Pst Niyitanga uregwa kunyereza miliyoni 42 Frw za ADEPR, yabuze ibisobanuro bya miliyoni 6,5 Frw yahawe abanyamakuru

 Pst Niyitanga uregwa kunyereza miliyoni 42 Frw za ADEPR, yabuze ibisobanuro bya miliyoni 6,5 Frw yahawe abanyamakuru

Urubanza rw’ubujurire ruregwamo abahoze ari abayobozi bakuru ba ADEPR bakurikiranyweho kunyereza umutungo w’itorero rwakomeje humvwa ubwiregure bwa Pasiteri Niyitanga Salton wari ushinzwe Ivugabutumwa n’Ubuzima bw’Itorero.

Uru rubanza ruregwamo 12 barimo abari abayobozi bakuru ba ADEPR muri manda ya Bishop Sibomana Jean [wari Umuvugizi wa ADEPR] na Bishop Tom Rwagasana [wari Umuvugizi wungirije]. Bacyekwaho icyaha cyo kunyereza umutungo w’itorero no gukoresha inyandiko mpimbano.

Rwatangiye kuburanishwa n’Urukiko Rwisumbuye rwa Gasabo mu 2017 ndetse mu Ugushyingo 2018, icyenda muri bo barimo Bishop Sibomana na Rwagasana bagizwe abere.

Nyuma ADEPR, Ubushinjacyaha na batatu bakatiwe bajuririye Urukiko Rukuru mu 2019 bagaragaza ko batanyuzwe n’icyemezo cy’urukiko. Ku wa 27 Kamena 2021 ni bwo urubanza rwatangiye kuburanishwa mu bujurire.

Abaregwa bose batangiye kwiregura imbere y’urukiko bahakana ibyaha bashinjwa byo kunyereza arenga miliyari 6 Frw. Muri uru rubanza ADEPR irahagarariwe aho iregera indishyi.

Kuri uyu wa Mbere, tariki ya 14 Gashyantare 2022, hari hagezweho Pasiteri Niyitanga Salton uregwa kunyereza miliyoni 42 Frw.

Niyitanga wunganiwe na Me Emmanuel Nsengiyumva, yahakanye ibyo ashinjwa avuga ko amafaranga yahawe n’ubuyobozi bwa ADEPR kugira ngo ayakoreshe mu bikorwa by’ivugabutumwa bitandukanye birimo n’ibyagombaga kunyuzwa mu bitangazamakuru bitandukanye mu Rwanda.

Inteko y’abacamanza batatu n’umwanditsi w’urukiko ni yo iburanisha uru rubanza mu gihe Ubushinjacyaha buhagarariwe n’abashinjacyaha babiri.

Pasiteri Niyitanga yavuze ko hari abanyamakuru yahaye amafaranga, babajijwe barabihakana

Umushinjacyaha Habarurema Jean Pierre yavuze ko Pasiteri Niyitanga akurikiranywe ku byaha bibiri birimo icyo gukoresha inyandiko mpimpano n’icyo kurigisa umutungo wa ADEPR.

Yavuze ko yanyereje 42.399.300 Frw mu bihe bitandukanye nk’uko byashyizwe mu mwanzuro w’ubujurire. Bwongeyeho ko hari 6.500.000 Frw yabikuje akoresheje inyandiko mpimbano akaba atarerekanye icyo ayo mafaranga yakoze.

Habarurema yavuze ko Pasiteri Niyitanga yasobanuye ko amafaranga yayashyize mu ivugabutumwa hifashishijwe itangazamakuru. Yabwiye urukiko ko amazina y’abanyamakuru n’umubare w’amafaranga yabahaye ariko abo yavuze bose ubwo babazwaga barabihakanye. Hari aho basanze umukono w’abahawe amafaranga udahura n’uwo basanzwe bakoresha cyangwa nimero z’indangamuntu zinyuranye.

Habarurema yagize ati “Ni ikimenyetso cy’icyaha cyo kunyereza ya mafaranga yanditsweho, kikaba n’ikimenyetso cy’icyaha cyo gukoresha inyandiko itavugisha ukuri. Ni ukuvuga ngo ni ibuye rimwe riri kwica inyoni ebyiri. Ibimenyetso yatanze bivuga ko nta mafaranga yanyerejwe, ni byo Ubushinjacyaha bufite bivuga ko amafaranga yakoreshejwe mu bitari ukuri.’’

