Ukraine: Umupasiteri yashimuswe nyuma yo kwemerera icumbi abahunga intambara

 Ukraine: Umupasiteri yashimuswe nyuma yo kwemerera icumbi abahunga intambara

Léonidas MUHIRE

Nk’uko ikinyamakuru ‘Christian Post’ cyabitangaje kuri uyu wa 26/03/2022, igitero ingabo z’u Burusiya zagabye mu mugi wa Melitopol mu cyumweru gishize byamenyekanye ko cyanashimutiwemo umupasiteri w’imyaka 50 witwa Dmitry Bodyu w’Umunya-Ukraine ariko ufite n’ubwenegihugu bwa Amerika wakoreraga umurimo mu gihugu cya Ukraine nyuma y’uko mu minsi ishize hari ubutumwa yari yatanze busaba abantu badafite amajyo guhungira mu rusengero rw’idini rye.

Ku wa gatandatu w’icyumweru gishize ni bwo abasirikare b’Abarusiya bagera ku 10 bari mu bari bagabye igitero mu magepfo y’umugi wa Melitopol bageze mu rugo rwa pasiteri Dmitry Bodyu, akanaba musenyeri w’idini ‘Word of Life Church’ mu mugi wa Melitopol maze bahita bamushimuta. Uretse kumushimuta, banatwaye telefone yo mu rugo, pasiporo ye y’Abanyamerika ndetse n’ibindi bikoresho.

Umukobwa we w’imfura, Esther Lily Bodyu Ogawa aganira n’itangazamakuru yagize ati: “Barinjiye bahita batangira kumubaza ako kanya bati ‘Waba uri umuturage w’Umunyamerika?’ Icyo ni kimwe mu bibazo bya mbere bari bafite. Mfite impungenge ndi kubyiyumvamo muri nge ariko nizeye  ko atekanye kandi ko azagaruka. Ariko kubera kutamenya neza amakuru yose y’aho ari  birumvikana ko ari byo bintera izo mpungenge nifitemo”.

Uretse uwo  mupasiteri, abandi bafashwe n’ingabo z’u Burusiya muri Melitopol ni Sergiy Prima, umuyobozi w’inama y’akarere ka Melitopol, impirimbanyi Olga Gaisumova n’umupolisi wa Ukraine witwa Dmitry Stoikov.

Ubwo butumwa bikekwa ko pasiteri Dmitry Bodyu yazize, yabunyujije ku rubuga rwa Facebook bugira buti: “Niba ukeneye ubufasha ubwo ari bwo bwose cyangwa ukaba udafite aho uba cyangwa utinya kuguma mu rugo … Urusengero  rurakinguye…Tuzagerageza gukora ibishoboka byose ngo dutange ubufasha…”.

Related post

Leave a Reply

Your email address will not be published. Required fields are marked *