Kiliziya yasabye imbabazi ku uruhare rwayo muri Jenoside yakorewe Abatutsi- Menya Abihayimana bijanditse muri ubwo bwicanyi

 Kiliziya yasabye imbabazi ku uruhare rwayo muri Jenoside yakorewe Abatutsi- Menya Abihayimana bijanditse muri ubwo bwicanyi

Hashize imyaka itanu Kiliziya Gatolika isabye imbabazi ku mugaragaro ku ruhare rwayo muri jenoside yakorewe Abatutsi mu w’1994. Izi mbabazi yasabye zishimiwe na benshi mu banyarwanda nyuma y’igihe kinini cyari gishize Jenoside irangiye nyamara nta kigaragara idini Gatolika ryavuze mu gihe nyamara uruhare rwa bamwe mu bihayemana Gatolika rwaragaragariraga buri wese.
Gusa n’ubwo byari bimeze bityo ariko, kiliziya yo mu Rwanda yanagize uruhare mu kongera kubaka Abanyarwanda nyuma ya Jenoside cyane mu bikorwa byo gusaba no guhana imbabazi. Uyu munsi twatangiye igihe cyo kwibuka Jenoside yakorere Abatutsi ku nshuro ya 28. Dufatiye kuri ayo mateka reka turebere hamwe bamwe mu bihayimana gatolika biyambuye umwamabro w’ubushumba bakagira uruhare mu bwicanyi bw’ubushyo bari baragijwe. Ahasengerwaga hagatsemberwa!

Twifashishije inkuru ya IGIHE, reka tugaruke kuri bamwe mu bihayimana gatolika bahamijwe n’inkiko icyaha cya Jenoside zaba izo mu Rwanda, mu mahanga ndetse na Mpuzamahanga.

Padiri SEKAMANA Denys
Padiri Denys Sekamana wo muri Diyosezi ya Butare, yahamijwe ibyaha bya Jenoside akatirwa igifungo cy’imyaka 15, ubu yarayirangije asubira muri Diyosezi ya Butare.

Padiri Denys SEKAMANA yahamwe n’icyaha cya Jenoside inshuro ebyiri mu nzego ebyiri zitandukanye; inshuro ya mbere yarezwe ko yabaga kuri bariyeri y’imbere y’ikigo cya ICA (Institut Catéchétique Africain) yayoboraga muri Jenoside, afite imbunda, yambaye n’imyenda ya gisirikare, bica abantu areba. Yaciriwe urubanza mu Rukiko rwa Huye, akatirwa imyaka ine ngo basanga ihwanye n’iyo yari amazemo, arafungurwa. Yongeye kuburanishwa na Gacaca yo ku i Taba, akatirwa imyaka 15, arafungwa afungurwa atarayirangiza.

Padiri RUKUNDO Emmanuel
Padiri RUKUNDO Emmanuel wari ‘Aumônier Militaire’ kuva mu 1993 ndetse mu ngabo za leta yari yarahawe ipeti rya Kapiteni ndetse akaba n’Umuyobozi wa Seminari Ntoya ya Kabgayi. Mu 2009 yahamijwe ibyaha bya Jenoside mu Rukiko rwa Arusha akatirwa gufungwa imyaka 25.

Mu 2001, Padiri RUKUNDO yatawe muri yombi mu Busuwisi biturutse ku mpapuro zo kumuta muri yombi zari zarasohowe n’Urukiko Mpuzamahanga Mpanabyaha rwashyiriweho u Rwanda (TPIR). Yahise yoherezwa i Arusha muri Tanzania ngo aburanishwe n’urwo rukiko. Urukiko rwamuhamije ibyaha bya Jenoside birimo kwicwa no kuburirwa irengero kw’Abatutsi bari bahungiye mu Rwunge rw’Amashuri rwa Saint Joseph ruri i Kabgayi no muri Seminari ntoya ya Kabgayi.

Padiri RUKUNDO ashinjwa kwica abantu benshi barimo abapadiri bagenzi be ari bo; Padiri Niyonshuti Célestin, Padiri Tharcisse, Padiri Musonera Callixte na Padiri Martin. Ashinjwa n’uruhare mu iyicwa ry’abandi benshi barimo n’ababikira b’Abernardine babaga mu kigo cyabo mu Murenge wa Nyarugenge mu Mujyi wa Kigali.

Yashinjwe kandi no kuba yarafashe umugore muto w’Umututsi wari wahunze, akamusambanyiriza mu cyumba cye muri Seminari y’i Kabgayi. Mu Ukuboza 2016, Padiri RUKUNDO yarekuwe n’umucamanza Théodore Meron.

Padiri NDAGIJIMANA Joseph

Padiri NDAGIJIMANA yahoze ari Padiri Mukuru wa Paruwasi ya Byimana mu 1994, nawe yahamijwe ibyaha bya jenoside nyuma yo kwicisha Abatutsi bari bahungiye muri Paruwasi yayoboraga, barimo na mugenzi we Padiri MBUGUJE Alphonse. Mu 2008 yakatiwe gufungwa burundu n’Urukiko Gacaca nyuma yo guhamwa n’ibyaha bya Jenoside, ubu ari muri gereza ya Mpanga.