Izo ngingo ni zo Ubushinjacyaha buheraho burega Pasiteri Niyitanga kunyereza umutungo wa ADEPR hifashishijwe inyandiko mpimbano.

Abanyamakuru [barimo abandika, abakorera radio na televiziyo] bashyizwe mu majwi bose Ubushinjacyaha bwavuze ko bwababajije bakabihakana bakavuga ko nta mafaranga yabahaye mu izina ry’ibigo bakorera.

Ubushinjacyaha bwamaze iminota 30 busobanura imiterere y’icyaha bukurikiranyeho Pasiteri Niyitanga.

Mu kwiregura kwe yahakanye ibyavuzwe n’Ubushinjacyaha asaba urukiko ko mu bushishozi bwarwo bwazabisuzuma rukamugira umwere, rukagumishaho icyemezo cy’Urukiko Rwisumbuye rwa Gasabo cyo mu 2018.

Pasiteri Niyitanga yavuze ko nta bugenzuzi yakorewe ngo hemezwe ko yanyereje miliyoni zirenga 42 Frw zavuzwe n’Ubushinjacyaha.

Yabwiye urukiko ko muri ADEPR yari ashinzwe Ivugabutumwa kandi ko bumwe mu buryo yakoreshaga kugira ngo ubutumwa bwiza bugere kure hashoboka harimo no gukoresha itangazamakuru. Yavuze ko “hakoreshwaga amafaranga avuye mu buyobozi bwa ADEPR.’’

Pasiteri Niyitanga yavuze ko inshingano yari afite yazimazemo imyaka isaga ibiri akorera ADEPR mu buryo buhoraho kandi yakoranaga n’itangazamakuru akanakurikirana ibinyuzwamo.

Yerekanye uko amafaranga yahawe abanyamakuru yakoreshejwe, harimo nka miliyoni 2 Frw yahawe uwakoze filime ngufi yerekana aho imirimo yo kubaka Dove Hotel ya ADEPR yari igeze, ni amashusho yagombaga kwerekwa abakirisitu.

Yasoje avuga ko amafaranga yose Ubushinjacyaha bwavuze yanjereje bwabeshye kuko yayahabwaga n’ubuyobozi bwa ADEPR bwariho icyo gihe akayakoresha icyo yagenewe kuko “ivugabutumwa ryari mu nshingano zanjye.”

Uyu munsi kandi humviswe ubwiregure bwa Twizerimana Emmanuel wahoze ari umwubatsi wa Dove Hotel. Uyu akurikiranyweho kunyereza umutungo wa ADEPR usaga miliyoni 10 Frw.

Twizerimana yavuze ko yahawe sheki ya miliyoni 10 Frw n’uwitwa Beninka Bertin wahoze ari Umucungamutungo wa ADEPR.

Yasobanuye ko ibyavuzwe n’Ubushinjacyaha atari byo kuko yagiranye amasezerano n’ubuyobozi bwa ADEPR yo kubaka igisenge cya Dove Hotel kuri miliyoni 17 Frw. Akazi yahawe si we wagakoze ahubwo kahawe undi, mu gihe cyo kwishyurwa aba ari we uhabwa sheki ya miliyoni 10 Frw.

Twizerimana yavuze ko yagize ngo akazi kananiye uwagahawe ndetse amaze kubona izo miliyoni yahise ahemba abakozi 47 bari bubatse igisenge abaha miliyoni 7 Frw.

Akivuga ko yahembye abakozi atakoresheje, Ubushinjacyaha bwamuvuguruje buvuga ko n’uwahawe akazi [Jonas] yavuze ko abo bakozi ari we wabahembye.

Urukiko rwasabye impande zombi kuzerekana uko zahembye abo bakozi bubakaga igisenge cya Dove Hotel.

Nyuma y’iburanisha ryamaze amasaha atandatu, Ubushinjacyaha bwasabye ko risubikwa rikazakomeza ku wa 15 Gashyantare 2021 humvwa ukwiregura kwa Pasiteri Sindayigaya Théophile wahoze ashinzwe kubakisha Dove Hotel.

IGIHE

Related post

Leave a Reply

Your email address will not be published.