Byinshi wamenya ku munyamuziki Hafashimana Jean Claude wasohoye album ya mbere

 Byinshi wamenya ku munyamuziki Hafashimana Jean Claude wasohoye album ya mbere

Umuhanzi uririmba indirimbo zisingiza Imana, Ir Hafashimana Jean Claude yasohoye album ye ya mbere yatuye abakristu bose muri rusange ariko by’umwihariko abiyambaza umubyeyi Bikiramariya.

Iyi album yiswe ‘Mwamikazi Wa Fatima’ igizwe n indirimbo zirindwi zisingiza Imana, ndetse zimaze gukundwa n’abatari bake nkuko bigaragara kuri shene ya YouTube y’uyu muhanzi.

Usibye kandi gusohora album ye ya mbere, Hafashimana Jean Claude yanagize uruhari mu gutangiza Ishuri rya Muzika kuri Cathedrale ya Ruhengeri, dore ko ari nawe uhagarariye Equipe technique muri Paroisse Ruhengeri.

Mu kiganiro na Nkundagospel, Hafashimana Jean Claude yatangaje ko iyi album ye yamweretse isomo rikomeye. Yagize ati:

“Iyi album yanyeretse ko abantu banyotewe n’indirimbo zo gusingiza Imana intera ingufu zo gushyira ahagaragara no gutunganya izindi ndirimbo. Nabonye ko umuziki ukwiriye kutubera isoko y’ubukristu nyabwo ukatubera kandi isoko y’ubumwe nyabwo.”

Uyu muhanzi kandi ateganya gusohora indirimbo eshanu z’amajwi ndetse n’indirimbo imwe y’amashusho, muri uyu mwaka wa 2022.

Arateganya kandi gufatikanya n’abandi mu gutegura igitaramo Ngaruka Mwaka cya Korali Ishema Ryacu kizaba mu mpera z’uyu mwaka ndetse no gusoza igitabo cy’indirimbo ze yatangiye kwandika.

Mu gusoza iki kiganiro Hafashimana Jean Claude yasabye abakunzi be gukomeza kumushyigikira. Yagize ati:

“Ndasaba abakunzi banjye gukomeza kudushyigikira mu buryo bwose bushoboka bakurikirana ibihangano byacu kandi batega amatwi ubutumwa bubikubiyemo ndetse no kutugira inama ngo turusheho kunoza ibyo dukora no gukora indirimbo nyinshi.” Yakomeje kandi gushimira abamufashije mu muziki we. Yagize ati:

“Ndashimira abagize uruhare rwo ku nkundisha umuziki cyane cyane abihaye Imana banyigishije Umuziki,harimo nka Padri Dr Hagenimana Fabien, Padri Zirarusha Leopord, Padri Ntungiyehe Andre.
Ndashimira byimazeyo kandi Korali Ishema Ryacu kuko yagize uruhare rukomeye mu kuzamura impano y’ubuhanzi bwanjye. Ndashimira na Studio zamfashije gutunganya indirimbo harimo, TOP 5 SAI, EMB Production Music, ndetse nkanashimira Fratri Arinatwe Eugene wambaye hafi afatanyije n’abandi baririmby baririmba mu ma korali atandukanye yo kuri Cathedrale ya Ruhengeri.”

Hafashimana Jean Claude ufite indirimbo zirenga mirongo ine avuga ko yatangiye umuziki afite imyaka itandatu. Yatangiye kuyobora korali yiga mu mwaka wa gatandatu w’amashuli abanza, ndetse aba na animateur w’indirimbo acyiga mu mashuli abanza.

Hafashimana Jean Claude yanogeje umuziki we ubwo yigaga mu Iseminari Nto Ya Mutagatifu Yohani Nkumba, Diocese Ruhengeri aho yabaye uwigisha indirimbo yiga mu mwaka wa 3 w’amashuli yisumbuye ari nabwo yatangiye kujya ayobora indirimbo za Misa.

Yakomeje kwihugura muri muzika aho yakomereje mu I Seminari Nkuru I Rutongo aho yanabaye uhagarariye abashinzwe kwigisha indirimbo(Chef des Maitres de chants.

Yakomereje amashuri muri Kaminuza y’ubuhinzi n’ubworozi ISAE BUSOGO(uko yitwaga kera), aho yakomeje kuba umwarimu w’indirimbo n’umuhanzi w’indirimbo zisanzwe zivuga ku buzima bwa buri munsi.

Kugeza uyu munsi Hafashimana Jean Claude arabarizwa muri Korali Ishema Ryacu aho ashinzwe ibitaramo.



Related post

Leave a Reply

Your email address will not be published.