Israel Mbonyi yamaze intimba abakeka ko ibitaramo bye i Burundi byakongera kuzamo kidobya

 Israel Mbonyi yamaze intimba abakeka ko ibitaramo bye i Burundi byakongera kuzamo kidobya

Umuramyi Israel Mbonyi yakomoje ku mpungenge abantu bari bamufiteho zijyanye n’uko ibitaramo bye by’i Burundi bisobora kongera kuzamo kidobya nk’uko byagenze mu 2021.

Ni ikibazo uyu muhanzi yabajijwe ku wa 21 Ukuboza 2022 mu kiganiro yahuriyemo n’abanyamakuru mu myiteguro y’igitaramo yise “Icyambu Live Concert” cyizaba tariki 25 Ukuboza 2022.

Abanyamakuru baboneyeho umwanya wo kubaza ibibazo bijyanye n’ibitaramo bizabera i Burundi mu mpera z’uyu mwaka ndetse no mu ntangiriro za 2023.

Israel Mbonyi yavuze ko we nk’umuhanzi yiteguye kujya gutaramira i Burundi mu gihe byaba bigenze neza kandi kugenda neza ari ikintu afitiye icyizere, icyakora ahamya ko mu gihe imitegurire itaba imeze neza nyine atari we byaba biturutseho.

Ati “ Ndi umuhanzi ntabwo ndi mu bategura ibitaramo, gusa kugeza ubu ntakibazo na kimwe gihari cyatuma igitaramo gihagarara, bitanakunze nabwo ntakibazo nategereza igihe bizakunda nkataramira bene data b’i Burundi.”

Ibi bitaramo bya Israel Mbonyi biri gutegurwa i Burundi biteganyijwe ko bizaba ku wa 30 Ukuboza 2022 no ku wa 1 Mutarama 2023 byose bikazabera ahitwa Zion Beach.

Igitaramo cyo ku wa 30 Ukuboza 2022 byitezwe ko kizitabirwa n’abantu bacye cyane ko n’itike yacyo yahanitswe, kugeza ubu kwinjira muri iki gitaramo bizaba ari ibihumbi 100FBu mu gihe ameza y’abantu umunani yo izaba igura 1 500 000FBu.

Ni mu gihe tariki 1 Mutarama 2023, Israel Mbonyi ho kwinjira bizaba ari ibihumbi 30FBu, iki kikaba icy’abakunzi b’uyu muhanzi muri rusange.

Mu 2021 Israel Mbonyi yatangaje ko azataramira abakunzi be b’i Burundi, ariko igitaramo cyigasubikwa ku munota wa nyuma na Leta y’i Burundi, mbere yuko umubano w’u Rwanda n’iki gihugu uzahuka.

Uyu muhanzi ukunzwe mu ndirimbo zo kuramya no guhimbaza Imana, ategerejwe mu gitaramo yateguye kizabera BK Arena ku cyumweru aho azamurika album ze ebyiri ‘Icyambu’ na ‘Baho’, azahuriramo na Danny Mutabazi, Annette Murava, James na Daniella.

Protais MBARUSHIMANA

http://www.nkundagospel.rw

Related post

Leave a Reply

Your email address will not be published. Required fields are marked *