Finland: Insinzi ku mudepite w’umukristu waregwaga kunenga ubutinganyi akoresheje bibiliya

 Finland: Insinzi ku mudepite w’umukristu waregwaga kunenga ubutinganyi akoresheje bibiliya

Muri iki Cyumweru kirangiye ni bwo Urukiko rw’Akarere rwa Helsinki mu gihugu cya Finland rwahanaguyeho icyaha cyo kwibasira ubutinganyi yifashishije bibiliya madamu Päivi Räsänen usanzwe ari umudepite mu nteko ishinga amategeko y’iki gihugu uva mu Ishyaka rya Gikristu ndetse akaba yaranahoze ari minisitiri w’Umutekano. Uyu mukristukazi wareganwaga na Musenyeri Juhana Pohjola wamufashije gutambutsa bimwe mu byo yaregwaga, urukiko rwanzuye ko rubahanaguyeho ibyaha byose bari bakurikiranyweho byo kwifashisha bibiliya banenga ubutinganyi kuko kugendera ku byanditswe byera/bitagatifu urukiko rudafite ububasha bwo kubyita icyaha mu buryo bw’amategeko.

Iyi nkuru yasamiwe hejuru n’ibitangazamakuru by’ingeri zose ahanini bitewe no kuba rwari urubanza ruhanzwe amaso hagati ya leta n’imyemerere nyobokamana, twe twayisomye kuri ‘Reuters’ y’Abongereza. Ivuga ko uru rubanza nta rundi bisa rwigeze ruba muri Finiland. Urukiko rwagombaga gusuzumana ubushishozi rukumenya niba kwifashisha imirongo yo muri bibiliya bishobora gufatwa nk’icyaha gihanwa n’amategeko kandi kitabangamiye uburenganzira bw’ibanze mu gutanga ibitekerezo no kurengera rubanda muri rusange.


Madamu Päivi Räsänen usanzwe afite impamyabumenyi ya kaminuza mu by’ubuvuzi, yari akurikiranyweho ibyaha byo kwikoma abaryamana n’abo bahuje ibitsina aho yavuze ko kuryamana kw’abahuje igitsina ari “ikibazo cyo kwivumbagatanya mu buryo bw’imikurire” abinyujije mu nyandiko yashyize kuri murandasi muri 2004. Mu mwaka wa 2019 yongeye kwifashisha urukuta rwe rwa Twitter avuga ko ari icyaha cy’urukozasoni nsetse anabikoraho ikiganiro cyatambutse kuri Radio.

Musenyeri Juhana bareganwaga, we yari akurikiranyweho icyaha cyo gushyira hanze iyo nyandiko ya madamu Räsänen yo muri 2004 bose bakaba baraburanaga bavuga ko bibiliya itemera ubutinganyi ari nayo mpamvu babwamaganye. Urukiko rwanzuye ko rudafite ububasha bwo kwita imirongo ya bibiliya icyaha cyahanwa n’amategeko bityo rubagira abere ariko rutegeka ko hishyurwa amagarama y’urubanza arenga ibihumbi 60 by’ama-Euro ni ukuvuga arenga gato ibihumbi 68 mu Manyarwanda.

Nyuma y’urubanza madamu Räsänen yagaragaje kwishimira instinzi ye y’ubukritu ndetse ashimira n’abantu bamusengeye.

Umuyobozi mukuru w’umuryango nyobokamana, ADF International wari uhagarariye madam Räsänen mu rubanza, bwana Paul Coleman nyuma y’uru rubanza yatangije ko ari intsinzi ikomeye ku bwisanzure bwo gutanga ibitekerezo mu Burayi. Ati: “Urukiko rwabisobanuye neza ko rudafite ububasha bwo gusobanura imyemerere ya bibiliya. Kandi biranazwi ko icyagombaga gusobanuka neza ari ubushobozi bwo kwerekana imyizerere ya gikristu ku miterere y’umugabo n’umugore, ishyingiranwa ndetse n’imibonano mpuzabitsina y’abantu nk’ishingiro ry’ukwemera kwa gikristu kandi bigomba kurindwa”.

Related post

Leave a Reply

Your email address will not be published.