Israel Mbonyi yagereranyije ibyakozwe mu gitaramo cya Rwanda Gospel Stars nk’ibyakozwe na Putin

 Israel Mbonyi yagereranyije ibyakozwe mu gitaramo cya Rwanda Gospel Stars nk’ibyakozwe na Putin

Umuhanzi ukomeye mu kuramya no guhimbaza Imana, unaherutse kwegukana igihembo gikuru mu irushanwa rya Rwanda Gospel Stars Live yatangaje ko ibyabaye muri icyo gitaramo byanenzwe na benshi bitaturutse ku bahanzi ngo kuko bo bari baje biteguye gukora umurimo w’Imana ariko basanga ibintu byadogereye.

Uyu muramyi yifashishije urubuga rwa Instagram yagereranyije ibyabereye muri Canal Olympia nk’ibiri kubera muri Ukraine bitewe na Perezida w’Uburusiya Putin, ndetse anavuga ko yumvise bavuga ngo n’ibyabereye mu gitaramo cya Rwanda Gospel Stars nabyo byatewe na Putin. Yagize ati:

“Abakomeje kumbaza kubyabereye muri Concert ya Rwanda Gospel Stars Live, nzi ko twebwe nk’abahanzi twari duhari kugira ngo dukore umurimo twahamagariwe naho ibijyanye n’imitegurire ntacyo mbiziho gusa narumvise ngo byose byatewe na Putin.”

Igitaramo cya Rwanda Gospel Stars Live cyabaye iciro ry’imigani kubera gutinda gutangira byanagera hagati gitangiye kigasubikwa hafi isaha yose kubera amanyanga yakozwe n’abagiteguye, kugeza ubwo umushyushyarugamba asabye abitabiriye icyo gitaramo kuba biganirira kuburyo bahise bazimya amatara bakajya gukemura ayo makimbirane.

Ku isaha ya 22:12 ubwo basabaga umuhanzi Theo Bosebabireba kujya ku rubyiniro ntibyabashije gukunda kuko abacuranzi banze kujya ku rubyiniro.Bakomeje gutsimbara bavuga ko batari bwongere gucuranga batarishyurwa, kugera ubwo bishyuwe hashize hafi isaha yose, ndetse abantu benshi bari bamaze kugenda, hasigaye urubyiruko gusa.

Amakuru twahawe n’umwe mubacungaga umutekano muri icyo gitaramo utifuje ko amazina ye atangazwa avuga ko umuyobozi wa Rwanda Gospel Stars, Bwana Aimable Nzizera yashatse guca inzira z’ibusamo ngo akwepe abamwishyuzaga ariko agasanga inzego z’umutekano ziryamiye amajanja zikamusaba kwishyura akemera gusinya sheki, nubwo benshi bakomeje gukeka ko itazigamiye.

Nyuma yo kwishyurwa abacuranzi bemeye kugaruka ku rubyiniro maze abahanzi barimo Aline Gahongayire, Gaby Kamanzi, Theo Bosebabireba, Serge Iyamuremye ndetse na Israel Mbonyi bararirimba abantu barishima ariko buri umwe asaba imbabazi.

Israel Mbonyi wegukanye iki gihembo gikuru cya miliyoni 7, nubwo hari abakomeje gukeka ko biri mu magambo gusa, yasabye imbabazi agira ati:

“Ndasaba imbabazi mu izina ry’abahanzi bose bari mu gikorwa cya Rwanda Gospel Stars Live, biriya byose mwabonye byabaye ntaruhare na rumwe abahanzi twabigizemo”.

Ubwo iki gitaramo cyarangiraga buri muhanzi wese yatangaje ko kugira ngo isura nziza y’umuziki nyarwanda wo kuramya no guhimbaza Imana igaruke bizatwara imbaraga nyinshi, dore ko ibyo byose byaberaga imbere ya Rose Muhando wasabwe kuririmba mbere y’abahanzi nyarwanda, nawe akabahima akiririmbira playback yasoza agahita ataha.

