Korali Jehovah Jireh ULK igiye kumara iminsi ibiri itaramira mu Mujyi wa Musanze

 Korali Jehovah Jireh ULK igiye kumara iminsi ibiri itaramira mu Mujyi wa Musanze

Korali Jehovah Jireh ikorera umurimo w’Imana muri Paruwasi ya Gasave, mu Mujyi wa Kigali, igiye gukorera ivugabutumwa mu Mujyi wa Musanze mu Ntara y’Amajyaruguru, aho izataramira kuri uyu wa Gatandatu tariki 02 no ku Cyumweru tariki 03 Nyakanga 2022, mu giterane cyateguwe na Korali Twubakinkuge yo kuri ADEPR Bukane.

Umuyobozi wa Korali Jehovah Jireh, Muvunyi Hyppolite yavuze ko biteguye neza iri vugabutumwa kuko ngo bamaze kwakira ubutumire bwa Twubakinkuge kandi bamaze kuyemerera, bityo ngo bakaba bakomeje gusenga Imana ngo izikorere umurimo kuko ari yo igira icyo ikora ikagikomeza. “Muri macye dukomeje ivugabutumwa rihindurira abantu kuguma kuri Yesu, kandi ndararikira abantu kuguma muri Yesu”.

Yagize ati: “Turiteguye rwose kuko baradutumiye babinyujije mu Buyobozi bw’Itorero natwe tubibemerera muri ubwo buryo, ubwo rero tuzagera i Musanze kuwa Gatandatu nyuma ya saa sita nka saa munani, dukore igitaramo (concert), hanyuma ku cyumweru, tuhirirwe umunsi wose dukora umurimo w’Imana, tunifatanye na Twubakinkuge mu gikorwa cyo kumurika Umuzingo wabo w’amajwi n’amashusho. Abakunzi bacu bose bazaze dutaramane kuko turabakumbuye, ndetse bazanahamenyera n’izindi gahunda z’ivugabutumwa dufite no mu minsi iri imbere”.

Muri iri vugabutumwa ry’iminsi ibiri (Igiterane), Korali Jehovah Jireh izifatanya na Korali Twubakinkuge yo kuri ADEPR Bukane ifite gahunda yo kumurika umuzingo wayo wa kabiri w’amajwi n’amashusho (Video Album), ahazaba hari abigisha b’Ijambo ry’Imana nka Evangelist Tuyisenge Jean Baptiste (Kazungu), Evangelist Nshizirungu Emmanuel, Pastor Kazungu Charles, ndetse n’andi makorali yo kuri ADEPR Bukane nka Korali Ubumwe.

Korali Jehovah Jireh izavuga ubutumwa mu giterane cya Korali Twubakinkuge, yavukiye muri Kaminuza yigenga ya Kigali, ULK, mu 1998, itangirira ahazwi nko mu gishanga, ahahoze hakorera ULK. Yatangijwe n’abanyeshuri batandatu gusa bari muri gahunda y’abiga ku mugoroba izwi mu cyongereza nka Evening Program. Aba banyeshuri bayitangije babarizwaga muri Groupe ikorera mu muryango w’abanyeshuli b’abapantekote bo muri Kaminuza, yahoze yitwa “Groupe de Prière des Etudiants Pentecotistes universitaires-GPEPU, yaje guhindura izina ubu ikaba yitwa CEP (Communautés des Etudiants Pentecotistes).

Kuba yaravukiye muri ULK, ndetse abaririmbyi bayo bakaba abanyeshuri bo muri iyi Kaminuza yashinzwe na Prof Dr Rwigamba Balinda, byatumye benshi bakomeza kumva ko ari iyo muri ULK, kabone n’ubwo uko yakomeje gukura, yageze aho igahabwa Umudugudu (Itorero) igomba kubarizwaho muri Paruwasi ya Gasave muri ADEPR. Mu bihe bya Covid-19, iyi Korali ntiyaruhutse kuko yayobotse iy’ikoranabuhanga maze ku muyoboro wabo wa YouTube bakora icyiswe ‘GUMAMO CONCERT by JEHOVAH JIREH’ aho bakoze episodes zigera muri 11 babwira Isi yose ubutumwa bwiza, banifashisha Life Radio, Radio ya ADEPR bakomeza kwamamaza ingoma y’Imana.

N’ubwo yatangiye igizwe n’abo muri CEP, Korali Jehovah Jireh byageze aho ihinduka iy’aba Post CEP, bivuze abahoze muri CEP ariko barangije amasomo yabo bari mu kazi ahatandukanye cyangwa se batanafite akazi ari nayo mpamvu uyu munsi bafite Itorero babarizwaho kugirango bahuze neza ibikorwa byabo. Tubibutse ko iyi CEP ya ULK, ari imwe mu ma CEP yareze bamwe mu bayobozi bayoboye ADEPR kuri ubu kuko nko mu 2005, Perezida wayo yari bwana Budigiri Herman, kuri ubu akaba ari Umuyobozi Nshingwabikorwa mu Itorero ADEPR.

Protais MBARUSHIMANA

http://www.nkundagospel.rw

Related post

Leave a Reply

Your email address will not be published.