Ukraine: Abagatolika bagiye gufashishwa miliyari imwe y’amafaranga y’u Rwanda

 Ukraine: Abagatolika bagiye gufashishwa miliyari imwe y’amafaranga y’u Rwanda

Léonidas MUHIRE

Umuryango w’abagiraneza ushingiye ku idini gatolika (Aid to Church in Need), kuri uyu wa kane wiyemeje kandi utangira gutanga imfashanyo y’ubutabazi bwihutirwa ku banya Ukraine bihaye Imana barenga ibihumbi bitandatu bo mu idini gatolika mu rwego rwo kubafasha mu mirimo yabo ya buri munsi muri iki gihe intamabara hagati y’iki gihugu n’Uburusiya yamaze gutangira.

Kuri uyu wa kane, 24 Gashyantare 2022 nibwo umuryango ‘Aid to the Church in Need’ watangiye gutanga inkunga ingana na miliyoni imwe y’amayero (ahwanye na miliyari imwe y’amafranga y’u Rwanda), yo gushyigikira imirimo ya kiliziya muri Ukraine inatangira gukusanya izindi mfashanyo zo gufasha kiliziya muri iki gihugu.

Iyi mfashanyo itangiye gutangwa nyuma y’uko Uburusiya butangiye intambara byeruye aho ibisasu bya misile byatangiye kuraswa muri Ukraine mu gitondo cyo kuri uyu wa kane.Nk’uko umuryango ‘Aid to the Church in Need'(ACN) ubitangaza, inkunga yawo izafasha abihayimana 6,229 bose hamwe, harimo abapadiri 4.879 n’abandi bihaye Imana ndetse n’ababikira bagera kuri 1,350 bo muri Ukraine.

Iri tsinda kandi rizatanga ubufasha ku bagatolika b’abagereki ndetse n’abandi. Iyo nkunga hazavamo amafaranga azafasha mu kubona ibintu by’ibanze harimo nk’ibiryo, amazi n’ibindi.

Musenyeri Pavlo uyobora imwe muri diyosezi zizahabwa inkunga n’uyu muryango yagize ati: “Ibiciro biri kuzamuka cyane cyane ku bicuruzwa by’ingenzi. Ibintu muri diyosezi yacu biragoye cyane. Umubare w’abizera wagabanutse kandi n’abasigaye, barababaye ntibashobora gukomeza gufasha paruwasi cyangwa gushyigikira abapadiri. Bari kuza ubwabo ahubwo bagasaba ubufasha abapadiri n’ababikira”.

Mu itangazo rigenewe abanyamakuru ryatanzwe n’umuyobozi wa ‘Aid to the Church in Need’, Thomas Heine-Geldern, yagize ati: “Ibyo twese twifuzaga kwirinda byabaye: Ukraine iri mu ntambara ‘ACN’ yashyigikiye kiliziya yo muri muri Ukraine mu bihe byashize kandi ntizayitererana muri iki gihe gikomeye kandi kigoye”. Umuryango ‘ACN’ ugomba kuzita ku bapadiri, ababikira n’abandi muri za bari muri za paruwasi hamwe n’impunzi. Abari mu bigo by’imfubyi no mu ngo z’ababyeyi barera abana ndetse n’abasaza bazahura n’ibibazo byo guhumeka ibyuka byo mu kirere cyanduye cyo mu gihe cy’intambara”. Yanasabye kandi abanyamasengesho gusengera Ukraine batabaza umubyeyi Bikira Mriya.

Umuryango ‘Aid to the Church in Need'(ACN) washinzwe mu mwaka w’1947 nyuma y’Intambara ya Kabiri y’Isi yose. Ufite inshingano yo gufasha umurimo w’abakristu gatolika ku isi cyane cyane abakristu batotezwa, abakandamizwa, cyangwa abababaye ukaba waramenyekanye nk’umuryango ushamikiye ku idini gatolika mu mwaka wa 2011.

Mu mwaka wa 2014 nabwo wafashije abakristu gatolika mu ntamabara iki kigihugu cyarwanaga n’Uburusiya na none yarangiye Uburusiya bwiyometseho intara ya Crimea yari isanzwe iri mu gihugu cya Ukraine.

Related post

Leave a Reply

Your email address will not be published. Required fields are marked *