Mbere yuko iki gitaramo cya ‘Rwanda Gospel Stars Live’ gitangira, batanu bari bagize akanama nkemurampaka mu gikorwa basezereye rimwe ku munota wa nyuma wacyo.

Amakuru IGIHE yabonye ni uko abari bagize akanama nkemurampaka; Aimée Uwimana, Simon Kabera, Josue Shimwa, Mupende Gedeon na Pamela Mudakikwa basezeye ku munota wa nyuma kubera imitegurire y’iki gikorwa bahamya ko idafututse.

Aimée Uwimana wari uhagarariye aka kanama nkemurampaka yavuze ko bahisemo gusezera nyuma y’uko babonye imitegurire y’iki gikorwa ifite ikibazo.

Ati “Byatangiye tubona imitegurire ifite ikibazo ariko tukumva kimwe nk’abantu dufatanyije byazakemuka. Icyakora twagiye tubona ibimenyetso ko akazi baduhaye kazagorana ku mpamvu zitandukanye.”

Uyu mugabo uri mu bakomeye mu ndirimbo zo kuramya no guhimbaza Imana, yavuze ko kimwe mu byatumye basezera harimo n’uko bari baratangiye kubona amakuru y’uko igikorwa gishobora kutagenda uko byateguwe.

Ati “Kimwe mu byo badushyiriyeho ni ugutanga amanota y’uko abahanzi bitwaye ku rubyiniro, mu minsi ishize hagombaga kubaho repetition zari kubafasha kwitwara neza mu gitaramo. Ariko twajyaga kumva ngo abacuranzi bahagaritse repetition kuko batahembwe, ngo aho bakorera hafunze kuko batarishyurwa, mbega imyiteguro yari mibi cyane.”

Yongeyeho ko hari na bamwe mu bahanzi bagiye babatakira ko amafaranga bari bemerewe y’imyiteguro batigeze bayahabwa nk’uko byari mu masezerano bagiranye n’abategura iki gikorwa.

Uwimana yavuze ko uretse imyiteguro n’abagize akanama nkemurampaka batangiye gukemanga iby’ubushobozi bw’iki gikorwa, bibaza niba ahabuze amafaranga yo kwishyura abacuranzi n’abahanzi hazava ayo kwishyura abatsinze, bahitamo kwitandukanya na byo gutyo.

Ikindi Uwimana yavuze ko cyabababaje ni uko baje kumenya amakuru ko hari umwe mu bantu bategujwe guhemba umuhanzi wa mbere ndetse baranamumubwira mu gihe n’igikorwa nyiri izina kitaraba.

Ati “Ikindi navuga ni uko twagiye kumva ko hari umwe mu batanga ibihembo wabwiwe n’abari gutegura iki gikorwa umuhanzi ari bugihe nyamara uwari butsinde yari kugenwa n’akanama nkemurampaka.”

Abagize akanama nkemurampaka basezeye muri iki gikorwa ku munota wa nyuma kuko kigomba gusozwa kuri uyu wa 6 Werurwe 2022 mu gitaramo byitezwe ko kibera muri Canal Olympia ku i Rebero.

Aba basezeye nyuma ya Tonzi nawe uherutse gusezera iki gikorwa kubera ko hari ibyo atemeranyaga n’abagitegura.

Mu kiganiro na IGIHE Tonzi yavuze ko yahisemo gusezera muri iki gikorwa kuko hari ibyo atemeranyaga n’abagitegura, ati “Hari ibyo tutemeranyije njye mbivamo, ahubwo natunguwe nuko batubahirije icyifuzo cyanjye bagakomeza kunyamamaza nk’uzaba ahari.”

Tonzi yavuze ko imitegurire irimo akajagari no kudasobanuka neza y’iki gikorwa iri mu byatumye afata icyemezo cyo gusezera muri Rwanda Gospel Stars Live.

Related post

1 Comment

  • It was really bad but anyway may God forgive the ones behind the scenes and may restore whatever lost for His glory should be shown everywhere and in everything we do on daily basis 🙏 congrats to Israel 🤝

Leave a Reply

Your email address will not be published. Required fields are marked *