Padiri NTULIYE Edouard

Padiri Edouard NTULIYE uzwi nka SIMBA, wayoboraga Seminari nto ya Nyundo, afungiye muri Gereza ya Rubavu aho yakatiwe gufungwa burundu nyuma yo guhamwa n’ibyaha bya jenoside.
Mu buhamya IRYAMUKURU Felicité yashyize mu gitabo yise ‘L ‘ouragan a frappé Nyundo’ (Amahindu yashegeshe Nyundo), avuga ko yahuye na Padiri NTULIYE afite umuhoro, akanibuka uburyo yishe akanicisha abatutsi.

Padiri SEROMBA Athanase

SEROMBA yari Padiri Mukuru wa Paruwasi ya Nyange, ubu ni mu Karere ka Ngororero. Amateka agaragaza inzira ndende Abatutsi banyuzemo bahungira muri iyo Kiliziya ya Nyange, bizeye umutekano ariko ku cyemezo cya Padiri Seromba Athanase, hakoreshejwe imashini ikora imihanda “Caterpillar” Kiliziya yarasenywe abari bayihungiyemo bose baricwa.

Uwari Burugumesitiri wa Komini Kivumu n’abapolisi bayo bakusanyije impunzi zivuye mu masegiteri ayigize babajyana kuri Paruwasi ya Nyange, bagezeyo Padiri Athanase Seromba yababajije amakuru yerekeranye n’impunzi zitari zahagera, maze yandika amazina y’impunzi zaburaga, lisiti yazo ayishyikiriza Burugumesitiri Grégoire Ndahimana kugira ngo zishakishwe zizanwe kuri Paruwasi, zimaze kuba nyinshi hategurwa umugambi wo kubicira mu kiliziya.

Ku wa 13 Ukuboza 2006, Urukiko rwa TPIR rwahamije Padiri SEROMBA ibyaha bya Jenoside birimo ubwicanyi n’ibyaha byibasiye inyokomuntu, rumukatira igifungo cy’imyaka 15. Ubushinjacyaha byajuririye iki gihano maze Seromba atsindwa urwo rubanza mu wa 2008. Yakatiwe igifungo cya burundu, ubu akaba arimo kukirangiriza muri Benin.

Ababikira b’i Sovu

Umubikira witwa Sr. MUKANGANGO Gerturde Consolata wayoboraga Ikigo cy’Ababikira cya Sovu muri Diyosezi ya Butare na mugenzi we Sr. MUKABUTERA Kizito Julienne bakoranaga, bahamwe n’ibyaha bya Jenoside yakorewe Abatutsi bari barahungiye i Sovu mu yahoze ari Komini Huye. Aba babikira bahamwe n’ibyaha byo kwica Abatutsi bari bahungiye mu Kigo cya Sovu n’abatwikiwe ku ivuriro riri hafi y’icyo kigo batwikishijwe lisansi ku itariki 6 Gicurasi 1994.

Urubanza rwa Sr. MUKANGANGO na Sr. MUKABUTERA ni rwo rwabaye urwa mbere ku rwego mpuzamahanga kuregwamo abihayimana b’igitsina gore. Rwabereye i Bruxelles mu Bubiligi, aho Sr. MUKANGANGO yakatiwe igifungo cy’imyaka 15 naho mugenzi akatirwa icy’imyaka 12. Aba bombi barafunguwe basubiye mu bigo by’ababikira mu Bubiligi.

Mu bandi hari nka Padiri NTIMUGURA Laurent wafunguwe arangije muri gereza igihano cy’imyaka 20, Padiri NGIRINSHUTI Tadeyo wafungiwe muri Gereza ya Cyangugu imyaka itanu aregwa ibyaha birebana na Jenoside na Padiri MATEGEKO Aimé ufungiwe i Mpanga.

Hari kandi Padiri MUNYESHYAKA Wenceslas, wahoze ayobora Paruwasi yitiriwe Umuryango Mutagatifu ‘Sainte Famille’ ushinjwa ibyaha bya Jenoside yakorewe Abatutsi mu 1994. Muri Kanama 2015 nibwo ubushinjacyaha bw’u Bufaransa bwahagaritse gukurikirana Padiri MUNYESHYAKA buvuga ko nta bimenyetso bifatika bimushinja.

Muri rusange uretse abo tugarutseho, amadini n’ayo tutagarutseho mu gihe cya Jenoside yakorewe Abatutsi yagize uruhare wenda rutangana gusa habayeho gutambikira ku nshingano y’ubushumba bari bafite. Icyo umuntu yakwishimira ni uko habayeho gusaba imbabazi kw’abayobozi b’ayo madini iki gihe. Kongera kuabaka Abanyarawanda mu buryo bw’umwuka no kuba abayoboke b’amateka mashya kuri ubu twavuga ko ari icyo ayo madini ashyize imbere. Birasa n’aho icyuho cy’ayo mabi bagizemo uruhare kiri kuzibwa no kongera kubaka Abanyarwanda mu gukumira ikibi.

Related post

Leave a Reply

Your email address will not be published.