Cardinal Kambanda yagizwe umuyobozi wa Bazilika yitiriwe Mutagatifu Sixte i Roma

 Cardinal Kambanda yagizwe umuyobozi wa Bazilika yitiriwe Mutagatifu Sixte i Roma

Cardinal Antoine Kambanda usanzwe ari Arikiyepiskopi wa Kigali, yahawe ku mugaragaro ubuyobozi bwa Bazilika yitiriwe Mutagatifu Sixte y’i Roma, yashinzwe ubwo yatorerwaga kuba Karidinali.

Ubusanzwe muri Kiliziya Gatolika ya Roma, ugizwe Karidinali ahabwa ubutumwa bwo kuyobora imwe muri Kiliziya za diyosezi ya Roma, Papa abereye umwepiskopi. Ntabwo bimubuza gukomeza ubutumwa aba asanganywe mu gihugu cye cyangwa ahandi.

Ni muri urwo rwego Cardinal Kambanda yagizwe umuyobozi (titulaire) wa Bazilika yitiriwe Mutagatifu Sixte, ashyikirizwa inshingano mu muhango wabaye kuri iki Cyumweru tariki 26 Kamena 2022, muri iyi kiliziya imenyerewe nka bazilika nto ya San Sisto Vecchio.

Ni mu gitambo cya misa cyayobowe Karidinali Kambanda ubwe. Cyitabiriwe n’Abanyarwanda bari bagiye kwifatanya na we.

Nyuma y’Indirimbo Itangira yaririmbwe mu Kinyarwanda hamwe n’indamutso itangira Igitambo cya Misa, hasomwe ibaruwa ya Papa Francis igira Cardinal Kambanda, uwaragijwe iyi bazilika nto yitiriwe mutagatifu Sixte y’i Roma.

Ni Misa yakoreshejwemo Ikinyarwanda cyane, kuko uretse indirimbo itangira yari mu rurimi rw’Ikinyarwanda, isomo rya mbere na ryo ryasomwe mu Kinyarwanda nk’uko Kinyamateka yabyanditse.

Hakurikiyeho Ivanjili n’Inyigisho yatanzwe na Cardinal Kambanda mu rurimi rw’Igitaliyani.

“Mu nyigisho ye yagarutse ku bumwe, ubufatanye n’ubutumwa bikwiye kuranga abakristu nk’uko Kiliziya idahwema kubyibutsa muri iki gihe”, nk’uko byatangajwe.

Muri iki gitambo cya Misa hari abandi bifatanyije na Cardinal Kambanda barimo Cardinal Juseppe Bertello, Musenyeri Anselmo Guido wahoze ari Intumwa ya Papa mu Rwanda, Musenyeri Rugambwa Protais ukomoka muri Tanzania akaba n’Umunyamabanga muri Propaganda fide, ishami rishinzwe iyogezabutumwa rya Kiliziya Gatolika.

Hari kandi Musenyeri Salvatore Niciteretse, Umwepiskopi wa Bururi mu Burundi; n’abapadiri biganjemo abanyarwanda bakorera ubutumwa i Roma, hamwe n’abalayiki bahatuye barimo n’urubyiruko ruhiga.

Kugirwa Umuyobozi w’imwe muri Kiliziya ziri i Roma, ni igikorwa kigamije kugaragaza ubumwe bwihariye Karidinali afitanye na Papa, nk’Umwepiskopi wa Roma. Bigaragaza ku buryo bufatika ko ari umwungiriza wa hafi wa Papa.

Uyu mwanya Cardinal Kambanda yahawe wahoranye Cardinal Marian Franciszek Jaworski ukomoka muri Ukraine, witabye Imana ku wa 5 Nzeri 2020. Yahoze ari umuntu wa hafi wa Papa Yohani Pawulo II.

Cardinal Kambanda yigishije mu Gitaliyani, ariko amwe mu masomo n’indirimbo byari mu Kinyarwanda

Cardinal Kambanda ni we wayoboye iki gitambo cya Misa

Iyi bazilika yaragijwe Cardinal Kambanda nk’umuyobozi wayo

Abanyarwanda baba mu Butaliyani bitabiriye uyu muhango

Abihayimana baba mu Butaliyani bitabiriye iki gitambo cya Misa, bifataya na Cardinal Kambanda mu byishimo

Protais MBARUSHIMANA

http://www.nkundagospel.rw

Related post

1 Comment

  • Byiza cyane

Leave a Reply

Your email address will not be published.