Fleury & Janet:Ntibishoboka ko tugira icyo dukora tutabanje isengesho kuko byose ni Imana ibigena

 Fleury & Janet:Ntibishoboka ko tugira icyo dukora tutabanje isengesho kuko byose ni Imana ibigena

Ndayirukiye Fleury uzwi nka Fleury Legend n’umufasha we Bahavu Janet bamaze ukwezi bibarutse imfura yabo Amora bavuze uburyo badashobora kubaho no kugira icyo bakora batabanje isengesho imbere.

Fleury Legend amaze kubaka izina mu gutunganya amashusho y’indirimbo nyinshi zitandukanye zo mu muziki uhimbaza Imana harimo nka ‘Narakijijwe ya James na Daniella, Yesu Arakora ya Ben na Chance n’izindi nyinshi naho umufasha we Bahavu Janet USANASE  yubatse izina muri Cinema Nyarwanda kubwa filimi yagiye akinamo zitandukanye zigakundwa harimo nka filime ye bwite ‘Impanga Series’ ndetse n’zindi.

Mu kiganiro uyu muryango wagiranye na Nkundagospel batinze cyane ku buzima babanamo n’Imana bavuga uko  buri kimwe bagiye gukora babanza isengesho imbere. 

Mu kiganiro cyamaze hafi iminota 14 ku murongo wa Telephone, umutware wuyu muryango, Fleury Legend yatangiye atubwira amakuru y’umuryango adusangiza ibyishimo barimo byo kuba Imana yarabahaye umwana, yagize ati “Ubu ndi Papa, Papa Amora. Turashima Imana cyane ko ariyo itanga urubyaro, iyi ni impano kandi ni igitangaza”

Yakomeje adusangiza amateka ye yo mu buto nuko we n’umufasha we babanye n’Imana kugeza uyu munsi.

Yagize ati “Njye na Madam twembi twagize amahirwe yo gukurira mu miryango yadutozaga inzira yo gusenga”.  Fleury akomeza  yivugira ko yakuriye mu itorero rya Pantekote i Burundi icyo twakita ADEPR y’inaha akaza kubatizwa ku myaka 11 ubwo yari ari gusoza amashuri ye abanza. 

Nubwo byari bimeze bityo kuri iyo myaka, Fleury akomeza avuga ko bitaje gukomeza muri uwo mujyo kuko ageze mu mashuri yisumbuye ubwo yaranageze mu myaka y’ubusore bwe yabaye nkuwusubira inyuma muby’agakiza no gusenga ariko ntibyarangirira aho ndetse ntiyanatindayo  ahubwo akaza gukomeza ya nzira nziza ya mbere, icyo gihe nibwo yavaga mu gihugu cya kavukire (Burundi)  agera mu Rwanda aho yakomeje kuba imbere y’Imana no gusenga. 

Akigera i Kigali, Fleaury yari yabanje kujya ateranira mu itorero rya CLA (Christian Life Assembly) riherereye Nyarutarama ariko nyuma yo guhura nuwaje kuba umugore ubu baje gukomeza guteranira mu itorero Bahavu yasengeragamo, itorero rya Zion Temple riyoborwa na Apostle Dr Paul Gitwaza.

Mbere yuko Fleury Legend amenyana n’umufasha we Bahavu Janet bari babanje guhurira  bwa mbere ku Nteko y’ururimi n’umuco (RALC) bahahuriye kubw’umushinga wa Filimi warugiye kubahuza umwe ari umuyobozi (Fleury) undi ari umukinnyi (Janet). 

Kubera ubu buzima bwo gusenga babagamo, twaje kubabaza niba gukundana no kugera aho bemeranya kubana niba hari ijwi ry’ubuhanuzi , inzozi cyangwa se ikindi kintu cyabibemeje neza ko bagomba kubana nk’umugabo n’umugore, badusubije bagira bati “Nta jwi twumvise, twebwe twarakundanye, urukundo rutuma dufata uwo mwanzuro, Imana nayo irawushyigikira”

Urukundo rwa Ndayikengurukiye Fleury[Legend] na Bahavu Jeannette rwatangiye ku mugaragaro mu mpera za 2020, tariki ya 17 Nyakanga 2020 nibwo yamwambitse impeta ya fiançailles, ni mu gihe tariki ya 17 Ukuboza 2020 basezeranye imbere y’amategeko n’aho ubukwe bwabo bukaba bwarabaye ku wa Gatandatu tariki ya 27 Gashyantare 2021.

Fleury na Janey baje kuba umugisha wa benshi kuko kugeza uyu munsi batangiye ibiganiro bitandukanye ku muyoboro wabo wa YouTube (Fleury & Janet) aho batanga impuguro, inama ndetse n’amasomo  kuby’umuryango n’ubuzima muri rusange.

Kimwe mu biganiro bakoze ku munsi wa Noheli bari kumwe n’imfura yabo, Amora.

Ibihe byiza Bahavu Janet agirira mu materaniro
Ni umuryango uhorana ibyishimo n’akanyamuneza

Related post

Leave a Reply

Your email address will not be published. Required fields are marked *