Papa Benedigito yasabye imbabazi nyuma y’iperereza riherutse kumukorwaho

 Papa Benedigito yasabye imbabazi nyuma y’iperereza riherutse kumukorwaho

Benedigito XVI wahoze ari Papa yasabye imbabazi nyuma y’ibimenyetso byagaragaye bimushinja kuba ntacyo yakoze ngo hahanwe abihayimana bakekwaho gusambanya abana ubwo yari Musenyeri wa Diyosezi ya Munich mu Budage.

Ku wa Kabiri ni bwo Vatican yasohoye ibaruwa y’amapaji atatu yanditswe na Papa Benedigito XVI, asaba imbabazi kuba ntacyo yakoze ngo abo bihayimana bakoze amahano bahanwe.

Mu kwezi gushize hashyizwe hanze raporo ku iperereza ryakozwe muri Diyosezi ya Munich, ku byaha byo gusambanya abana byakozwe n’abihayimana guhera mu 1945 kugeza mu 2019.

Iperereza ryagaragaje ko ntacyo Benedigito yakoze ngo ahagarike cyangwa ahane abihayimana bane bakekwagaho gusambanya abana ubwo yayoboraga Munich hagati ya 1977 na 1982.

Mu ibaruwa isaba imbabazi yagize ati “Nagiye ngira imirimo ikomeye muri Kiliziya Gatolika. Mbabazwa cyane n’ayo makosa yose yagiye akorwa ku buyobozi bwanjye”.

Yavuze ko yicuza kuba ntacyo yakoze kuri ibyo bibazo. Ati “Ku bagizweho ingaruka nabyo bose, mfite isoni n’ikimwaro ndetse n’agahinda, nkaba mbasaba imbabazi.”

Abanyamategeko ba Benedigito XVI wahoze yitwa Joseph Ratzinger, bavuze ko nubwo yasabye imbabazi bidasobanuye ko afite uruhare mu guhishira abashinjwa ibyaha by’ubusambanyi.

Bagaragaje ko ibyabaye byose atari abizi nubwo yabaga ari umuyobozi cyangwa se ngo habe hari abo yanze guhana kandi yabonye ibimenyetso simusiga by’ibyo bashinjwa.

Papa Benedigito yeguye ku mirimo ye mu 2013, aba uwa mbere ubikoze mu myaka myinshi ishize. Yimitswe mu 2005 nyuma y’urupfu rwa Papa Yohani Paul II.

Related post

Leave a Reply

Your email address will not be published. Required fields are marked *