Gloire Nkundayesu yasohoye indirimbo nshya y’amashimwe yashibutse ku ishavu

 Gloire Nkundayesu yasohoye indirimbo nshya y’amashimwe yashibutse ku ishavu

Umuhanzi nyarwanda uririmba indirimbo zo kuramya no guhimbaza Imana, ariko ubarizwa muri Canada, Gloire Nkundayesu yasohoye indirimbo nshya yise Data arakora yahimbye nyuma yo kubura umwe mu babyeyi b’umufasha we bagacika intege ariko Imana ikabasubizamo imbaraga.

Mu kiganiro yagiranye na Nkundagospel, umuramyi Gloire Nkundayesu yagize ati:

“Iyi ndirimbo yitwa DATA ARAKORA, nayihawe mu bihe byo gusenga nyuma yo kubura umubyewi ubyara madamu, mu bihe byo gusenga twagize nyuma yaho nahawe iyi message ivuga ngo Data arakora, haribyo yagiye adukorera, bityo ntitugacibwe intege n’ibyago biri munzira turimo tugana i siyoni, itanga ubuzima ninayo yabwisubiza, ariko kubakiriho tugihumeka iracyakora, irashobora gusubiza ibyifuzo byacu, kuko yagiye ikora byinshi byahise, n’ibindi izabikora tubizane imbere yayo n’umutima wizeye kandi ukiranutse.”

Gloire Nkundayesu yasabye abakunda Imana bose kuzirikana ubutumwa buri muri iyi ndirimbo. Yagize ati:

“Uzayumva wese nifuza ko icyambere ajya mu mwuka wo kuzana ibibazo bye imbere y’Imana, yamara kubihageza akizera ko binashubijwe, hanyuma akirekura akayibyinira, akayitambira, akayibyinira nka kwa kundi Dawidi yabigenje isanduku y’Imana igarutse, agatamba umwitero ukagwa.” Yakomeje agira ati:

“Ikindi ufashijwe na yo wese akadutera inkunga ikomeye ariyo kuyisangiza abandi bose nko kuri za WhatsApp, Facebook, Instagram, Tiktok n’ahandi, kandi na buri wese uzasoma iyi nkuru musabye inkunga y’amasengesho hamwe no gusangiza abandi iyi ndirimbo kugira ngo umurimo Imana yadukoresheje uzagere kubo yateguye ko uzageraho namwe mubigize mo uruhare.”

Umuramyi Gloire Nkundayesu yatangiriye uyu murimo mu Karere ka Musanze, kuri ADEPR Muhoza nyuma ajya kwiga mu gihugu cy’ubushinwa, akaba yarizeyo amashanyarazi (Electrical engineering), akaba ari nabyo akora na magingo aya.

Uyu muramyi yageze mu Bushinwa akomeza guko umurimo w’Imana muri Beijing International Christian Fellowship(BICF), nyuma yo kurangiza amasomo yagarutse mu Rwanda ahakorera indirimbo yise “Icyubahiro” ishishikariza abantu guhimbaza Imana, bayiha icyubahiro n’ikuzo ryayo.

Yatangiye kuririmba akiri muto mukizwi nka ecole de dimanche. Kuri ADEPR Muhoza yaririmbaga muri Chorale Intumwa.

Nyuma y’iyindirimbo afite umushinga w’izindi ndirimbo 6 azasohora muri uyu mwaka wa 2022.

Uyu muhanzi yabwiye Nkundagospel ko byose abikorera gutanga ubutumwa. Yagize ati:

“Intego yanjye ni ukuvuga ubutumwa igihe cyose nzaba ngihumeka, niyo mpamvu nsenga buri munsi ngo Imana inyagurire imbago.” Yakomeje ahamya ko ubu ari gukorera Imana muri Canada, nubwo yabanje kugorwa no kubona aho gusengera. Yagize ati:

“Ngeze inaha muri Canada byabanje kungora kubona aho nsengera, nagiye mu nsengero zinyuranye nshaka aho umwuka anyemerera kuhakorera umurimo.Ubu nsengera muri Eglise Evangelique. Gukorera Imana rero ni inshingano kuri njye.Igihe cyose ntari kubikora mbura amahoro muri njye. Inaha byabanje kungora kuhamenyera no gutuza kuburyo nabasha kwandika indirimbo, ariko ishyaka ry’umurimo ryakomeje kundya munda, ariko muri uyumwaka Imana yaciye imigozi mu mubiri no mu bugingo kugira ngo mbone uko nyikorera, ninabwo nabashije kujya muri studio gufata amajwi y’iyindirimbo.”

Mfite indirimbo nyinshi, izimaze gukorerwa amashusho ni ebyiri, iyi nshya yitwa “DATA ARAKORA, na ICYUBAHIRO, mu gihe izatunganyijwe mu majwi gusa ari 16.

Amajwi y’iyi ndirimbo yatunganyijwe na River Studio (Sam), mu gihe amashusho yakozwe na Eliel Filmz.

Kanda hano urebe iyo ndirimbo

Protais MBARUSHIMANA

http://www.nkundagospel.rw

Related post

Leave a Reply

Your email address will not be published.