Dore intego eshanu z’ubuzima bw’abantu ku isi mu mboni za Pst. Rick Warren

 Dore intego eshanu z’ubuzima bw’abantu ku isi mu mboni za Pst. Rick Warren

Léonidas MUHIRE

Kuri benshi mu buzima icy’ibanze ni ukububamo wagira umugisha bukaguhira. Umuntu ashobora kumva ko ariho gusa kuko yumva ari muzima akumva biramunyuze ariko si kenshi dutekereza ku ntego z’ubuzima twahawe ngo tunarebe niba turi mu murongo uboneye. Ese koko hari intego z’ubuzima twahawe? Haba hari icyo Imana yagennye ko tugomba gukoresha ubuzima twahawe se? Mu rugendo rw’ubuzima dusangiye twese rwuje urusobe rw’ibitwizihira n’ibidushavuza, Umwanditsi Pasiteri Rick Warren araduhishurira intego eshanu z’ubuzima twahawe mu buryo bwa gikristu.

Iyo umuntu abayeho ubuzima bufite intego yunguka ibisobanuro bya bimwe mu biranga imibereho y’abantu ya buri munsi. Amenya kubona icyubahiro cy’Imana ahantu hose kandi akongera urukundo akunda abandi. Binamufasha kuberaho abandi ndetse no kwiringira ubugingo buhoraho. Ngizi intego eshanu twashyiriweho ku isi.

1.Gusenga: Intego ya mbere ni ugusenga kuzana umunezero ku Mana. Gusenga Imana no kuyisingiza ntibibaho gusa iyo uri mu materaniro ahubwo no mu buzima busanzwe aho ariho hose iyo umuntu asenze abikuye ku mutima binyura Imana kandi bikayishimisha. Ni intego y’ibanze y’ubuzima twahawe ngo dushimishe Imana tuyisingiza.

2. Gukunda nta bwikunde umuryango w’Imana: Intego ya kabiri y’ubuzima bwawe ni ugukunda nta bwikunde abo mu muryango w’Imana. Imana yaturemye kugira ngo tube umwe nk’abagize umuryango mu buryo bw’umwuka dukundana kandi twubahana. Nk’abizera turi abavandimwe ku bandi bizera bose haba ab’ubu n’igihe kizaza. Mu gukunda umuryango w’Imana uziga ubuhanga bw’ingenzi bwo gukunda nta bwikunde. Gukunda bitarangwa n’ubwikunde bisobanura gukunda abandi, n’ubwo bigoye kubikora nk’igihe hari abatatwitwayeho neza cyangwa bakeneye byinshi kuri twe, ntibikaduce intege kuko nabo bari mu muryango w’Imana kandi urukundo rwacu rutaryarya kuri bo nirwo ruzababatura.

3.Guhinduka dusa nka Yesu: Intego ya gatatu y’ubuzima twahawe hano ku isi, ni uguhinduka tugasa na Yesu twigana imigenzereze ye. Iyi ntego ntidutuma kujya ku musaraba nk’uko Yesu yabambwe ahubwo ni ukumenya kwihanagana no gukomera mu bigeragezo ntiducike intege kuko buri gihe ukuri kurimo kwizera gutsinda ikinyoma. Yesu yanyuze muri byinshi bigoye kugira ngo aducungure, natwe rero dufite umukoro wo gusa na we imbere y’abatubona kugira ngo dukomeze abandi dushize amanga mu bitugerageza.

4.Gukorera abandi, Imana ishaka ko tuyikorera kandi tukaba n’ abakozi b’abandi: Iyi niyo ntego ya kane y’ubuzima bwacu. Mu buryo Imana yaturemye , gukorera abandi ni umwihariko wa buri muntu. Hari byinshi buri wese yihariyeho kandi azi gukora neza kurusha abandi; hari byinshi biduha umwihariko w’abo turibo. Birya rero nibwo bushobozi buri wese afite bwo gufashisha abandi ibyo ashoboye bo badafite. Icyo Imana yita umurimo, si ivugabutumwa gusa kuko kumenya kuvura kwawe, guhinga bikera, gushushanya, kuyobora n’ibindi byinshi kuri buri muntu iyo tubikoze neza bifasha abandi kandi intego twaremewe ni iyo rwose.

5.Ubutumwa. Intego ya gatanu y’ubuzima bwacu ni ubutumwa. N’ubwo umurimo wawe ari gukorana n’abandi bizera, ubutumwa bwawe ni umurimo wawe ku batizera. Imana ishaka ko dukwirakwiza urukundo rwayo, icyubahiro cyayo, n’amasezerano y’ubugingo bw’iteka no ku batizera, binyuze mu butumwa bwawe bwihariye n’ubutumwa busangiwe. Ibyo twamenye byose n’ibyo twaciyemo si umwihariko w’urukundo rw’Imana kuri twe gusa ahubwo ni uburyo bwiza bwo kubatura abandi kuko nicyo twabimenyeye. Mu materaniro turabikora rwose ariko umwihariko wawe nko kumenya kuganira, kwita ku bababaye, gucisha bugufi se n’ibindi hari uwo bizabera ubutumwa bwiza bumuhindura kurusha ibyabereye mu materaniro. Buri wese rero afite ubutumwa bwe.

Ibi twagarutseho byose ni impine y’igitabo kitwa ‘Purpose Driven Life’ cyanditswe na Pasiteri Rick Warren, Ushobora kugishaka ukakisomera ku buryo burambuye gisomwa mu gihe cy’iminsi 40.

Related post

Leave a Reply

Your email address will not be published. Required fields are marked *