Israel Mbonyi yavuze kuri album agiye kumurika

 Israel Mbonyi yavuze kuri album agiye kumurika

Umuhanzi w’icyamamare mu ndirimbo zo kuramya no guhimbaza Imana, Israel Mbonyi abinyujije ku rukuta rwe rwa Twitter yanditse amagambo anyuranye ariko ageze ku ijambo Icyambu arigira Hashtag (aricaho akarongo), ndetse mu nteruro imwe ryumvikana mo inshuro eshatu bituma abantu bakeka ko yaba ari guca amarenga kuri album ye yitegura kumurika ndetse bakeka ko yazaba yitwa Icyambu.

Uyu muhanzi umaze kwigarurira imitima ya benshi ndetse wamaze no kwambutsa umupaka injyana ye yakomeje yandika mu rurimi rw’Icyongereza ati:” Am Cooking something.” Ugenekereje mu rurimi rw’Ikinyarwanda yashakaga kuvuga ko azaniye abakunzi be ikintu gishya.

Israel Mbonye yabyanditse kuri Twitter

Mbonyi akimara kwandika ubwo butumwa abakunzi be nubwo bamwe bakekaga ko ari indirimbo abandi bagakeka ko yaba ari album, bamusabye kubabwira umunsi nibura icyo gihangano kizasohokera ho abandi bavuga ko bacyiteze ho ibitangaza birimo no gukiza abantu. Uwitwa Baziruwiha yagize ati:

“Ariko se byibuze watubwira umunsi ko ukwezi ko kwari uku niba mutarabihinduye?”

Mugenzi we Bahati Dan yagize ati: “Ni ryari???rwose bigaragara ko ari indirimbo nziza.”

Umukunzi we witwa Tuyisenge Innocent wwe yahamije ko iyi ndirimbo izakora ibitangaza. Yagize ati:” Iyi ndirimbo irasizwe izakiza benshi.”

Mu kiganiro yagiranye n’umunyamakuru wa Nkunda Gospel, Israel Mbonyi yemeye ko afite gahunda yo kumurika album ariko ahakana ko ibyo yacishije ku rukuta rwe rwa Twitter haba hari aho bihuriye n’icyo gikorwa, dore ko yanahakanye ko izina ry’iyo album rizaba ari Icyambu. Yagize ati:

“Nditegura gushyira hanze album yanjye ariko si vuba kuko ntaramenya igihe. Ibyo nanditse kuri Instagram ntaho bihuriye n’icyo gikorwa…”

Nubwo Israel Mbonyi yahakanye iby’aya makuru ariko ku italiki ya 15 Ukwakira 2015 yafashe amajwi n’amashusho y’indirimbo esheshatu mu icumi yavugaga ko zizaba zigize album ye ya kane yise Icyambu. Ibi akaba yarabikoze mu buryo bwa ‘Live’ binyuze mu gitaramo yakoreye muri Romantic Garden ku Gisozi.

Uyu muhanzi wari watumiye abantu batandukanye biganjemo inshuti n’abavandimwe, kimwe n’abo babana mu buzima bw’umuziki bwa buri munsi, yaririmbye nyinshi mu ndirimbo ze ariko yibanda ku zo yifuza gushyira kuri Album ye nshya.

Nyuma y’iki gitaramo gito cyabaye ku wa Gatatu tariki 13 Ukwakira 2021, twamenye amakuru avuga ko uyu muhanzi, yabashije gukora indirimbo esheshatu gusa mu icumi zizaba zigize album ‘Icyambu’.

’Icyambu’ avuga ko ari izina yakomoye ku rye bwite dore ko uyu muhanzi ubusanzwe yitwa Mbonyicyambu Israel.

Avuga impamvu yahisemo kwita album ye izina rifite aho rihuriye n’aye bwite yagize ati

“Kera iwacu banyise Mbonyicyambu Israel, izina sinarikunda ntangira kwiyita Mbonyi, uko imyaka yagiye ishira nsobanukirwa ibisobanuro bwaryo, nararikunze ariko nsanga bigoye ko nahita mpindura, nuko natekereje kwita album yanjye Icyambu.”

Muri iki gitaramo Israel Mbonyi yari yaje gushyigikirwa n’ababyeyi be, Umunyamabanga Uhoraho muri Minisiteri y’Urubyiruko n’Umuco, Edouard Bamporiki, Umuyobozi w’Umuco muri Minisiteri y’Umuco n’Urubyiruko Aimable Twahirwa n’abandi banyuranye barimo n’abahanzi bagenzi be.

Album ya kane ya Israel Mbonyi byitezwe ko izasohoka mu minsi mike iri imbere. Mu kiganiro na IGIHE uyu muhanzi yavuze ko ateganya gukora ikindi gitaramo azafatiramo indirimbo zasigaye mu gihe kidatinze.

Mu 2014, Israel Mbonyi yasohoye album ye ya mbere ‘Number one’, iya kabiri yise ‘Intashyo’ ayisohora mu 2017 mu gihe iyo yaherukaga gusohora yise ‘Mbwira’ yo yayisohoye mu 2019.

Related post

Leave a Reply

Your email address will not be published.