Musenyeri Serviliyani Nzakamwita yagiye mu kiruhuko cy’izabukuru ahita asimbuzwa

 Musenyeri Serviliyani Nzakamwita yagiye mu kiruhuko cy’izabukuru ahita asimbuzwa

Ibiro by’Intumwa ya Papa mu Rwanda biratangaza ko kuri uyu wa 28/2/2022, Papa Fransisiko yemereye Musenyeri Serviliyani Nzakamwita wari umaze imyaka 27 ayobora Diyoseze ya Byumba kujya mu kiruhuko cy’izabukuru, anatorera Musenyeri Musengamana Papias wari umuyobozi wa Seminari Nkuru ya Nyakibanda, kuba Umwepiskopi wa Diyosezi ya Byumba.

Mu mwaka wa 2019 Musenyeri Nzakamwita yatangaje ko yamaze kubona igisubizo cya Papa Francis kimwerera kujya mu kiruhuko cy’izabukuru, yongeraho ko umunsi ku wundi akaba yari ategereje kubona umusimbura. Kuri ubu rero yamaze kumubona, uwo akaba ari Musenyeri Papias Musengamana wahawe ubupadiri mu mwaka wa 1997. Musenyeri Nzakamwita azwiho kudaca ku ruhande mu kugaragaza ukuri kwe ku ngingo zitandukanye zigamije kubaka

Mu 2017, Musenyeri Nzakamwita yatangaje ko udukingirizo baha abana bato ari two nyirabayazana w’inda z’imburagihe. Mu 2016 mu Nama y’Igihugu y’Umushyikirano, Musenyeri Nzakamwita yakozwe mu ijisho na Evode Uwizeyimana (wari Umunyamabanga wa Leta ushinzwe Itegeko Nshinga n’andi mategeko) wateye ishoti igitekerezo yari atanze cyafasha ingo kubana mu mahoro. Evode yibajije uko Musenyeri Nzakamwita amenya ibibazo by’ingo kandi atarugira.

Nk’uko tubikisha Kinyamateka – ikinyamakuru cya Kiliziya Gatolika mu Rwanda, Musenyeri Papias Musengamana watorewe na Papa Fransisiko kuba Umwepiskopi wa Diyosezi ya Byumba agasimbura Musenyeri Nzakamwita wagiye mu kiruhuko cy’izabukuru, yavukiye muri Paruwasi ya Byimana, muri Diyosezi ya Kabgayi, tariki 21 Kanama 1967. Yahawe ubupadiri tariki 18 Gicurasi 1997.

Musenyeri Papias Musengamana yize amashuri abanza i Mwendo (1974-1982), akomereza ayisumbuye mu Iseminari Nto ya Kabgayi (1982-1988). Seminari Nkuru yayize i Rutongo (1988-1989) akomereza Filozofiya i Kabgayi (1989-1991). Naho Tewolojiya ayiga i Yawunde muri Kameroni (1991-1996).

Myr Papias Musengamana yabaye Umunyabanga w’umwepiskopi 1997-1999;1999-2005 yakomeje amasomo mu Budage. Yabaye Econome wa Diyosezi 2006-2013; Igisonga cy’Umwepiskopi n’Umuyobozi wa Seminari nto ya Kabgayi2013-2017.Ubu akaba yari umuyobozi wa Seminari Nkuru ya Nyakibanda guhera 2018.

Related post

Leave a Reply

Your email address will not be published.