumwana Organization yatumye umwana wanjye mbona ubushobozi bwo kujya kumuvuza kandi uburwayi bwe butari busanzwe. Ndabizi ko bakoresheje amafaranga menshi ariko Nyagasani azabiture.”

Nkurikiyimana Alexendre watangije Carin Fashumwana Organization avuga ko yatangiye afasha abantu muri rusange ariko agahamya ko atari azi ko bizakura bikagera ubwo bibaye umuryango mugari nk’uyu. Yagize ati:

“Nakundaga gutembera mu bice by’ibyaro ngasanga ikibazo bijya guhuriraho ari ikijyanye n’imirire mibi. Ubwo natangiriye ku bitaro bya Rwankeri mpera ku gufasha abana bagera kuri mirongo itatu babanaga n’imirire mibi. Bigeze mu mwaka wa 2013 nagize igitekerezo cyo kwagura ibyo bikorwa nuko bikura bityo.”

Nkurikiyimana Alexendre avuga ko gutekereza kuri ibyo bikorwa yabitewe no kuba yarakuze akunda abana, bityo uwo yabona abayeho nabi bikamukora ku mutima. Yagize ati:

“Nakuze nkunda abana cyane ku buryo byankoraga ku mutima cyane kubona hari umwana ubayeho nabi, bigatuma numva nakora buri kimwe cyose kugira ngo umwana yishime.”

Uko uyu mugabo yakomezaga umurego wo gufasha aba bana kugera ku ntego z’ubuzima bwabo, yaje guhura n’umugira neza witwa Carin, ukomoka muri Canada maze bahuza imbaraga umuryango utangira gukura ubwo.

Carin Fashumwana Organization ni umuryango umaze kwaguka cyane, dore ko wanatangije ishuri ry’inshuke ryitwa  Carin Nursary School. Iri rerero ryatangiranye n’abana barenga ijana, kugeza ubu bose bari mu mashuri abanza. Si ibyo gusa kandi kuko hari n’abandi bana bari mu mashuri yisumbuye bishyurirwa amafaranga y’ishuri n’uyu muryango.

Hari kandi imiryango igizwe n’abarenga 180 borojwe inkoko ndetse n’ihene hagamijwe kurwanya igwingira mu bana ndetse n’ubukene mu muryango nyarwanda.

Carin Fashumwana Organization kugeza ubu ifasha abana bakabakaba magana abiri mu Karere ka Nyabihu ndetse n’abagera ku ijana na mirongo itanu bakomoka mu Karere ka Musanze. Gusa bahamya ko baramutse babonye umushobozi bwisumbuyeho bagera mu turere twose two mu Rwanda.

Carin n’umugabo we

Protais MBARUSHIMANA

http://www.nkundagospel.rw

Related post

Leave a Reply

Your email address will not be published. Required fields are marked *