Ubushakashatsi: Abagera kuri 11% by’abazize Jenoside yakorewe Abatutsi mu hahoze ari Kibungo baguye mu nzu nyobokamana

 Ubushakashatsi: Abagera kuri 11% by’abazize Jenoside yakorewe Abatutsi mu hahoze ari Kibungo baguye mu nzu nyobokamana

Turi mu gihe cyo kwibuka ku nshuro ya 28 Jonoside yakorewe Abatutsi mu mwaka w’1994. Muri uwo mwaka byari ibihe by’izitane kubicamo aho ababyeyi bishwe n’abo babyaye, imiryango yicwa n’abo basangiraga. Abashyingiranye n’abakamiranye na bo ntibubashye ibyo bihango. Ariko ikindi kibabaje cyane ni uko n’abatarisibaga mu nzu nyobokamana basenga Imana batubashye iryo zina ngo barokore ubuzima ahubwo na bo biraye mu bo basenganaga ntibanatinya za aritari n’uruhimbi maze mu nsengero naho bahagira itsembero. Bamwe mu bayoboke bishwe n’abo basangiraga igaburo ryera n’ukarisitiya abandi ndetse hari n’aho batatinye gutwikira mu nsengero imbaga yari yaje ihahungiye nk’ahantu nyobokamana. Twubakiye ku bushakashatsi bwakozwe n’icyahoze ari Komisiyo y’Igihugu yo Kurwanya Jenoside (CNLG), reka turebere hamwe Abatutsi baguye muri za Kiliziya n’insengero mu hahoze ari Perefegitura ya Kibungo. Ubu ni mu karere ka Ngoma mu Burasirazuba bw’u Rwanda.

Ubushakashatsi bwakozwe n’umushakashatsi HITIMANA Justine w’cyahoze ari Komisiyo y’Igihugu yo Kurwanya Jenoside (CNLG) muri Kamena 2019. Uyu mushakashatsi yakoze ku mateka y’itegurwa n’ishyirwa mu bikorwa rya Jenoside yakorewe Abatutsi mu yahoze ari Perefegitura ya Kibungo, bugaragaza ko 11% by’abazize Jenoside yakorewe Abatutsi muri iyi Perefegitura baguye muri za Kiliziya n’insengero.


Ubu bushakashatsi bwakorewe mu zahoze ari Komine 11 zari zigeze icyahoze ari Perefegitura ya Kibungo, bugaragaza ko muri aya makomine uko ari 11, Jenoside yahitanye abasaga ibihumbi 182 mu byumweru bitatu.
Kibungo yari igizwe na Komini 11 zirimo Muhazi, Kayonza, Rutonde, Kabarondo, Rukara, Kigarama, Birenga, Sake, Bugesera, Rukira na Rusumo, ubu ni mu turere twa Kirehe, Ngoma, Kayonza, n’igice cya Rwamagana mu Ntara y’Iburasirazuba.


Ubu bushakashatsi bufite ibice bitanu birimo ikivuga uko Abatutsi bakuwe mu bice bitandukanye by’igihugu bajyanwa gutuzwa i Kibungo na Bugesera, amacakubiri yabibwaga mu baturage kuva ku butegetsi bwa Perezida KAYIBANDA wigeze no kuvuga ko “u Rwanda ni urwa Gahutu” n’ibindi.
Bugaragaza uko abayobozi bateguye Jenoside n’uko abayikoze bari hirya no hino bakatiwe n’inkiko Gacaca, inkiko zisanzwe z’u Rwanda n’Urukiko Mpanabyaha Mpuzamahanga Rwashyiriweho u Rwanda.
Ubu bushakashatsi bugaragaza kandi ko muri Kibungo hari umwihariko w’uko imitwe yitwara gisirikare yari yarateguwe kandi yaratojwe ku bwinshi, irimo Interahamwe n’Impuzamugambi, Simba Batallion.
Hari kandi umutwe w’Abazayire washyizweho na Depite MUTABARTUKA Sylvan, Abayisiraheli bitwaraga gikomando, Abakaceri n’Abandi.


Bugaragaza kandi ko Jenoside yakorewe Abatutsi muri Kibungo yatangiye tariki 7 Mata irangira tariki 26 Mata, kuko Ingabo za FPR Inkotanyi zafashe Kibungo yose ku wa 27 Mata 1994.
Abagize uruhare muri Jenoside ni abategetsi bo ku rwego rwo hejuru n’abo mu nzego za gisirikare barimo Col Pierre Celestin RWAGAFIRITA wanayoboye Jandarumori (Gendarmerie), MUGENZI Justin na MUGIRANEZA Prosper bigeze kuba abaminisitiri, Tito BARAHIRA, Octavien NGENZI bayoboye Komini Kabarondo n’abandi. Aba bose baburanishijwe n’Inkiko zitandukanye.
Ubushakashatsi kuri Jenoside muri Kibungo bwakozwe hifashishije abatangabuhamya bagera ku 110 bafite nibura imyaka 40 y’amavuko kandi mu gihe cya mbere no muri Jenoside yakorewe Abatutsi babaga muri ako gace; barimo abarokotse Jenoside, abarokoye abahigwaga, abakoze jenoside n’abakatiwe n’inkiko bafungiye hirya no hino muri za gereza.


Hifashishijwe kandi inyandiko zifite aho zihuriye na Jenoside yakorewe Abatutsi z’Inkiko Gacaca, Urukiko Mpanabyaha Mpuzamahanga Rwashyiriweho u Rwanda, inyandiko za Auditorat Militaire n’izagiye zivanwa mu biro by’Uturere.
CNLG yahisemo gukora ubushakashatsi ku mateka ya Jenoside yakorewe Abatutsi hakurikijwe uko inzego z’ubutegetsi zari zimeze. Kuri ubu hamazegukorwa ubushakashatsi ku mateka ya Jenoside mu zahoze ari Perefegitura za Gisenyi, Ruhengeri na Kibungo.

N’ubwo nta bushakashatsi burakorwa mu gihugu hose bugaragaza ijanisha rusange ry’Abatutsi baguye mu nzu nyobokamana, ntibivuze ko i Kibungo abayoboke b’amadini batatiye igihango bakijandika muri Jenoside. Hirya no hino mu gihugu amateka agaragaza ahanyuranye hiciwe nabi Abatutsi benshi bari bahahungiye bahizeye nk’ahantu nyobokamana. Ubu uyu munsi ayo mateka ababaje kandi ateye agahinda ku bemera Imana yarabaye kandi yasize icyasha umurimo w’Imana. Kuko rero Jenoside yabaye kandi ibyo tukababa tutabihindura, abayoboke b’amadini anyuranye bakwiye kwigira kiri ayo mateka bakiyubakamo Abakristu bazima kandi barajwe ishinga no kubaka igihugu kizira Jenoside ukundi.

Related post

Leave a Reply

Your email address will not be published.