“Narasenze ndi muri kasho, indirimbo ivuka mu masengesho yanjye”-Bruce Melody

 “Narasenze ndi muri kasho, indirimbo ivuka mu masengesho yanjye”-Bruce Melody

Umuhanzi Itahiwacu Bruce wamamaye nka Bruce Melodie yashyize hanze indirimbo yise ‘Urabinyegeza’ ikubiyemo ubutumwa bw’inkuru mpamo y’ibyamubayeho ubwo yari afungiye i Burundi.

Ni indirimbo yashyize hanze ku mugoroba wo kuri uyu wa Gatanu tariki 9 Nzeri 2022, nyuma y’amasaha macye ageze mu Rwanda, avuye i Burundi aho yagiriye ibihe bibi bivanze n’ibyiza.

Indirimbo ‘Urabinyegeza’ ni ijambo ry’Ikirundi bishatse kuvuga tugenekereje mu Kinyarwanda ngo ‘urabihisha’, Bruce Melodie yavuze ko ari inkuru mpamo y’ibyamubayeho i Bujumbura ubwo yafungwaga biturutse ku bwumvikane bucye yagiranye n’umushoramari Bankuwiha Toussain.

Mu butumwa yanditse asobanura iyi ndirimbo yavuze ko ubwo yari muri kasho i Burundi yasenze kugeza ubwo mu masengesho havuyemo indirimbo ari nayo yakoze ahita ayishyira hanze.

Yagize ati “Ni indirimbo ishingiye ku nkuru mpamo, mu bihe bishize nanyuze mu bihe by’umwijima, narasenze ndi muri kasho, indirimbo ivuka mu masengesho yanjye. Iyi ndirimbo ndayibatuye.”

Muri iyi ndirimbo avugamo ko buri ku Cyumweru azajya ajya mu rusengero gushima Imana ku bw’ibyo yamukoreye kuko yamenye ko Yesu amukunda.

Ati “Amenya ko nayobye akanyobora inzira ikwiriye..”

Hari aho akomeza agira ati “Baraburiza Munyakazi [izina akunda kwiyita], ugaca ubinyegeza, nakupenda Jesus.”

Mu ntangiro z’uku kwezi nibwo Bruce Melodie yafungiwe i Burundi n’inzego z’umutekano zamushinjaga ubwambuzi yakoreye Bankuwiha Toussain wari wamutumiye mu gitaramo ntabashe kujya kuririmbayo ndetse ntasubize amafaranga yari yahawe.

Mu minsi yamaze i Burundi ariko n’ubwo yafunzwe, Bruce Melodie yahakoreye ibitaramo bibiri byitabiriwe ku rwego rwo hejuru ndetse Abarundi bamwereka urukundo.

Mu kiganiro yagiranye n’itangazamakuru ku mugoroba wo ku wa Gatanu ubwo yari ageze i Kigali yagize ati “Abarundi ndabashimira ukuntu bitabiriye ibitaramo byanjye, erega nk’uko nabibabwiye ikibazo cyanjye nakigiranye n’umuntu umwe ntabwo ari Abarundi muri rusange. Ntihagire utwara ibintu nabi rwose!”

Kanda hano wumve iyo ndirimbo

Protais MBARUSHIMANA

http://www.nkundagospel.rw

Related post

Leave a Reply

Your email address will not be published.