Korali Bethel yasohoye indirimbo nshya yibutsa abantu kudatwarwa n’iby’isi ngo bibagirwe Imana

 Korali Bethel yasohoye indirimbo nshya yibutsa abantu kudatwarwa n’iby’isi ngo bibagirwe Imana

Korali Bethel ikorera ubutumwa muri ADEPR Nyarubande, mu rurembo rwa Muhoza, yasohoye indirimbo nshya yise “Nimushake Uwiteka” igamije kwibutsa abantu ko badakwiye guheranwa n’iby’isi ngo bibagirwe gushaka Imana.

Iyi ndirimbo iryoheye amatwi y’umubiri n’ay’umutima itangira igira iti: “Nimushake Uwiteka bigishoboka, ijuru rizajyamo abihanganye.” Bakomeza baririmba bati:

“Abizeye Uwiteka Imana iyo nzira ntibazayiyoba, yaduhaye umwana wayo Yesu kugira ngo iyo nzira tutazayiyoba. Hari ibanga dufite, hari ibanga ryo gusenga.”

Mu kiganiro umunyamakuru wa Nkundagospel yagiranye n’umuyobozi w’iyi korali, Niyirora Thacienne yagaragaje ko ubutumwa bukubiye muri iyi ndirimbo bugamije gukangura abantu batwawe n’isi bakibagirwa ko bari mu rugendo rugana mu ijuru. Yagize ati:

“Muri ibi bihe isi igeze ku iherezo, abantu barahuze cyane ndetse bakoresha umwanya wabo wose bashaka imibereho yo mu isi, niyo mpamvu twagerageje kwibutsa abantu ko n’Imana bakwiye kuyishakana umwete bigishoboka ko ibonwa.” Yakomeje agira ati:

“Birakwiye ko abantu dusenga twera imbuto nziza aho dutuye ,ku kazi aho batureba n’aho batatureba. Niyo mpamvu ngira inama buri muntu wese kumva iyi ndirimbo yitonze, kugira ngo acengerwe n’ubutumwa burimo, bugamije kwigisha abantu gushaka Uwiteka bigishoboka ko abonwa.”

Korali Bethel imaze kugira abakunzi benshi hirya no hino ku isi, yavutse ku itariki ya 27 Nyakanga 2014. kugeza ubu imaze kugira abaririmbyi basaga mirongo itanu. Imaze gukora indirimbo zisaga 40, ziganjemo iz’amajwi, dore ko izakorewe amashusho ari eshatu gusa.

Kanda hano urebe iyo ndirimbo nshya

Protais MBARUSHIMANA

http://www.nkundagospel.rw

Related post

Leave a Reply

Your email address will not be published.