Uganda:Umuvugabutumwa ararembye nyuma yo gukubitwa n’abayisilamu

 Uganda:Umuvugabutumwa ararembye nyuma yo gukubitwa n’abayisilamu

Léonidas MUHIRE

Charles Kamya w’imyaka 43 y’amavuko ukora ivugabutumwa rya gikristu muri Uganda arembeye mu bitaro nyuma yo gukubitwa bikomeye hafi kwicwa n’intagondwa z’abayisilamu ubwo zamuhatiraga kujya impaka nazo ku myemerere ya Isilamu n’iya gikristu.

Inkuru yatangajwe n’Ikinyamakuru ‘Eternity News’ ivuga ko ku tariki ya 29 Mutarama mu murwa mukuru wa Uganda, Kampala intagondwa z’abayisilamu zahagaritse mu nzira imodoka y’umuvugabutumwa w’umukristu witwa Charles Kamya nyuma y’impaka barimo zerekeye ubukirisitu na Isilamu maze baramukubita kugeza ataye ubwenge hafi yo gushiramo umwuka.

Mu magambo ye aganirira n’Ikinyamakuru ‘Morning Star’ mu bitaro aho arembeye yavuze ko yahagaritswe n’abagabo babiri hafi y’ahaberaga impaka mu gace ka Bwaise i Kampala, ati: “Nahagaritse imodoka yanjye nsanga ntegerejwe n’abandi bayisilamu batandatu bambaye imyenda ya kisilamu bari mu gihuru ahagana mu masaha ya saa sita z’amanywa’’. Umwe muri abo bagabo yaramubwiye ati: “Wagiye utera ubwoba idini ryacu. Uyu munsi Allah yaguhamagaye, ugiye kumusanga.Bamwe barampondaguye bikabije mu gihe abandi banjombaguye ibikoresho bari bafite, kandi natakaje amaraso menshi…”

Yakomeje avuga ko nta kintu na kimwe batwaye mu modoka ko ahubwo ari we bashakaga gusa kuko bamukubise umutwe w’icyuma bituma ata ubwenge mu gihe cy’amasaha abiri ariko ku bw’amahirwe umugenzi wihitiraga wamusanze mu kidendezi cy’amaraso aho bari bamusize ari intere maze ahamagara abapolisi batabara ubuzima bwe bamujyana kwa muganga.

Nyuma yo guhabwa ubuvuzi bw’ibanze, Charles Kamya yimuriwe mu bindi bitaro byisumbuye kugira ngo abashe gukurikiranwa n’abaganga kabuhariwe. Nyiri ugukorerwa ayo marorerwa avuga ko akeka ko izo ntagondwa z’abayisilamu zaba zaramujijije igitabo cya Korowani yari aherutse kugura ari nacyo yakoresheje muri izo mpaka ariko bikarakaza cyane abayisilamu ubwo yageragezaga kubumvisha abayisilamu ko kuva isi yaremwa kugeza ubu, Imana ishaka ko abantu bose bakizwa bagahindukirira Kristu harimo n’abayisilamu.

Itegekonshinga rya leta ya Uganda n’andi mategeko, ryemera ubwisanzure bw’amadini, harimo n’uburenganzira bwo kugaragaza imyizerere y’umuntu no guhindura idini. Abayisilamu mu gihugu cya Uganda ntibarenga 12% by’abaturage bose b’iki gihugu bakaba biganje cyane mu bice by’uburasirazuba.

Related post

Leave a Reply

Your email address will not be published. Required fields are marked *