Mu Budage: Abapadiri hafi 200 bahohoteye abana barenga 500 muri Diyosezi Gatolika ya Münster

 Mu Budage: Abapadiri hafi 200 bahohoteye abana barenga 500 muri Diyosezi Gatolika ya Münster

Inyigo yakozwe n’abashakashatsi bo muri Kaminuza ya Münster, yagaragaje ko nibura abana 610 batarageza imyaka y’ubukure basambanyijwe n’abapadiri n’abandi bihayimana bo muri Diyosezi Gatolika ya Münster mu Burengerazuba bw’u Budage.

 

Uyu mubare ngo ushobora kuba wikubye inshuro 10 bitewe n’uko abenshi mu bakorewe aya mahano baryumyeho. Iyi nyigo yakozwe mu myaka ibiri, yakozwe bisabwe na Diyosezi ya Münster igamije kureba neza ikibazo cy’ihohoterwa rikorerwa ku gitsina muri iyi diyosezi hagati ya 1945-2020.Mu myaka 75, hagaragaye abana 610 basambanyijwe n’abapadiri n’abandi bihayimana. Bitewe n’impamvu bwite cyangwa akato gashobora guhabwa uwavuze ko yakorewe aya mahano, bamwe bahisemo guceceka.Abenshi mu basambanyijwe bari hagati y’imyaka 10 na 14. Inyigo yerekana ko nibura abari hagati ya 5000 na 6000 basambanyijwe muri diyosezi ya Münster gusa. Ababarirwa muri bitatu bya kane ni abahungu naho kimwe cya kane ni abakobwa.

Abakoze inyigo bavuga ko asambanyijwe bari bafitanye umubano wa hafi na kiliziya nko kuba abahereza cyangwa bari mu yandi matsinda. Nibura abapadiri n’abandi bihayimana 196 bo muri iyi diyosezi bagaragaye mu bikorwa byo gusambanya abana kuva mu 1945.Aba barimo abapadiri 183, umudiyakoni n’abafurere 12. Abenshi mu babivugwagaho bahitaga bimurirwa ahandi bagakomeza imirimo yabo. Aha ubuyobozi bw’Abepiskopi bane bayoboye Diyosezi ya Münster bukaba bwaratsinzwe abo ni; Michale Keller, Joseph Höffner, Heinrich Tenhumberg na Reinhard Lettman.Mu 2018, inyigo y’inama y’abepiskopi mu Budage yerekanye ko abihayimana 1600 muri iki gihugu basambanyije abana 3600 hagati ya 1946 na 2014.

Iyi nyigo kandi igaragaje ibi mu gihe hari indi  raporo yiga ku ihohoterwa rikorerwa abana muri Kiliziya Gatolika yashyizwe hanze mu Budage inagaruka kuri Papa ucyuye igihe, Papa Benedigito XVI.

Uyu wahoze ari Umushumba wa Kiliziya Gatolika hagati ya 2005 na 2013, raporo imushinja ko hagati ya 1977 na 1982 ubwo yari Musenyeri wa Munich mu Budage, hari Umupadiri yayoboraga wasambanyije abana. Uwo mupadiri witwa Peter Hullermann yajyanywe muri Diyosezi ya Munich avanywe i Essen mu Burengerazuba bw’u Budage. Ahageze nibwo yasambanyije umwana wari ufite imyaka 11 y’amavuko.

Bivugwa ko Josef Ratzinger [waje kuba Papa Benedigito] yamukingiye ikibaba ndetse mbere y’uko ajya i Vatican, mu 1986 Hullermann yashinjwaga ibyo byaha. Gusa ntibyakuyeho ko uyu mupadiri yakomeje imirimo ye. Papa Benedigito bivugwa ko atari azi ibikorwa bibi by’uwo mupadiri muri icyo gihe. Ikigo gitanga ubujyanama mu mategeko, Westpfahl Spilker Wastl (WSW), nicyo cyakoze iyi raporo ndetse kiri kwiga ku birego by’abapadiri bashinjwa gusambanya abana hagati ya 1945 na 2019 muri Diyosezi za Munich na Freizing.

Gusa muri Gashyantare uyu mwaka nyuma yo gushyirwa mu majwi k\uwahoze ayoboye Kilizya, Papa Benedigito XVI yasabye imbabazi nyuma y’ibimenyetso byagaragaye bimushinja kuba ntacyo yakoze ngo hahanwe abihayimana bakekwaho gusambanya abana ubwo yari Musenyeri wa Diyosezi ya Munich mu Budage.

Inkuru ya Igihe

Related post

Leave a Reply

Your email address will not be published.