Chorale Saint Paul Kicukiro yo kwitega cyane muri iyi minsi igiye gushyira hanze Album yayo ya kabiri iriho indirimbo 10

 Chorale Saint Paul Kicukiro yo kwitega cyane muri iyi minsi igiye gushyira hanze Album yayo ya kabiri iriho indirimbo 10

Chorale Saint Paul ikorera ubutumwa muri Paroisse Gatolika ya Kicukiro yatangaje ko igiye gushyira hanze umuzingo (Album) wa kabiri uzaba ugizwe n’indirimbo 10 zirimo n’iyo baheruka gushyira hanze vuba bise Mariya Ni Umubyeyi w’Abakene imaze iminsi itandatu igiye hanze.

Mu kiganiro NIZEYIMANA NYITURIKI Denys uyobora iyi chorale yagiranye na Nkundagospel kuri uyu wa 13 Mata 2022, yagarutse kuri iyi Album nshya ndetse no ku ndirimbo yabo iherutse kujya hanze. NIZEYIMANA yavuze ko Chorale Saint Paul nk’abandi bahanzi bose yakomwe mu nkokora n’icyorezo cya Covid-19 mu bikorwa yari yarateganyije gusa ko kuri ubu igarukanye ingufu mu kogeza ubutumwa bwiza bukagera kure cyane binjyuze mu ndirimbo zisingiza Imana. Yagarutse kuri ‘Album’ yabo igiye kujya hanze ndetse ko ari kimwe muri byinshi bateguye mu minsi iri imbere.
Yagize ati: “Ubu ngubu ejo hazasohoka ‘Album’ iriho indirimbo 10 za ‘audio’… Hanyuma ku Cyumweru gikurikiyeho hahite haza n’amashusho. Ariko iyo ‘Album’ twakoze urebye ni nka ‘futuring’ n’umupadiri Dr NYOMBAYIRE Faustin w’i Byumba”.


Abajijwe ku ndirimbo nshya baherutse gushyira hanze bise Mariya Ni Umubyeyi w’Abakene, Perezida wa Chorale Saint Paul yasobonuye ubutumwa buyikubiyemo ndetse n’abo bayituye. Yagize ati: “Umukene baba bavuga si umuntu ukennye ku mafaranga ubundi. [Ni] umuntu ufite ubukene , umuntu usonzeye ijuru, ubukene bwo ku mutima. Indirimbo iravuga ngo Mariya ni umubyeyi w’abakene kandi akaba n’umwamikazi w’amahoro… Muramenye ko Mariya twamuhawe kandi twamuherewe ahakomeye. Ahakomeye turimo kugeza ubu ngubu rero, Bikira Mariya ni umubyeyi wacu kugira ngo tubashe kuhatambukana umucyo”. NIZEYIMANA asoza ashimira abakunzi babo ku musanzu w’ibitekerezo babaha ndetse anabizeza byinshi biri imbere babategurira.

Chorale Saint Paul Kicukiro ibarizwa muri Paroisse Gatolika ya Kicukiro mu mugi wa Kigali ndetse iteganya no kwagurira umurimo wayo nk’ibitaramo hirya no hino mu gihugu. Yatangiye gukora mu mwaka wa 2009 ariko itangira gukora ibitaramo muri 2017. Kuri ubu, imaze gushyira hanze indirimbo zigera kuri eshanu mu majwi n’amashusho n’izindi nyinshi cyane ziri mu buryo bw’amajwi zose hamwe ziri kuri ‘Album’ ya mbere n’iya kabiri igiye gusohoka zikaba ziboneka kuri shene yayo ya YouTube.

Chorale Saint Paul Kicukiro iteganya gusubukura ibitaramo hirya no hino
NIZEYIMANA NYITURIKI Denys ni Perezida WA Chorale Saint Paul Kicukuro
Reba indirimbo Mariya Ni Umubyeyi w’Abakene

Related post

Leave a Reply

Your email address will not be published.