Mu gihe u Rwanda rwitegura CHOGM, Aline Gahongayire nawe ngo ari gutegura CHOGM y’ijuru

 Mu gihe u Rwanda rwitegura CHOGM, Aline Gahongayire nawe ngo ari gutegura CHOGM y’ijuru

Mu gihe u Rwanda ruri kwitegura kuzakira inama ihuza ibihugu biri mu muryango w’ibihugu biri muri Commonwealth, umuhanzikazi nyarwanda uririmba indirimbo zo kuramya no guhimbaza Imana, akaba n’umuvugabutumwa yatangaje ko nawe ageze kure imyiteguro ya CHOGM y’ijuru.

Ibi yabitangaje ubwo yabwirizaga mu rusengero akangurira abantu bose kwitegura ku mubiri ndetse no kwitegura mu buryo bw’umwuka. Yagize ati:

“Igihugu cyacu cyiteguye ibintu byitwa CHOGM, numumotari murahura akakubwira ati CHOGM, turishyurira ku gatelefoni kubera CHOGM, twiteguye gusurwa, ariko mu buryo bw’umwuka nanjye ndategura CHOGM y’ijuru. Kandi kubera gutegura CHOGM imihanda barimo barayitegura, amatara bari kuyategura, utuzu dushaje bari gukuraho, nanjye niteguye CHOGM ivuye mu ijuru.” Yakomeje asobanura ibisabwa kugira ngo igihugu cyakire CHOGM ati:

” Kugira ngo CHOGM ize iza ahantu hari umutekano, hari amhoro hatari imirwano, nanjye rero mu mutima wanjye nakuyemo imirwano, nakuyemo guhangana kubera ko niteguye CHOGM ivuye mu ijuru. Abantu benshi biteguye kubona amafaranga muri CHOGM kuko bazakora imirimo itandukanye ariko mu buryo bw’ijuru iyo uryiteguye ntakabuza riragusura, mbifurije gusurwa n’ijuru.”

Itangazo ryasohowe na Commonwealth ku tariki 31 Mutarama 2022, rivuga ko Umunyamabanga Mukuru w’uwo muryango, Patricia Scotland hamwe na Perezida Kagame bemeje itariki nshya y’iyo nama yagombaga kubera mu Rwanda mu kwezi kwa Kamena 2020, ariko ikaba imaze gusubikwa inshuro ebyiri kubera icyorezo cya Covid-19.

Inama ya CHOGM iteranira muri kimwe mu bihugu bigize Commonwealth buri myaka ibiri, igafatirwamo imyanzuro ikomeye irebana na demokarasi, iterambere ridaheza, kubaka inzego n’imiyoborere, ubutabera n’uburenganzira bwa muntu.

Iyi nama kandi ifatirwamo imyanzuro yo guteza imbere ubukungu no kwagura ubucuruzi bushingiye ku kwigira, guteza imbere urubyiruko ndetse no kungurana ibitekerezo ku birebana n’imihindagurikire y’ibihe, imyenda(amadeni) n’ubusumbane hagati y’abantu.

Perezida Kagame yahaye ikaze abazitabira iyi nama izabera i Kigali mu Rwanda, avuga ko yitezweho umusaruro.

Yakomeje agira ati “Imyaka ibiri ishize yatweretse ko duhuje cyane kurusha na mbere kandi dukwiriye gukorera hamwe kugira ngo tugere ku ntego n’umusaruro twifuza. Iyi nama yari ihanzwe amaso igihe kirekire izaba umwanya mwiza wo guhura tukaganira ku mbogamizi zatewe na Covid-19, hamwe no kubaka amahirwe ashingiye ku ikoranabuhanga n’ubukungu kugira ngo dukemure ibibazo byugarije abaturage bacu.”

Patricia Scotland wa Commonwealth na we yakomeje avuga ko yishimiye kubona uyu muryango wongeye guhurira hamwe nyuma y’imyaka ine habaye indi nama ya CHOGM i Londres mu Bwongereza.

Yagize ati “Inama zacu mu Rwanda zizaduha amahirwe nyayo yo kwemeza indangagaciro ziduhuza nka Commonwealth no kwibanda ku bibazo by’ingutu birimo icyo kuzahuka muri Covid-19, imihindagurikire y’ibihe n’ubukene, kwagura ubucuruzi n’iterambere rirambye, bikaba ari ibintu byakemurwa n’ibyemezo binyuze mu butwererane n’ubufatanye”.

Scotland yakomeje avuga ko hari inama zakorwaga n’aba minisitiri hifashishijwe ikoranabuhanga, ariko ko yishimiye kongera kubonana kw’abantu bari kumwe imbona nkubone.

Uyu muryango uhuza ibihugu 54 byo hirya no hino ku isi bituwe n’abaturage barenga miliyari ebyiri na miliyoni 500(muri miliyari zisaga umunani zituye isi).

Reba video

Related post

Leave a Reply

Your email address will not be published. Required fields are marked *