Patrick Nyamitari, Aline Gahongayire na Catholic All stars bagiye guhurira ku rubyiniro

 Patrick Nyamitari, Aline Gahongayire na Catholic All stars bagiye guhurira ku rubyiniro

Umuhanzi Patrick Nyamitari wamenyekanye mu ndirimbo zitandukanye, yateguye igitaramo yise “Back to Live” cyo kwizihiza Umunsi Mukuru w’ijyanwa mu ijuru rya Bikira Mariya, uzwi nka ‘Asomusiyo’.

Iki gitaramo kizaba ku Cyumweru tariki 14 Kanama 2022, ariko mu busanzwe umunsi wa Asomusiyo wizihizwa buri tariki 15 Kanama buri mwaka.

Mu Rwanda, uyu munsi wizihizwa n’abakristu bava mu bice bitandukanye bagahurira ku butaka Butagatifu i Kibeho ahabereye amabonekerwa y’Umubyeyi Mariya mu Karere ka Nyaruguru, maze bagafatanya gusenga no gushimira umubyeyi Bikira Mariya.

Nicyo gitaramo cya mbere Patrick Nyamitari ateguye kuva yava muri Kenya, akagaruka mu Rwanda kuhakorera umuziki. Nawe agisobanura nk’ikidasanzwe mu rugendo rw’umuziki we, kuko kinaherekejwe no gukomeza gutegura album ye nshya.

Patrick uzwi mu ndirimbo nka ‘Niwe mesiya’ yabwiye InyaRwanda ko iki gitaramo kigamije kongera kugarura ‘Patrick Nyamitari mu maso y’abakunzi be, mu maso y’abakunzi b’umuziki nyarwanda mu buryo bwisanzuye’.

Uyu muhanzi yabwiye Inyarwanda dukesha iyi nkuru, ko yateguye iki gitaramo mu rwego rwo kwigaragariza abamukunze mu bihe bitandukanye, bagiye bashima ibikorwa bye ariko ntibabasha kumubona imbona nkubone bitewe n’ibihe by’ubuzima.

Ati “Uyu ni umwanya wo kumenya ko mpari. Iki gitaramo ni nk’indamukanyo ingarura mu ruhando rwa muzika niko nabivuga, kandi ikaba ari intangiriro y’ibintu byinshi. Mfite za album zo gushyira hanze, mbese ni ibintu byinshi byo gushyira hanze nyuma y’iki gitaramo.”

Akomeza avuga ko yagihuje no kwizihiza umunsi mukuru wa Asomusiyo, kubera ko intangiriro y’urugendo rwe rw’umuziki ni ubuzima bushingiye kuri Kiliziya Gatolika.

Avuga ko umuryango we ari abakristu muri Gatolika, bimuha impamvu ikomeye y’iki gitaramo. 

Ati “Ni wo murongo w’imyemerere y’umuryango wanjye. Niho nakuriye ni naho burya namaze igihe kirekire, niho rero navuga ko nashoye imizi cyane mu rugendo rwanjye rwa muzika, n’ubwo naje no gukomeza nkajya n’ahandi.”

Patrick avuga ko aho washoye imizi haba hihariye ku buzima bwawe, uhafata nko mu rugo.

Uyu muhanzi yabaye muri korali zitandukanye akorana n’abandi batandukanye, ariko avuga ko St André ari yo yabaye imbarutso y’umuziki we kugeza n’ubu.

Avuga ko umuyobozi w’iki kigo ari we ‘wampaye icyizere cyo kwiyumvamo nk’umuhanzi birenze kuririmba’.

Muri iki gitaramo cye cya mbere, Patrick Nyamitari yatumiye umuhanzikazi mu ndirimbo zo kuramya no guhimbaza Imana Aline Gahongayire, ndetse na Catholic All Stars. Kizabera kuri Great Hotel Kiyovu guhera saa kumi n’ebyiri z’umugoroba.

Patrick avuga ko yatumiye Gahongayire birenze kuba akora umuziki, ahubwo ‘atekereza mu buryo bwagutse kandi akagira intego yerekana ko kuyoboka Imana, kuyikunda, kuyikorera no kuyikundisha abandi atari ibintu bigenwa n’abantu.

Yumvikanisha ko iki gitaramo ari n’umwanya wo kwereka abantu ko n’ubwo muri iki gihe bamwumva mu ndirimbo zisanzwe, bitavuze ko adashobora kongera kuvuga Imana. Ati “Ntabwo bivuga ko ntashobora kongera kuririmba Imana.”

Yavuze ko Catholic All Stars bari bamwegereye bamusaba ko bakorana indirimbo nk’uko basanzwe bazikorana n’abandi, basanga yamaze gutekereza no kubatumira muri iki gitaramo yateguye.

Patrick yavuze ko iki gitaramo kizaba n’umwanya mwiza kuri we, wo gushimira buri wese wagize uruhare mu rugendo rw’umuziki we.

Kwinjira muri iki gitaramo ni 10,000 Frw mu myanya isanzwe na 15,000 Frw muri VIP. Ku meza y’abantu batandatu wishyura ibihumbi 150 Frw ugahabwa amacupa abiri ya wine, ni mu gihe ku bantu 4 bishyura ibihumbi 90 Frw harimo icupa rimwe rya wine. 

Protais MBARUSHIMANA

http://www.nkundagospel.rw

Related post

Leave a Reply

Your email address will not be published.