Perezida w’u Burusiya n’uwa Ukraine basabwe nibura agahenge k’iminsi 10 mu gihe cya Pasika

 Perezida w’u Burusiya n’uwa Ukraine basabwe nibura agahenge k’iminsi 10 mu gihe cya Pasika

Franklin Graham uyobora umuryango w’abagiraneza witwa ‘Samaritan’s Purse International Disaster Relief’ uri mu bikorwa by’ubutabazi mu ntambara kuri uyu wa 2 Mata 2022 yasabye perezida Vladimir Putin w’u Burusiya na mugenzi we Volodymir Zelensky wa Ukraine kuzatanga nibura iminsi 10 y’agahenge nta bisasu biraswa mu minsi yo kwizihiza Pasika cyane cyane ku banya-Ukraine batorohewe n’isibaniro ry’intambara.

Mu butumwa yanyujije ku rukuta rwe rwa Twitter, bwana Graham yavuze ko yandikiye perezida Putin na mugenzi we Zelenskyy abasaba ko imirwano yazahagarara guhera ku wa Gatanu Mutagatifu Pasika nyirizina ibura iminsi ibiri ngo ibe. Yagize ati: “Hari uwambajije impamvu nasabye guhagarika imirwano mu iminsi 10 gusa. Niba bashobora guhagarika imirwano icyumweru cyangwa iminsi 10, birashoboka ko bashobora no guhagarika imirwano mu byumweru bibiri. Niba kandi bayihagaritse mu byumweru bibiri bigashoboka, bashobora no kuyihagarika ukwezi. Niba bayihagaritse ukwezi rero biranashoboka ko bayihagarika burundu”.

Muri ubwo butumwa yakomeje ahamagarira abanyamadini bo ku isi hose gusengera amahoro nibura mu minsi 10 yo mu gihe cya Pasika mu rwego rwo gufasha abavandimwe ba Ukraine mu gihe cy’izuka ry’Umukiza. Ati: “Nimucyo twicishe bugufi imbere y’Umwami w’Abami Nyagasani tumusabe kugira icyo akora no gukorera mu mitima y’abayobozi bireba kugira ngo amakimbirane arangire”.


Kwizihiza izuka ry’Umukiza (Pasika) uyu mwaka biteganyijwe ku Cyumweru k’itariki ya 17 Mata 2022. Mu Burusiya na Ukraine habarizwa abakristu benshi kandi bizihiza Pasika cyane cyane abo mu idini ry’Aba-Orthodox.

Habarurwa insengero nyinshi zangiritse bikomeye muri Ukraine


Ikinyamakuru ‘BBC’ cy’Abongereza kigaragaza ko kuva intambara yatangira ibitero by’u Burusiya bimaze kwangiza inzu nyobokamana zigera kuri 59 mu gihugu cya Ukraine hose harimo cathedral zinyuranye za Orthodox, amashuri y’Abayahudi n’amaparuwasi anyuranye yangiritse bikomeye. N’ubwo ‘BBC’ igaragaza ibi mu mafoto ariko, u Burusiya buhakana ko butigeze bwibasira ibikorwa remezo bya gisivili.

Mbere y’intambara Ukraine yari igihugu gifite insengero z’ubwiza butangaje

Related post

Leave a Reply

Your email address will not be published.