Putin yatangiye kwamaganwa n’abaturage be b’abakristu

 Putin yatangiye kwamaganwa n’abaturage be b’abakristu

Léonidas MUHIRE

Abapadiri n’abadiyakoni barenga 280 bo mu idini rya Orthodox mu Burusiya basabye igihugu cyabo ko cyahagarika intambara kirwanamo n’abaturanyi babo bo muri Ukraine igiye kumara hafi ibyumweru bibiri.

Mu ibaruwa ifunguye yasinyweho n’abantu 284, b’idini rya Orthodox mu Burusiya igasohoka mu gitondo cy’ejo ku cyumweru, banditse basaba ko abayoboke babo bose bahangayikishijwe bikomeye n’intamabara bakaba basaba ko habaho guhagarika intambara byihuse ndetse n’ubwiyunge hagati y’igihugu cyabo n’abavandimwe bo muri Ukraine.

Abandi bakristu b’amadini y’ivugabutumwa atandukanye mu Burusiya barenga 400 na bo bashyize umukono ku ibaruwa ifunguye bamagana gutera Ukraine kwakozwe n’Uburusiya. Agace gato k’iyo baruwa kagira kati: “Ingabo zacu zirimo gukora ibikorwa bya gisirikare byuzuye mu kindi gihugu, zitera ibisasu na roketi mu mijyi y’abaturanyi ba Ukraine. Nk’abizera, dufata ibyo nk’icyaha gikomeye cyo kwica umuvandimwe; icyaha cya Kayini wazamuye ukuboko kwe akica murumuna we Abeli”.

Iyi baruwa kandi ikomeza ivuga ko nta nyungu za politiki cyangwa intego zatuma habaho kubangamira uburenganzira bw’abandi n’urupfu rw’inzirakarengane kandi ko urwo rwango ruri kubibwa hagati y’ibihugu byombi ruzagira ingaruka mbi no mu bihe bizaza.

Iyi baruwa Orthodox yandikiye leta, ije nyuma y’indi yanditswe n’Inama Nkuru y’Amadini ku Isi isaba umwepisikopi Kirill wa Moscou uyobora abakirisitu ba Orthodox barenga miliyoni 100 mu Burusiya igamije kugira ngo azamure ijwi rigera kure yamagane Perezida Vladimir Putin amusaba guhagarika intambara kuri Ukraine.

Ibiro by’agashami k’Umuryango w’Abibumbye gashinzwe Uburenganzira bwa Muntu ku wa gatandatu byatangaje ko nibura abaturage bo muri Ukraine basaga 351 bamaze kuburira ubuzima muri iyi ntambara abandi bagera kuri 707 bakaba bamaze gukomereka. Byongeye kandi abantu barenga miliyoni imwe bamaze guhunga Ukraine kuva ku ya 24 Gashyantare ubwo intamabara yatangiraga.

Umuryango Mpuzamahanga ushinzwe Abinjira n’Abasohoka wavuze ko intamabara y’Uburusiya na Ukraine ari igikorwa gikomeye kibaye ku nyoko muntu mu Burayi kuva Intambara ya Kabiri y’Isi yose yarangira mu w’1945. Na none kandi abaturage ba Ukraine barenga miliyoni enye bamaze gukurwa mu byabo n’iyi ntambara imbere mu gihugu cya Ukraine.

Related post

Leave a Reply

Your email address will not be published. Required fields are marked *