Rose Muhando agiye kugaruka gutaramira mu Rwanda

 Rose Muhando agiye kugaruka gutaramira mu Rwanda

Umuhanzikazi w’indirimbo zihimbaza Imana ukomoka muri Tanzania, Rose Muhando ategerejwe i Kigali, muri Canal Olympia, ku i Rebero, kuitaliki ya 6 Werurwe 2022, mu birori byateguwe na Rwanda Gospel Stars Live, igikorwa cyaje gushyigikira abahanzi bakora umuziki wo kuramya no guhimbaza Imana, dore ko muri ibi birori abahanzi bahize abandi bazahabwa ibihembo bishimishije,

Uyu muhanzikazi Rose Muhando azagera mu Rwanda, ku italiki ya 4 Werurwe aho azasura ibikorwa bitandukanye, akaganira n’abahanzi ku mateka ye ndetse akanabona n’umwanya uhagije wo kwitegura.

Usibye kandi uyu muhanzi wubatse izina muri Afurika yose, cyane cyane Afurika y’Iburasirazuba, Rose Muhando, hari n’abandi bahanzi nyarwanda b’ibirangirire bazasusurutsa abanyarwanda n’abakunzi b’umuziki muri rusange, mu buryo bw’umwihariko, barimo: Gaby Kamanzi, Israel Mbonyi, Aline Gahongayire, Theo Bosebabireba, Kingdom Ministries na Gisubizo Ministries, dore ko bazaririmba umwanya muremure.

Nanone kandi abahanzi bose uko ari 15 bari muri iki gikorwa: Rata Jah Naycha, Giselle Precious, Annette Murava, Serge Iyamuremye, Aline Gahongayire, Kingdom Ministries, MD, Tonzi, Aime Frank, James Daniela, Theo Bosebabireba, True Promises Ministries na Gisubizo, nabo bazihuza baririmbe indirimbo imwe izaba idasanzwe.

Mu kiganiro cyihariye Nkunda Gospel yagiranye na Bwana Aimable Nzizera, umuyobozi wa Rwanda Gospel Stars live, yatangaje ko iki gikorwa giteguye neza ndetse asaba abakunzi b’umuziki kuzaza kubashyigikira anahamya ko bazahabwa ibyishimo ku rwego rwo hejuru. Bwana Nzizera kandi yanakomoje ku biciro byo kwinjira muri iki gitaramo cy’imbaturamugabo.Yagize ati:

”Iki gikorwa twagiteguye neza ku buryo abakunzi b’umuziki bazagira ibyishimo biri hejuru. Hari abahanzi 6 bazaririmba mu buryo buri special, aho bazaririmba indirimbo zabo mwakunze, ndetse n’itsinda ry’abantu 15 bari muri iki gikorwa rizahabwa umwanya wo gususurutsa abitabiriye igitaramo. Vuba aha tugiye kubatangariza ibijyanye n’ibiciro kandi turizera ko bizaba binogeye buri wese.”

Rwanda gospel stars live ni igikorwa (Event) ngarukamwaka cyateguwe na sosiyete y’abikorera ari yo Metts Rwanda Service. Abahanzi bari mu gikora cya Rwanda Gospel Stars live ni 15, buri umwe akaba afite umushinga uzagirira akamaro abanyarwanda yaba mu byo aba bahanzi bakora umunsi ku munsi bibafasha cyangwa bifasha abanyarwanda muri rusange, harimo gufasha abatishoboye, kubaka ibikorwa remezo bijyanye no kuramya no guhimbaza Imana, gusubukura ibikorwa bari baratangiye bikabura ubushobozi n’ibindi.

Umuhanzi uzaba ahiga abandi kugira umushinga mwiza no gushyigikirwa cyane, azashyikirizwa Miliyoni 7 z’amafaranga y’u Rwanda ziyongera ku yo yagiye ahabwa mu gushyigikira umushinga we kubera ko nta muhanzi uzataha amaramasa bitewe n’uko iyo umushyigikiye amafaranga ajya ku mufuka we, agasanga andi umuhanzi aba yarahawe yo kumufasha kwitegura.

Umuhanzi wa kabiri azashyikirizwa ibahasha irimo miliyoni 2 z’amafaranga y’u Rwanda, mu gihe uwa gatatu azahabwa miliyoni imwe.

Mu cyiciro cy’abahanzi bari kuzamuka neza harimo abahanzi bane: Annette Murava, Giselle Precious, Aime Frank na Rata Jah Naycha, hakaba hazahembwamo abahanzi 2 aho uwa mbere azahabwa igihembo gihwanye na miliyoni imwe, mu gihe uwa kabiri azahabwa amafranga y’u Rwanda, ibihumbi 500.

Abahanzi bari mu gikorwa cya Rwanda Gospel Stars Live

Related post

Leave a Reply

Your email address will not be published.