Byinshi k’urubanza ruregwamo Ingabire wari Padiri Mukuru wa Paruwasi ya Rwamagana

 Byinshi k’urubanza ruregwamo Ingabire wari Padiri Mukuru wa Paruwasi ya Rwamagana

Urukiko rwisumbuye rwa Gasabo rwategetse ko Ingabire Jean Marie Théophile wari Padiri Mukuru wa Paruwasi ya Rwamagana; Bamuteze Yves, Bimenyimana Emmanuel Binego (Umwavoka), Mureke Idrissa Debi na Umutesi Jean d’Arc, bakurikiranyweho ibyaha birimo iby’ubujura bwa miliyoni 1$, gushyiraho umutwe w’abagizi ba nabi n’ibindi, bagumya gukurikiranwa bafunze nyuma y’uko bari bajuririye icyo cyemezo.

Muri Kamena 2021 ni bwo Padiri Ingabire n’abarimo Bamuteze Yves, Bimenyimana Binego Emmanuel, Mureke Idrissa Debi, Umutesi Jeanne d’Arc na Ntakirutimana Michael batawe muri yombi.

Bakurikiranyweho kwihesha ikintu cy’undi hakoreshejwe uburiganya, ubujura bukoresheje kiboko, gushyiraho umutwe w’abagizi ba nabi, guhabwa ku bw’uburiganya cyangwa guhimba no gukoresha inyandiko mpimbano.

Ibindi byaha aba bantu bakurikiranyweho harimo icy’iyezandonke no gukora ibikorwa by’ubucukuzi bw’amabuye y’agaciro nta ruhushya.

Ubwo bafatwaga Umuvugizi w’Urwego rw’Ubugenzacyaha, RIB, Dr Murangira B. Thierry, yatangaje ko icyatumye uyu mupadiri afungwa bifitanye isano n’amafaranga menshi yafatiwe iwe aho yabaga ku kiliziya.Abakurikiranywe bagize uruhare mu bujura bwa miliyoni 1$

Padiri Ingabire na bagenzi be bitabye Urukiko rw’Ibanze rwa Gasabo muri Nyakanga umwaka ushize ndetse ku wa 21 Nyakanga 2021, rutegeka ko bafungwa iminsi 30 y’agateganyo bahita bajurira.

Ku wa 13 Kanama 2021, nibwo Urukiko Rwisumbuye rwa Gasabo rwagumishijeho iki cyemezo cyo gukomeza kubafunga by’agateganyo ndetse wa 25 Ukwakira 2021, bongererwa igifungo cy’agateganyo mu gihe bategereje kuburana mu mizi.

  • Imiterere y’ibyaha bashinjwa n’uburyo babikoze

Ubwo Padiri Ingabire na bagenzi be bitabaga Urukiko, Ubushinjacyaha bwavuze ko ku wa 10 Kamena 2021, bamwe ari gatozi abandi bakaba ibyitso by’abandi, bibye amafaranga y’umunyamahanga witwa Skare Janos.

Bwavuze ko bamwibye ibihumbi $500 ndetse n’ibihumbi 415 by’ama euro ni ukuvuga ko yose angana na miliyoni $1, abarirwa muri miliyari 1Frw.

Ni amafaranga ngo Skare Janos yari yaje kuguramo amabuye y’agaciro yo mu bwoko bwa zahabu mu Rwanda, hanyuma ngo abagombaga kumuha ayo mabuye y’agaciro bamusaba ko yabasanga ku Gisozi mu Karere ka Gasabo aho bari bakodesheje.

Ubushinjacyaha bwabwiye Urukiko ko ngo abo bantu bumvikanye n’uyu muzungu ko bagomba kubanza kubara ayo mafaranga bakareba ko yuzuye hanyuma bagapima zahabu bakareba ko ari nzima.

Bwasobanuye ko nyuma yo kubara amafaranga no gupima zahabu abagurisha bahise bategeka uwo muzungu, Skare Janos n’abo bari bazanye kugura iyo zahabu, kwicara ku buriri [icyo gihe bari bahuriye kuri Apartment iherereye ku Gisozi].

Muri abo bagurisha hari harimo uwiyitaga Olivier ari we Bamuteze Vedaste Yves [ngo ni we wari boss waje kugurisha zahabu] yahise afata igikapu kirimo amafaranga aragitwara abandi yari yazanye na bo basigara barinze abazungu mu nzu kugira ngo batagira icyo bavuga.

Hashize umwanya muto ngo itsinda ryari risigaye ririnze abo bazungu ryaje gusohoka rijya kugabana amafaranga, bahurira aho bari bumvikanye.

Ubushinjacyaha buvuga ko nyuma abazungu basohotse babura abo bantu bari barangajwe imbere na Bamuteze Vedaste Yves, bahita bajya gutanga ikirego ndetse bagaragaza purake y’imodoka ababambuye bagendagamo.

Mu iburanisha kandi Ubushinjacyaha bwabwiye Urukiko ko abo bantu bamaze kugabana amafaranga bagiye bayabitsa abantu batandukanye kugira ngo batazafatwa, abo nabo bagiye babika ayo mafaranga bagendaga bayimurira ahantu hatandukanye bagamije gusibanganya ibimenyetso.

Padiri Ingabire mu rukiko byavuzwe ko hari umutamenwa wasanzwe iwe ndetse wari urimo $300 akomoka ku cyaha cyakozwe n’aba bambuye umuzungu.

Urukiko rw’Ibanze rwa Gasabo rwakoze isesengura rusanga batandatu barimo Padiri Ingabire, Bamuteze Vedaste Yves, Bimenyimana Binego (Umwavoka), Mureke Idrissa Debi na Umutesi Jeanne d’Arc bagomba gukurikiranwa bafunzwe by’agateganyo.

Abandi barimo Sibomana Emmanuel, Ntirenganya Innocent, Umwali Shamimu, Uwimana Claudine, Kayisire Mireille, Ndayisenga Saidati na Mukandori Aime, bo byanzuwe ko bagomba gukurikiranwa badafunze.

Related post

Leave a Reply

Your email address will not be published.