Ni mpamvu ki bamwe mu banyamadini banga kwikingiza Covid 19?

 Ni mpamvu ki bamwe mu banyamadini banga kwikingiza Covid 19?

Hari bamwe mu banyamadini kugeza kuri uyu munsi badakozwa gahunda ya leta ndetse n’Isi yose muri rusange yo gukingira abatuye Isi bose icyorezo cya Covid 19 kimaze imyaka irenga 2 cyarigabije Isi.

Urugero rwatanga rwa bamwe mu banyamadini badakozwa iby’uru rukingo ni bamwe mu bayoboke bo mu itorero ryitwa ‘Umuriro Wa Pantekote’ kandi muby’ukuri umuyobozi waryo wanaritangije ,Pasiteri Majyambere Joseph, muri Mutarama uyu mwaka wa 2021byaratangajwe ko yitabye Imana azize Covid 19.

Ubwo bamwe mu bayoboke baryo basengera I Kibagabaga mu Murenge wa Kimironko mu Karere ka Gasabo baganiraga n’Ukwezi batangaje ko kugeza uyu munsi batariyumvisha ko ari ngombwa kuba bakwitabira iki gikorwa cyo kwikingiza icyorezo cya Covid 19.

Umwe muri abo bayoboke wifuje ko umwirondoro we ugirwa ibanga yagize ati:

“Kuba ntarakingirwa ni uko ntabuze akanya, ariko igihe nikigera nzikingiza.”

Na mugenzi we basengera hamwe ntiyagiye kure y’ibyari bimaze kuvugwa dore ko yagize ati:

“Akenshi umuntu aba afite uko ubukangurambaga yabwumvise kandi agafata icyemezo biturutse mu mutima we, nta rirarenga.”

Umuyobozi w’iri torero, Pasitori Ntabanganyimana Elie, yavuzeko ibijyanye no kwikingiza atigeze abikangurira abayoboke kuko na we ubwe atarabyumva neza.

Yagize ati:

 “Numvise ku bwanjye naba nihanganye nkabanza nkareba uko bigenda uko bikingiye, nkashishoza nkabanza nkagira amakenga, njye umutima wanjye ndumva utarabimpa.”

Si aba bayoboke b’iri torero gusa bumvikanye bavuga ko batiyumvisha icyo gufata urukingo rwa Covid 19 bimaze dore ko na TV 1 nayo yigeze gutangaza inkuru y’abaturage bo mu karere ka Karongi binangiye bakanga kwitabira igikorwa cyo kwikingiza ngo kuko abayobozi b’amatorero yabo babibabujije.

Mu cyumweru gishize, Minisitiri w’Ubutegetsi bw’Igihugu, Gatabazi Jean Marie Vianney n’uw’Ubuzima, Dr Daniel Ngamije bagiye mu Ntara y’Iburengerazuba gukangurira abaturage kwitabira gahunda yo kwikingiza.

Minisitiri w’Ubutegetsi bw’Igihugu, Gatabazi Jean Marie Viannye, ubwo yasuraga kariya Karere ka Karongi, yibukije ababuza abaturage kwikingiza ko hari amategeko ashobora kubahana.

Icyo gihe yagize ati

 “Kugumura abaturage, kubabuza amahirwe y’ubuzima baba bafite, kubigisha ibintu byica ubuzima bwabo na byo ubwabyo ni icyaha, nagira ngo twibutse abantu baba bitwaza imyemerere ko imyemerere myiza ari iyirinda ubuzima.”

Perezida wa Repubulika, Paul Kagame mu kiganiro aheruka kugira n’Ikigo cy’Igihugu cy’Itangazamakuru, yavuze ko nka Leta y’u Rwanda itaragira itegeko igikorwa cyo kwikingiza COVID-19 ndetse ko icyo gihe icyari gikenewe ari ukubanza kubona inkingo.

Icyakora Perezida Kagame yavuze ko hari ibizajya bituma kwikingiza biba ngombwa, icyo gihe ndetse yatanze n’urugero rw’Ibihugu bimwe na bimwe bikomeye byari byatangiye gutangaza ko nta muturage uzajya ubyinjiramo atakingiza.

Kugeza ubu mu Rwanda nubwo kwikingiza COVID-19 bitagizwe itegeko ariko hari ibikorwa bimwe na bimwe umuntu atakwitabira atarikingiza.

Related post

Leave a Reply

Your email address will not be published. Required fields are marked *