Ubuhumwa bw’ihumure ku bizera bose bukubiye mu ndirimbo Nshya ya Mami Espe

 Ubuhumwa bw’ihumure ku  bizera bose bukubiye mu ndirimbo Nshya ya Mami Espe

Nyuma y’indirimbo ye yakunzwe na benshi ARABIZI, Mami Espe yashize hanze indi ndirimbo nshya yise NTIRUZATUNANIRA.

Umuhanzikazi Mami Espe, wamenyekanye cyane mu ndirimbo yasubiyemo ya Israel Mbonyi, SINZIBAGIRWA, ndetse na NAMENYE NEZA ya Korali ye aririmbamo Holy Nation, yongeye gushyira hanze indirimbo ihumuriza imitima y’abizera.

NTIRUZATUNANIRA ni indirimbo irimo amagambo ashimangira ko Imana izarwanirira abayisunga bose. Ni indirimbo y’iminota 5 n’amasegonda 43, iri mu njyana ya zouk.

Mami Espe mumwambaro mwiza ugaragara mu mashusho yiyi ndirimbo

Mu butumwa bugufi yatanze bwaherekeje iyi ndirimbo ku murongo we wa YouTube, yagize ati “ Muraho neza Nshuti z’umusaraba, Nifuje kubasangiza Indirimbo nise NTIRUZATUNANIRA, ni indirimbo Isubizamo abantu imbaraga , ibibutsa ko nubwo turwana n’umwanzi ariko UWITEKA adukiza muri byose”

Mu kiganiro yagiranye na Nkundagospel, Umuhanzikazi Mami Espe, yagize icyo avuga ku butumwa yifuza ko abantu bakura muri iyi ndirimbo ye nshya, yagize ati “Indirimbo NTIRUZATUNANIRA, yaturutse ku ijambo ry’Imana riri mu Abefeso 3:20, nashakaga kubwira abantu ko uko intambara yaba imeze kose Imana ibasha gukora cyane ibiruta ibyo dusaba ndetse nibyo twifuza kandi nubwo Satani aturasa imyambi, urugamba rutazananira abizera kuko Kristo ahora mu ruhande rwabo bazanesha”

Mu gusoza iyi ndirimbo, Mami, ahumuriza abantu ababwira ko Imana izaca inzira mu butayu, ni Imana nziza, yuzuye Ubuntu n’ibambe

Amashusho yiyi ndirimbo anogeye ijisho yatunganijwe na Dir Sabey Gilbert, umusore umaze kwigarurira imitima y’abahanzi n’amakorali atari make kubera uburyo ari kugaragaza umwihariko mu mashusho akora.Naho amajwi n’umuziki by’iyi ndirimbo byatunganijwe na Boris, producer (soma poroduyusa) uzwiho ubuhanga mubyo gutunganya umuziki.

Mami Espe atangaza ko nyuma yiyi ndirimbo aticaye, yagize ati “Abakunzi banjye, abakunda indirimbo zanjye n’abandi bose bafashwa nazo, Ndabakunda kandi ntabwo nzabatenguha, ntabwo nzongera kugenda ngo mpere kandi ndabizeza ko ngiye kurushaho gukora cyane”

Mami Espe arashima abamufashije bose ngo iyi ndirimbo ibashe kugera hanze.

Indirimbo ndetse n’ibindi bikorwa bye wabisanga ku muyoboro abicishaho wa youtube, uri mu mazina ye, Mami Espe.

Umva indirimbo nshya NTIRUZATUNANIRA ya Mami Espe

Related post

Leave a Reply

Your email address will not be published.