Indirimbo “Alleluia Ijambo ryawe” ya Hafashimana Jean Claude ikomeje gufasha abakristu benshi

 Indirimbo “Alleluia Ijambo ryawe” ya Hafashimana Jean Claude ikomeje gufasha abakristu benshi

Abakunzi b’indirimbo z’umuhanzi Ir Hafashimana Jean Claude bakomeje kugaragaza ko indirimbo ye yise “Alleluia Ijambo ryawe” ikomeje kugenda ibafasha ndetse bamwe bayise iy’ibihe byose.

Umwe mu bakunzi b’uyu muhanzi witwa Angelique Nyirahafashimana yagize ati:

” Iyi ndirimbo njye sinarondora uburyo ifasha ubugingo bwanjye. Nkunda uko itangira ivuga ngo Alleluia, ijambo ryawe Nyagasani ni ukuri n’ubugingo. Hahirwa abaryumva bakarizirikana, bakarikurikiza, bazabaho mu buzima bw’iteka.”

Claudine Batamuriza nawe yunze mu ijambo rya mugenzi we avuga ko afashwa n’amagambo yose ari muri iyi ndirimbo ariko cyane cyane amagambo aboneka mu gice cya kabiri n’icya gatatu agira ati:

“Ijambo ryawe Nyagasani riradufasha muri byose, ridutera imbaraga zo kugusingiza mu buzima bwacu bwose. Ijambo ryawe Nyagasani ni itara ritumurikira, rituma twizera ko uri Imana nyakuri, kandi ko tuzabana iteka.”

Uyu muhanzi Jean Claude Hafashimana yari aherutse gusohora album ye ya mbere yatuye abakristu bose muri rusange ariko by’umwihariko abiyambaza umubyeyi Bikiramariya.

Iyi album yiswe ‘Mwamikazi Wa Fatima’ igizwe n’indirimbo zirindwi zisingiza Imana, ndetse zimaze gukundwa n’abatari bake nkuko bigaragara kuri shene ya YouTube y’uyu muhanzi.

Usibye kandi gusohora album ye ya mbere, Hafashimana Jean Claude yanagize uruhari mu gutangiza Ishuri rya Muzika kuri Cathedrale ya Ruhengeri, dore ko ari nawe uhagarariye Equipe technique muri Paroisse Ruhengeri.

Mu kiganiro na Nkundagospel, Hafashimana Jean Claude yatangaje ko iyi album ye yamweretse isomo rikomeye. Yagize ati:

“Iyi album yanyeretse ko abantu banyotewe n’indirimbo zo gusingiza Imana intera ingufu zo gushyira ahagaragara no gutunganya izindi ndirimbo. Nabonye ko umuziki ukwiriye kutubera isoko y’ubukristu nyabwo ukatubera kandi isoko y’ubumwe nyabwo.”

Uyu muhanzi kandi ateganya gusohora indirimbo eshanu z’amajwi ndetse n’indirimbo imwe y’amashusho, muri uyu mwaka wa 2022, dore ko mu kiganiro yagiranye na Nkundagospel yavuze ko indirimbo 3 ziri muri studio kandi zirasohoka vuba.

Arateganya kandi gufatanya n’abandi bahanzi mu gutegura igitaramo Ngaruka Mwaka cya Korali Ishema Ryacu kizaba mu mpera z’uyu mwaka ndetse no gusoza igitabo cy’indirimbo ze yatangiye kwandika.

Mu gusoza iki kiganiro Hafashimana Jean Claude yasabye abakunzi be gukomeza kumushyigikira. Yagize ati:

“Ndasaba abakunzi banjye gukomeza kudushyigikira mu buryo bwose bushoboka bakurikirana ibihangano byacu kandi batega amatwi ubutumwa bubikubiyemo, batibagiwe no kutugira inama ngo turusheho kunoza ibyo dukora no gukora indirimbo nyinshi.”

Hafashimana Jean Claude ufite indirimbo zirenga mirongo ine avuga ko yatangiye umuziki afite imyaka itandatu. Yatangiye kuyobora korali yiga mu mwaka wa gatandatu w’amashuli abanza, ndetse aba na animateur w’indirimbo acyiga mu mashuli abanza.

Hafashimana Jean Claude yanogeje umuziki we ubwo yigaga mu Iseminari Nto Ya Mutagatifu Yohani Nkumba, Diocese Ruhengeri aho yabaye uwigisha indirimbo yiga mu mwaka wa 3 w’amashuli yisumbuye, ari nabwo yatangiye kujya ayobora indirimbo za Misa.

Yakomeje kwihugura muri muzika aho yakomereje mu I Seminari Nkuru I Rutongo aho yanabaye uhagarariye abashinzwe kwigisha indirimbo(Chef des Maitres de chants.)

Yakomereje amashuri muri Kaminuza y’ubuhinzi n’ubworozi ISAE BUSOGO(uko yitwaga kera), aho yakomeje kuba umwarimu w’indirimbo n’umuhanzi w’indirimbo zisanzwe zivuga ku buzima bwa buri munsi.

Kugeza uyu munsi Hafashimana Jean Claude arabarizwa muri Korali Ishema Ryacu aho ashinzwe ibitaramo.

Protais MBARUSHIMANA

http://www.nkundagospel.rw

Related post

1 Comment

  • Nishimiye cyane bikomeye uyu muhanzi tuziranye indirimbo ze nanjye ndazikunda cyane. Gusa nanone nishimiye iyi website NKUNDA GOSPEL nanjye niyumvamo impano mumfashije nanjye mwazankoresha ikiganoro mukamfasha kuzamuka. Mfite indirimbo 6 kuri YouTube channel (Uwayezu Donatien) hari 4. Nkaba niga muri kaminuza y’urwanda I Butare.
    Ndabashimiye mugihe ngutegereze igisunizo cyanyu cyiza. murakoze cyane.

Leave a Reply

Your email address will not be published.