Kera kabaye Abangilikani na bo bamaganye ibitero by’u Burusiya kuri Ukraine

 Kera kabaye Abangilikani na bo bamaganye ibitero by’u Burusiya kuri Ukraine

Kuva intambara y’u Burusiya na Ukraine yatangira muri Gashyantare uyu mwaka kugeza ubu, abatandukanye ntibahwemye kuyamagana. Muri uwo mujyo n’imiryango ishingiye ku myemerere nk’amadini ntiyatanzwe gusa hakunze kumvikana Kiliziya Gatolika irangajwe imbere na Papa Francis ndetse n’idini rya Orthodox risa n’irivuze byinshi mu bihugu byombi biri mu ntambara kubera abayoboke benshi rihafite. Kuri iyi nshuro ubuyobozi bw’idini Angilikani rifite imizi mu Bwami bw’u Bwongwereza na bwo bwinjiye mu rugamba rwo kwamagana intambara kuri ubu idaca amarenga yo kurangira ejo cyangwa ejobundi.

Ni mu ruzinduko Rowan Williams wahoze ari Musenyeri w’umugi wa Canterbury mu idini Angilikani ry’u Bwongereza ari hamwe n’abahagarariye andi madini bagiriye muri Ukraine. Aganira n’imbaga yari aho mu umugi wa Chernivtsi, Musenyeri Rowan yabihanganishije avuga ko kuba u Burusiya bwaratangije intambara ari ukwiyangiza ubwabwo no kwangiza izina ry’Imana kandi ko byababje cyane idini yari ahagarariye.

Yagize ati: ”Ukandamiza, ugaba ibitero asenya abandi abikora yangiza n’ubusugire bwe, ukwemera kwe ndetse n’ejo hazaza. Abangiza umudendezo n’ubumuntu bw’abandi mu by’ukuri baba basenya n’ubumuntu bwabo, bangiza ishusho y’Imana muri bo ndetse no mu bo bahohotera”.

Yakomeje agira ati: ”Turi hano kubera ko ibintu biteye ubwoba byabaye mu mezi ashize, byateje impagarara mu buryo bw’umwuka kuri twe, intimba ndetse n’uburakari kuri mwe byakorerewe. Ikintu gito dushobora gukora ni ukuba hamwe na mwe no kwicarana namwe kabone n’iyo byaba ari akanya gato ndetse niyo twaba twaragezweho n’aya makuba”.

Uru ruzinduko rwari rwateguwe n’umuryango mpuzamahanga witwa ‘Religions for Peace’ mu rwego rwo guhumuriza abari mu ntamaba. Bikaba ari n’ubwa mbere uruzinduko nk’urwo rw’abayobozi b’amadini rubaye mu gace kari kuberamo imirwano kandi n’imirwano ikomeje. Rwari ruhuje abahagarariye idini Angilikani, idini Gatolika, Idini rya Orthodix ndetse n’abahagarariye Ababudisiti, Abayisilamu n’Abayahudi.


Hagati aho ikizere cy’uko intambara yarangira vuba kirasa n’aho kigenda kiba gike dore ko uko bwije n’uko bukeye hagenda haza ingingo nshyashya zisa n’izisubiza ibintu irudubi kandi ntizinavugweho rumwe. Gusa abatandukanye, imiryango n’ibihugu ntibihwema kuvuga no gufata ingamba zinyuranye zirimo n’amagambo asa n’arimo umuti w’ikibazo cg guhangana ahubwo. N’ubwo ibyo bikorwa ariko, icyaganisha ku gushyira iherezo ku ntamabara mu buryo bubangutse cyo kiracyategerejwe nk’uko dutegereje kugaruka kw’Umukiza.

Related post

Leave a Reply

Your email address will not be published.