Chorale de Kigali igiye guha abakunzi bayo bose Noheli n’ubunani

 Chorale de Kigali igiye guha abakunzi bayo bose Noheli n’ubunani

Chorale de Kigali izwiho gukora udushya twinshi kuri iyi nshuro igiye guha abakunzi bayo bose, Abanyarwanda ndetse n’abarutembera Noheli ndetse n’ubunani ibinyujije mu gitaramo kizwi nka Christmas Carols Concert kigiye kuba ku nshuro ya 9.

Mu kiganiro umuyobozi wayo, bwana Albert Nzayisenga, yagiranye n’umunyamakuru wa Nkunda gospel yasobanuye byimbitse ibirebana n’iki gitaramo kandi ashumangira ko nta muntu n’umwe uhejwe.

Dore ikiganiro kirambuye twagiranye:

Protais: Mwaramutse bwana perezida wa Chorale de Kigali?

Albert: Mwaramutseho neza bwana Protais?

Protais: Yego turashima Nyagasani utumye tugiye gusoza umwaka tugihumeka ndetse by’umwihariko tukazitabira kiriya gitaramo cya Christmas Carols Concert mwadutumiyemo.

Albert: Hahahaha!! Murakoze cyane.

Bwana Albert Nzayisenga, Perezida wa Chorale de Kigali

Protais: Hanyuma rero ndagira ngo tuganire kuri iki gitaramo kugira ngo ibibazo bitandukanye abakunzi banyu bafite babisubizwe.Twabonye udupapuro tuzwi nka flayers tuvuga ko mufite iki gitaramo, ubundi mu by’ukuri iki gitaramo ku bantu batagize amahirwe yo gusoma kuri turiya dupapuro, kizaba ryari,kizabera hehe ndetse kigamije iki?

Albert: Iki gitaramo kizwi nka Christmas Carols Concert, kigiye kuba ku nshuro ya 9, kizaba Ku wa 19 Ukuboza 2021, kibere muri Kigali Arena.Iki gitaramo kiba kigamije kwinjiza  abakunzi ba Chorale de Kigali ,abanyarwanda ndetse n’abarutuye bose cyangwa abarutembera mu byishimo bya Noheli.

Protais: Ndumva mufite intego nziza pe! Hanyuma kujya muri iki gitaramo bisaba iki?

Albert: Kwinjira mu Gitaramo bisaba kubishakira akanya no kuzigama amafaranga  ya Tike iba idahenze cyane, kuko dukora ku buryo abantu bose mu bushobozi bwabo bibonamo. Mu by’ukuri ikigamijwe ni ugusangira ibyishimo bya Noheli na Bonane n’abakunzi bacu.

Protais: Hanyuma abakunzi banyu bitege iki muri iki gitaramo?

Albert: Abakunzi bacu bitege igitaramo kirimo umuziki uryoheye amatwi, urimo ubuhanga n’uburyohe bwo ku rundi rwego. Indirimbo zinyuranye zo hirya no hino ku Isi ndetse no mu binyejana bitandukanye zizaba ziri kubica bigacika nk’uko bisanzwe. Turifuza kubibagiza akababaro icyorezo cya Covid19 cyabateye.

Protais: Agashya karimo ni akahe rero?

Albert: Iki gitaramo gihorana udushya. Iyo uje uhita ufata umwanzuro wo kwitabira igikurikiraho. Abakunzi bacu batwitege nta gahunda yo kubatenguha mu dushya twabamenyereje. Nibitegure ko na none Chorale de Kigali izabakora ku mutima.

Protais: Usibye Chorale de Kigali haba hari abandi bazaririmba muri iki gitaramo?

Albert: CCC ni umwihariko wacu twenyine. Ni yo  mpano tugenera abakunzi bacu. Urumva ko impano iba nziza iyo nyirayo nyirizina ayihaye uwo igenewe. Ni yo gahunda yacu ku bakunzi bacu.

Protais: Ndumva abakunzi banyu mubafitiye gahunda nziza ndetse Chorale de Kigali ibyo mukora byose mubikora kinyamwuga. Ibi binteye kubabaza igihe iyi chorale yatangiriye gukora uyu murimo wo kuririmba?

Albert: Chorale de Kigali ibaye Ubukombe kuko yatangiye uyu murimo mu mwaka w’ 1966.

Protais: Yego ko! Ndumva yaratangiye kera cyane pe! Kugeza ubu ifite abaririmbyi bangahe?

Albert: Ubu turi abaririmbyi bagera ku 150.

Protais: Mumaze gukora indirimbo zingahe?

Albert: Ntibyatworohera kurondora indirimbo zose dore ko zamamaye imihanda yose cyane cyane muri Kiliziya Gatolika. Icyakora zimwe twe n’abatubanjirije twazishyize mu mizingo (album) zigera kuri 13 itunganyije mu majwi gusa (audio) ndetse hakaba n’indirimbo zacu zagaragaye mu mashusho yasohotse mu bitaramo twagiye dukora. Ubu kandi twatangiye gahunda yo kuzandika no kuzishyira mu bubiko mu buryo bw’ikoranabuhanga. Bitarenze Nyakanga 2022 tuzaba dushobora gusubiza iki kibazo mu buryo bwegereye ukuri. Erega Chorale de Kigali ni nk’uruganda rw’indirimbo.

Protais: Mu myaka itanu iri imbere mufite iyihe ntego?

Albert: Mu myaka itanu iri imbere duffite intego yo gukomeza kugira umuryango uhamye mu Rwanda no mu mahanga, guteza imbere muzika yanditse no kuyimenyekanisha cyane cyane mu bakiri bato.

Protais: Ni ukuri ndumva mufite icyerekezo cyiza, mwakagombye kubera andi ma chorale icyitegererezo. Mu gusoza ikiganiro cyacu ni iki mwabwira andi ma Chorale muri rusange?

Albert:Turabifuriza Noheli nziza n’Umwaka mushya muhire wa 2022. Imana izakomeze kugirira neza twe dukora kandi twitangira  umurimo wo kuririmba. Turabifuriza kandi gukomeza gutwaza bakarushaho gutera imbere muri uyu muhamagaro.

Protais: Mubaye hari icyo mwifuza kuvuga tutigeze tubabazaho muri iki kiganiro muhawe umwanya.

Albert:Turashimira Leta y’u Rwanda yakoze ibishoboka  byose ngo Covid19 igabanuke ku rugero tubona. Ni ibyishimo kuba ubu noneho dushobora kongera gutaramana n’abakunzi bacu. Bityo rero, turashishikariza abantu bose gukomeza kwitwararika ku mabwiriza ya Minisiteri y’ubuzima agamije guhashya iki cyorezo. Iherezo tuzatsinda, dufatanyije.

Protais: Murakoze bwana perezida kandi tubifurije kuzagira igitaramo cyiza ndetse n’umwaka mushya muhire wa 2022.

Albert: Mu by’ukuri mu izina rya Chorale de Kigali turashimira Nkunda Gospel namwe Nyagasani akomeze kubakomereza amaboko muri uyu murimo utoroshye kandi namwe muzagire umwaka mushya muhire wa 2022.

Related post

Leave a Reply

Your email address will not be published.