Papa Francis mu minsi ye ya nyuma ku buyobozi bwa Kiliziya Gatolika?

 Papa Francis mu minsi ye ya nyuma ku buyobozi bwa Kiliziya Gatolika?

Mu mezi atanu ashize byari ibisanzwe ubwo Papa Francis yatangiraga kwirinda guhaguruka ndetse bifatwa nk’ikibazo cyoroheje, ni bwo yatangaje ko afite ikibazo mu ivi ariko yongeraho ko ibyo bidatunguranye ku bantu bageze mu zabukuru ndetse icyo gihe yavugaga ko ari ikibazo kitazatinda.

Icyakora, muri Mata yareruye avuga ko ivi rye ry’iburyo ritarakira, bidatinze yatangiye kugendera mu igare ry’abafite ubumuga ndetse igitondo kimwe abwira imbaga y’abitabiriye misa ko bamwihanganira kuko atabasha guhaguruka ngo abasuhuze uko bisanzwe.

Uyu musaza w’imyaka 85, ubuzima bwe bukomeje gutuma benshi bamwibazaho n’ahazaza he ku murimo wo kuyobora ubushyo bw’Imana. Baribaza niba adashobora kuba yahitamo kwegura.

Abakurikiranira hafi ibya Kiliziya Gatolika, ingingo yo kwegura kwa Papa Francis barimo kuyivugaho bakomeje bitandukanye n’imyaka yabanje, ni nyuma yo kubagwa amara. Byiyongera ku kuba agendera mu kagare n’icyemezo cyo kuwa 27 Kanama cyo gushyiraho abakaridinali bashya 21 barimo 16 bafite munsi y’imyaka 80.

Kuba Papa Francis yaratoranyije abakaridinali barimo 60% by’abashobora kumusimbura, ni indi ngingo ishingirwaho y’uko yaba yitegura kuva ku mirimo ye.

Umwarimu wa Tewolojiya muri Kaminuza ya Villanova, Massimo Faggioli, avuga ko Papa Francis abizi ko arimo kwitegura kuva ku ntebe yo kuyobora Kiliziya.

Ati “Ikigaragara neza ni uko igihe cye cyo kuyobora kiliziya gatolika kigeze ku mpera aho no kwegura bishoboka cyane”.

Ibyo kwegura kwa Papa Francis binahuzwa n’uko akomeje gusubika ingendo zitandukanye yari afite. Kuri ubu yahagaritse urugendo yagombaga gukorera muri Repubulika Iharanira Demokasi ya Congo na Sudani y’Epfo kubera ikibazo cy’uburwayi bw’ivi.

Urugendo rw’uyu Mushumba muri Afurika rwari ruteganyijwe kuva ku itariki ya 2 Nyakanga kugera ku ya 7 uko kwezi. Byari byitezwe ko azaba ari kumwe n’Umuyobozi Mukuru w’Abangirikani ku Isi, Justin Welby.

Itangazo rya Vatican rivuga ko uru ruzinduko rwasubitswe kubera uburwayi bw’ivi.

Riti “Ku bw’ubusabe bw’abaganga ndetse no kwirinda gusubiza inyuma intambwe imaze guterwa mu buvuzi bw’ivi rye, Umushumba Mukuru yasabwe kwimura Urugendo muri Repubulika Iharanira Demokarasi ya Congo na Sudani y’Epfo rwari ruteganyijwe hagati ya tariki 2-7 Nyakanga, rwimurirwa ku itariki izatangazwa nyuma.”

Kuba yakwegura si igitangaza kuko n’uwo yasimbuye yareguye. Icyakora hari abasanga ashobora guhatiriza kuko Papa Benedict XVI yasimbuye akiriho. Uyu mukambwe ubu afite imyaka 95, iyo amaze yeguye iruta iyo yamaze ari Papa. Kuba kiliziya yagira aba-Papa babiri beguye baba i Vatican hari ababona cyaba ari ikindi kibazo.

Papa Francis nageze mu Ukwakira uyu mwaka akiyobora, azaba uwa mbere ubikoze nyuma ya Papa Leo XIII wapfuye mu 1903 afite imyaka 93.

nkundagospel

Related post

Leave a Reply

Your email address will not be published.