Nta gihindutse Israel Mbonyi arajya kuririmba muri Israel muri Nyakanga

 Nta gihindutse Israel Mbonyi arajya kuririmba muri Israel muri Nyakanga

Amazina nyakuri ya Israel Mbonyi ni Mbonyicyambu Eric, ni umuhanzi w’Umunyarwanda uririmba indirimbo zihimbaza Imana (Gospel) akaba yaramamaye mu Rwanda kubera indirimbo ze yoherezaga mu Rwanda zigakundwa mu nsengero zitandukanye

Muri Mata 2021, byari byitezwe ko Israel Mbonyi agomba gukorera urugendo muri Israel muri gahunda bise ‘Twende Jerusalem’ igamije kuzamura umubano hagati y’icyo gihugu n’u Rwanda no guteza imbere impano z’urubyiruko n’urwego rw’ubuhanzi.

Uru rugendo ntirwabaye kubera ibibazo byatewe n’icyorezo cya Covid-19. Nyuma y’isubikwa ry’uru rugendo, hibazwa niba urugendo rwe rwarahagaritswe burundu.

Ambasaderi wa Israel mu Rwanda Ron Adam ari kumwe na Israel Mbonyi ubwo hatangizwaga ku mugaragaro gahunda ya ‘Twende Jerusalem’

 Lavie Mutanganshuro ushinzwe itangazamakuru muri Ambasade ya Israel, yavuze ko uru rugendo rwasubitswe bitewe n’icyorezo cya Covid-19, icyakora gahunda yimuriwe mu mpera za Nyakanga 2021.

Ati “Twizeye byibuza ko mu mpera za Nyakanga abantu bazaba bakingiwe bazaba bashobora gukorera urugendo nka ruriya muri Israel, hatagize igihinduka byibuza ibintu bikaguma gutya cyangwa bikaba byiza kurushaho uyu muhanzi yagenda icyo gihe.”

Mutanganshuro yavuze ko kugeza ubu bataramenya niba hari impinduka zizaba ku bitaramo Israel Mbonyi yagombaga kuzakorera muri Israel, avuga ko byose bizagenwa n’uko ibihe bizaba bihagaze.

Israel Mbonyi ari kumwe na  Ambasaderi wa Israel mu Rwanda Ron Adam

Mu Ukuboza umwaka ushize Ambasaderi wa Israël mu Rwanda, Ron Adam, yari yatangaje ko impamvu bahisemo Israel Mbonyi nk’umuhanzi wa mbere uzitabira gahunda ya ‘Twende Jerusalem’, ari uko ari umwe mu bafite umwihariko mu Rwanda.

Ambasaderi wa Israël mu Rwanda, Ron Adam mu gutangiza iyi gahunda ku mugaragaro, yavuze ko binyuze muri ‘Twende Jerusalem’ Mbonyi azakorera ibitaramo bine mu mijyi itandukanye yo muri Israël.

Related post

Leave a Reply

Your email address will not be published.