Leta ya Putin yataye muri yombi umupadiri wamunenze kubera gushoza intambara muri Ukraine

 Leta ya Putin yataye muri yombi umupadiri wamunenze kubera gushoza intambara muri Ukraine

Léonidas MUHIRE

Bimaze iminsi bivugwa ko umupadiri witwa Padiri Burdin wahaye abakiristu inyigisho yo kurwanya intambara u Burusiya burwana na Ukraine yaje gutabwa muri yombi n’inzego za leta mu Burusiya ndetse akaba agomba kwitaba urukiko mu mpera z’iki cyumweru.

Padiri Ioann Burdin yafunzwe nyuma gato yo guha ikibwiriza abakristu bari bateraniye mu rusengero ruto ruherereye mu mujyi wa Karabanovo.

Nk’uko Ikinyamakuru ‘The Telegraph’ kibitangaza, Padiri Burdin wo mu idini rya ‘Resurrection Church’ mu Burusiya akurikiranyweho icyaha cyo gutesha agaciro ingabo z’icyo gihugu. Iperereza ry’abapolisi mu Burusiya ryerekanye ko uyu mupadiri yabwiye abakristu bari bateraniye muri paruwasi ko ingabo z’u Burusiya muri Ukraine zarashe imijyi ya Kyiv, Odessa na Kharkiv zikanica abaturage ba Ukraine kandi ari abavandimwe babo muri Kristu.

Ubutumwa bwari ku rubuga rw’iyo paruwasi bwagiraga buti: “Twebwe abakristu ntidushobora kurebera mu gihe umuvandimwe yishe umuvandimwe; Umukristo yica umukristo.
Ntidushaka kongera gusubiramo ibyaha by’abashimye ibikorwa bya Hitler ku ya 1 Nzeri 1939″.

Mu cyumweru gishize abapadiri n’abadiyakoni barenga 270 bo mu Burusiya bashyize umukono ku ibaruwa ifunguye isaba ubwiyunge no guhagarika intambara muri Ukraine.

Umuyobozi w’idini rya Orthodox mu Burusiya, umwepisikopi Kirill utarashyize umukono kuri iyo baruwa, abonwa nk’ushyigikiye ubutegetsi bwa Moscou ndetse akaba n’inshuti ya Perezida Putin.

Related post

Leave a Reply

Your email address will not be published.