Kenya: Insengero zemerewe kwakira abayoboke ku kigero cy’ijana ku ijana

 Kenya: Insengero zemerewe kwakira abayoboke ku kigero cy’ijana ku ijana

Léonidas MUHIRE

Mu gihe ubuyobozi bwa Kenya bwakuyeho amabwiriza yari asanzweho yo kwirinda icyorezo cya Covid-19, Inama Mpuzamatorero kuri Covid-19 muri Kenya nayo yatangaje ko insengero zemerewe kwakira abayoboke bose zifite ubushobozi bwo kwakira hatajemo guhana intera ndetse inakuraho umukwabo mu gihe cyo gutanga izindi serivisi abayoboke b’amadini n’amatorero bakenera.

Mu itangazo ryashyizweho umukono na perezida w’iyo Nama Mpuzamatorero, Musenyeri Antony Muheria wo muri Arikidiyosezi Gatolika ya Nyeri kuri uyu wa 19 Werurwe 2022, rinagaragaza ko hakuweho umubare ntarengwa w’abantu bitabira ubukwe ndetse n’imihango yo gushyingura ijyanye n’idini.

Abayobozi b’amadini ariko baburiwe ko n’ubwo igihugu cyakuyeho ingamba nyinshi zo gukumira icyorezo cya Covid-19 ingaruka zayo zikigaragara mu muryango mugari igihe kire kire, bityo ko bakwiye gukomeza gusenga kugira ngo Imana ibafashe mu gukomeza ukwizera no gukomeza umuryango mugari mu nzego zose.

Abayobozi b’amadini na bo baboneyeho gusaba Abanyakenya kwita ku miryango myinshi yagizweho ingaruka cyane n’icyorezo cya Covid -19 bakayifasha gukemura ibibazo ifite.
Musenyeri Muheria ati: “Turareba cyane cyane impfubyi za Covid-19 n’abapfakazi. Twese hamwe dufatanyije na leta, dukwiye gushaka uburyo bwo kugabanya ingaruka z’icyorezo kuri bo binyuze mu nkunga zimwe na zimwe”.

N’ubwo Guverinoma ibinyujije muri Minisiteri y’Ubuzima yakuyeho nyinshi mu ngamba zari zimaze igihe kirekire, kwambara agapfukamunwa byo bizakomeza gukorwa mu gihe umuntu ari ahateraniye abantu benshi kuko ubwandu bukiri ku ijanisha rya 0.5 ku ijana muri Kenya.

Ibi bibaye nyuma y’uko ibindi bihugu bya Afurika y’u Burasirazuba harimo n’u Rwanda nabyo byagiye byoroshya ingamba z’ubwirinzi bw’icyorezo ari nako hashyirwa ingufu muri gahunda z’ikingira. N’ubwo bimeze bityo ariko, Ibihugu bimwe byo ku mugabane wa Asia nk’u Bushinwa muri iyi minsi imibare yongeye kuzamuka n’ubwo imfu zitari ku kigero cyo hejuru ari na yo mpamvu Umuryango Ushinzwe Ubuzima ku Isi (OMS) usaba abantu kutadohoka burundu kuko icyorezo kigihari.

Related post

Leave a Reply

Your email address will not be published.