“Intambara ya Ukraine n’Uburusiya ni nk’iya Gahini n’Abeli” – Papa Françis

 “Intambara ya Ukraine n’Uburusiya ni nk’iya Gahini n’Abeli” – Papa Françis

Umushumba mukuru wa kiliziya gaturika ku isi, Papa Françis yatangaje ko intambara ya Ukraine n’Uburusiya ayibona nk’intambara yo kwikunda kw’ikiremwamuntu, nkuko byagendekeye Gahini na Abeli baboneka mu gitabo cy’Itangiriro.

Papa Françis yabitangaje ubwo yari kuri televiziyo yo mu Butaliyani, mu kiganiro cyitwa ‘Che tempo che fa” ubwo yaganiraga n’umunyamakuru witwa Fabio Fazio.

Uyu mushumba wa kiliziya wabajijwe ku bintu bitandukanye, yageze kuntambara ya Ukraine n’ Uburusiya ayisanisha n’imizi yo kwikunda kw’ikiremwamuntu aho yabisanishije n’inkuru ya Gahini na Abeli ndetse n’inkuru y’iyubakwa ry’umunara w’i Babeli. Yagize ati:

“Intambara hagati y’abavandimwe yatangiye nyuma gato Imana ikirema umugore n’umugabo.” Yakomeje agira ati:

“Hari ikintu kimeze nk’urwango cyangwa amashyari no guhangana, icyo nicyo cyitwa intambara. Iyi niyo mpamvu intambara buri gihe cyose isenya.” Yakomeje atanga urugero ati:

“Guhinga, kurera abana, kwita ku muryango, kubaka umuryango mugari birubaka ariko iyo habaye intambara byose birasenyuka, murumva ko ikiremwamuntu cyisenya ubwacyo.”

Muri iki kiganiro kandi Papa Françis yabajijwe uko abigenza kugira ngo adaheranwa n’inkuru z’akababaro z’abantu banyuranye aba yakiriye maze asubiza ko kiliziya yose ibimufashamo.

Inkuru ya Gahini na Abeli iboneka mu gitabo cy’Itangiriro 4. Irimo ishyari Gahini yagiriye murumuna we Abeli, kubera ko Imana yakiriye ituro rye ariko ikagaya irya Gahini. Ibi byatumye Gahindi yica murumuna we.

Related post

Leave a Reply

Your email address will not be published. Required fields are marked *