Mbere yo kuza gutaramira i Kigali Rose Muhando yasabye Abanyarwanda ikintu gikomeye

 Mbere yo kuza gutaramira i Kigali Rose Muhando yasabye Abanyarwanda ikintu gikomeye

Rose Muhando umuramyi wo mu gihugu cy’abaturanyi cya Tanzaniya, mbere yo kuza gutaramira i Kigali, Ku wa 6 Werurwe 2022, yasabye abanyarwanda kuzitabira icyo gitaramo yise ‘Karahabutaka’.

Integuza y’igitaramo Rose Muhando azataramamo

Rwanda Gospel Stars Live yari yatanze integuza y’igitaramo cyo kuramya no guhimbaza Imana cyiswe “Praise and Worship Live Concert”, aho bari batangajeko Rose Muhando azaba ari mu baramyi bazatarama ariko we yari atarabishimangira.

Abinyujije ku mbuga ze nkoranyambaga nka Instagram yemeje ko azataramira i Kigali ku wa 6 Werurwe 2022, kizabera kuri Canal Olympia ku i Rebero, maze asaba Abanyarwanda kutazabura ngo bafatanye kuramya no guhimbaza Imana.

Yagize ati “Banyarwanda mwitegura tariki ya 6 Werurwe nzaba ndi i Kigali mu gitaramo karahabutaka  cya Gospel Stars Live. Ntimuzabure.”

Iki gitaramo kiswe “Praise & Worship Live Concert” ni icyo gusoza ibihembo bya Rwanda Gospel Stars Live, aho ibi bihembo bihatanyemo abahanzi 15. Ni igikorwa ngarukamwaka kigamije guteza imbere umuziki wo kuramya no guhimbaza Imana.

Rose Muhando agomba guhurira muri iki gitaramo n’abahanzi b’abaramyi hano mu Rwanda barimo Gaby Kamanzi, Israel Mbonyi, Aline Gahongayire, Theo Bosebabireba, Serge Iyamuremye ndetse na Gisubizo Ministries, True Promises, Kingdom of God Ministries n’abandi bafite aho bahuriye n’iki gikorwa.

Uyu muramyi afite indirimbo zigaruriye imitima y’abatari bake muri Afurika y’Iburasirazuba  n’ahandi, muri zo ni nka Nibebe, Jipange Sawasawa,Ombi Langu aheruka gusohora, Simba, Mupe Yesu n’izindi nyinshi.

Related post

Leave a Reply

Your email address will not be published.