Papa Francis agiye gusura RDC ariko ntazagera i Goma

 Papa Francis agiye gusura RDC ariko ntazagera i Goma

Papa Francis agiye gusubukura uruzinduko rwe muri Repubulika Iharanira Demokarasi ya Congo (RDC) ndetse no muri Sudani y’Epfo guhera tariki 31 Mutarama kugeza tariki 5 Gashyantare 2023.

Tariki 10 Kamena uyu mwaka nibwo Papa Francis yasubitse uru ruzinduko yagombaga kugirira muri ibi bihugu kubera impamvu z’uburwayi.

Kuri ubu uru ruzinduko agiye kurusubukura, ariko muri RDC ntazigera akandagira mu mujyi wa Goma nk’uko mbere byari biteganyijwe.

Papa Francis agiye gusura ibi bihugu nyuma yo gusura Kazakhstan na Bahrain.

Uruzinduko rwa mbere Papa azarukorera i Kinshasa tariki 31 Mutarama Papa aho azabanza kuganira n’abayobozi batandukanye.

Bukeye bwaho azasomera misa ku kibuga cy’indege cya Ndolo, naho ku gicamunsi ahure n’abagizweho ingaruka n’ubugizi bwa nabi bwakuruwe n’umutekano muke mu Burasirazuba bw’igihugu.

Kuwa 2 Gashyantare Papa Francis azahura n’urubyiruko muri Stade i Kinshasa, naho ku gicamunsi avuge isengesho n’abihayimana muri cathédrale Notre-Dame-du-Congo.

Biteganyijwe ko Papa azava muri RDC tariki 3 Gashyantare aho azabanza kuganira n’abashumba ba za diyosezi. Azahava akomeza i Juba muri Sudan y’Epfo, aho azahurira n’Umuyobozi Mukuru w’Abangilikani ku Isi, Justin Welby.

Papa Francis agiye muri RDC mu gihe mu Burasirazuba hari intambara ihuje ingabo za Leta n’umutwe wa M23, usaba ko amasezerano wasinyanye na Leta mu bihe bitandukanye ashyirwa mu bikorwa.

Protais MBARUSHIMANA

http://www.nkundagospel.rw

Related post

Leave a Reply

Your email address will not be published. Required fields are marked *