Ukraine: Ababikira biyemeje gutanga umusanzu wabo ku barenga miliyoni 7 bamaze gukurwa mu byabo

 Ukraine: Ababikira biyemeje gutanga umusanzu wabo ku barenga miliyoni 7 bamaze gukurwa mu byabo

Ababikira bo mu kigo cya St Joseph giherereye mu burengerazuba bwa Ukraine biyemeje gucumbikira mu kigo cyabo imbaga ya bamwe mu baturage bakuwe mu byabo imbere mu gihugu ndetse no kubaha ubundi bufasha bw’ibanze bakeneye. Ubu bwitange, abo babikira bazabufashwamo n’Imiryango y’abagiraneza yemeye gutanga inkunga y’amafaranga kuri abo baturage kuri ubu bakomeje gusharirirwa n’imibereho yo mu ntambara.

Inkuru ya ‘Vatican News’ ivuga ko aba babikira bafunguye imiryango y’ikigo babamo ku abantu bose bashaka ubuhungiro imbere muri Ukraine by’umwihariko abo mu burasirazuba n’amagepfo kuko ibitero by’u Burusiya byashegeshe cyane utwo utwo duce.


Umwe mu babikira bakorera umurimo mu burengerazuba bw’umugi wa Lviv, Sr. Tobiasza yavuze ko we na bagenzi be bazafasha abaturage uko bashoboye kose ndetse bakaba bazanabashakira ahantu bashobora gutura igihe kirekire nko muri Polonye mu gihe intambara yaba ikomeje. Yakomeje avuga ko bazemera aho babaga hakaba ikigo cy’abimukira kandi ko na bo byabashimishije kubona ubufasha.


Mu magambo ye ati: “Bishimiye cyane kubona amahirwe yo gukaraba, gufata amafunguro ashyushye ndetse no kuruhuka. Bamwe bari bamaze iminsi myinshi mu nzu zo munsi y’ubutaka cyangwa mu tuzu twa shitingi. Tubifashijwemo n’abagiraneza bo mu karere ndetse n’abanyamahanga bashoboye kugurirwa imashini imesa, firigo, ibitanda n’ibindi. Iby’ingenzi byose kugira ngo babashe kubaho”.

Uretse ubwo bufasha bufatika, aba babikira bavuga ko bazanafasha abo bimukira mu kubasengera kandi na bo bagakomeza gahunda zabo zisanzwe z’amasengesho.

Imiryango yegamiye kuri Kiliziya yagiye itanga ubufasha bunyuranye bitewe n’ibyo ishoboye gukora. Ishami ry’Umuryango w’Abibumbye ryita ku mpunzi (UNHCR ), rivuga ko abantu barenga miliyoni 4.7 bamaze guhubga Ukraine bajya mu mahanga. Naho Umuryango Mpuzamahanga ushinzwe Abinjira n’Abasohoka (IOM), wo uvuga ko abandi miliyoni 7.1 bavanywe mu byabo bakimukira mu tundi duce tw’igihugu.

Related post

Leave a Reply

Your email address will not be published.