Uganda: Umugabo yatemye umugore we amuziza ko yabaye umukristo

 Uganda: Umugabo yatemye umugore we amuziza ko yabaye umukristo

Umubyeyi ufite imyaka 26, unamaze kwibaruka abana 2 mu gihugu cya Uganda ubu ari koroherwa nyuma yo gusogotwa icyuma n’umugabo we w’umuhezanguni mu idini ya Isilamu amuziza ko yakiriye Yesu nk’Umwami n’umukiza we.

Uyu mubyeyi witwa Zaina Gimbo, uturuka mu gace ka Sirinya B Island, ho mu karere ka Mayuge hafi n’inyanja ya Victoria yuzuye ibikomere mu maso ye, mu mutwe, mu mugongo ndetse no mu biganza, nkuko byatangajwe n’ikinyamakuru Morning Star News.

Uyu mubyeyi ukiri muto anafite abana bakiri bato dore ko umuhungu muto afite imyaka 4, mu gihe umukobwa we w’imfura afite imyaka 5 y’amavuko. Uyu mubyeyi wakiriye Yesu nk’Umwami n’umukiza we mu ibanga ku italiki ya 2 Mata, yaje gutungurwa n’igitero yagabweho n’umugabo we ku italiki ya 17 Mata ubwo yari avuye muri misa yo kuri Mashami.

Uyu mubyeyi yatangaje ko yagiye gusenga kubera ko yari azi ko umugabo we yagiye kuroba ariko kubwo amahirwe make uyu mubyeyi agataha afashe Bibiliya maze agatungurwa nuko uyu mugabo witwa Jamiru Mwima yari yatashye hakiri kare akamutanga mu rugo. Yagize ati:

” Byari agatangaza ndetse n’ibyishimo byinshi umunsi nagiye gusenga. Gusa ibintu byaje guhinduka ubwo natahaga saa saba z’amanywa ngasanga umugabo wanjye yatashye avuye kuroba. Njye sinamenye ko yatashye ahubwo naje mfite Bibiliya ndikuririmba indirimbo z’umunezero ndetse z’abakristo nari numvise mu rusengero.” Yakomeje agira ati:

“Ubwo nageraga mu rugo umugabo wanjye yasohotse mu nzu yiruka nk’ingeragere anafite umujinya mwinshi, maze atangira kumbaza ibibazo byinshi bijyanye no kwemera kwanjye, nanjye sinagira ijambo na rimwe musubiza. Ubwo yahise atangira kumpondagura ibibando no kuntemesha umuhoro mure mure. Nahise nsakuza cyane maze abantu barahurura bamunkuraho ariko nikubita hasi nkomeza no kuva amaraso menshi ndetse ntakaza n’ubwenge, gusa inshuti n’abaturanyi bahise banjyana kwa muganga”

Hirya no hino ku isi abantu bakomeje kwicwa bazira imyemerere ya Gikristo. Urugero ni uko nanone ku munsi umwe muri iki gihugu cya Uganda umugore wo mu gace ka Nawanjof, mu karere ka Butaleja yashyize uburozi mu biryo by’umugabo we amuziza ko yabaye umukristu.

Uyu mugabo warozwe witwa Hiire Sadiki, ufite imyaka 56, wahoze uri umwarimu mu idini ya Isilamu, umugore we yashatse kumwivugana kubera ko yananiwe gukurikiza imihango ya Ramadan ndetse akanamwumva asenga avuga izina rya Yesu.

Nubwo mu gihugu cya Uganda abenshi ari abakristu ariko usanga abahezanguni b’idini ya Isilamu bashaka guhindura abantu abayoboke b’idini ya Isiliamu ku ngufu, dore ko ubushakashatsi buherutse kwerekana ko 11.5% by’abaturage ba Uganda gusa ari bo basengera mu idini rya Isilamu kandi abenshi muri bo ari Abasuni.

Related post

Leave a Reply

Your email address will not be published.