Papa Francis yaragije u Burusiya na Ukraine Bikira Mariya

 Papa Francis yaragije u Burusiya na Ukraine Bikira Mariya

Léonidas MUHIRE

Kuri uyu wa Gatanu tariki ya 25 Werurwe 2022, abakristu gatolika bakurikiye inyumvankumve igikorwa cyo gusengera no gusabira abari mu ntambara ya Ukraine n’u Burusiya cyabereye ku cyicaro cya Kiliziya Gatolika ku isi i Vatican.

Ibaruwa yoherereje abasenyeri gatolika bose ku isi mbere y’iki gikorwa, Papa Francis yari yabasabye kugira uruhare mu gusengera abari mu ntambara. Yaranditse ati: “Ndabasaba ko mwagira uruhare muri iki gikorwa, mukabwira abapadiri, abakristu n’abizera muri rusange guteranira mu kiliziya n’ahandi bashobora gusengera kuri uyu wa 25 Werurwe, kugira ngo ubwoko bw’Imana buzamure ijwi ry’umutima umenetse ryinginga umubyeyi wacu bikira Mariya’’.

Yakomeje agira ati: “Iki gikorwa cyo gutakambira Imana kigamije kuba ikimenyetso cya kiliziya ku isi yose, muri iki gihe giteye ubwoba, dusaba Imana binyuze kuri Bikira Mariya, gutaka kw’abababaye bose kandi basaba iherezo ry’urugomo no guha ejo hazaza heza inyokomuntu’’.

Papa Francis ubwo yari amaze kubwiriza abakristu bari bateraniye muri Basilica yitiriwe Mutagatifu Petero i Vatican, habaye akanya ko guceceka bazirikana ku bari mu ntambara. Iki gikorwa cyabaye mu masaha ya sa kumi n’imwe z’umugoroba ku isaha ya Vatican, cyari gikurikiwe mu Burusiya no muri Ukraine mu buryo bw’ikoranabuhanga ndetse n’ahandi henshi ku isi.

Related post

Leave a Reply

Your email address will not be published.